తన ప్రాణాలు కాపాడిన ఆటో డ్రైవర్‌తో సైఫ్ అలీఖాన్ ఆత్మీయ భేటీ.. ఎన్ని డబ్బులిచ్చారంటే?

జనవరి 16వ తేదీ రోజు వేకువజామున 2.30 గంటలకు.. బాలీవుడ్ స్టార్ హీరో సైఫ్ అలీఖాన్‌పై దాడి జరిగిన విషయం అందిరకీ తెలిసిందే. అయితే ఈ కేసులో నిందితుడిని ఇప్పటికే ముంబయి క్రైమ్ బ్రాంచ్ పోలీసులు అరెస్ట్ చేసి కోర్టులో హాజరు పరిచారు. ప్రస్తుతం పోలీస్ కస్టడీలోకి తీసుకుని అనేక విషయాలపై ఆరా తీస్తున్నారు. మరోవైపు శస్త్ర చికిత్స అనంతరం కోలుకున్న సైఫ్.. మంగళ వారం రోజు ఆస్పత్రి నుంచి డిశ్ఛార్జీ అయ్యారు. ఇంటికి వచ్చిన వెంటనే ఆయన.. ఘటన జరిగిన రోజు పిలవగానే వచ్చి సరైన సమయానికి తనను ఆస్పత్రిలో చేర్చి ప్రాణాలు కాపాడిన ఆటో డ్రైవర్ భజన్ సింగ్ రాణాను కలిశారు. అతడిని మనసారా గుండెలకు హత్తుకుని ప్రత్యేక ధన్యవాదాలు తెలిపారు. ఆపూర్తి వివరాలు మీకోసం.

ముంబై బాంద్రాలోని సైఫ్ అలీఖాన్ నివాసంలోనే.. జనవరి 16వ తేదీ రోజు వేకువజామున 2.30 గంటలకు హీరోపై దాడి జరిగింది. సైఫ్, అతడి కుటుంబ సభ్యులు నిద్రలో ఉండగా.. మెట్లమార్గం గుండా ఇంట్లోకి ప్రవేశించిన ఓ దుండగుడిని సిబ్బంది గుర్తించి కేకలు వేయగా.. సైఫ్ అక్కడకు వెళ్లినట్లు తెలుస్తోంది. ఈక్రమంలోనే నిందితుడు తన వెంట తెచ్చుకున్న కత్తితో హీరోపై దాడికి పాల్పడ్డాడు. మొత్తం ఆరు సార్లు ఇష్టం వచ్చినట్లుగా పొడవగా.. సైఫ్ తీవ్ర గాయాల పాలయ్యాడు.

ఈక్రమంలోనే సైఫ్ కుటుంబ సభ్యులు అతడిని ఆస్పత్రికి తరలించేందుకు బయటకు వచ్చారు. గ్యారేజీలో ఎన్ని కార్లు ఉన్నా వాటిని నడిపే పరిస్థితిలో లేకపోవడంతో.. బయట వెళ్తున్న ఓ ఆటోను పిలిచారు. అలా పిలిచిన వెంటనే ఇంటికి వచ్చిన ఆటో డ్రైవర్ భజన్ సింగ్ రాణా.. రక్తపు మరకలు, గాయాలతో ఉన్న సైఫ్‌ను తన ఆటోలో ఎక్కించుకున్నాడు. అతడితో పాటు ఆయన కుమారుడు తైమూర్ అలీఖాన్ కూడా ఆటోలో ఎక్కగా.. డ్రైవర్ లీలావతి ఆస్పత్రికి తీసుకు వెళ్లాడు. పదే పది నిమిషాల్లో సైఫ్‌ను ఆస్పత్రిలో చేర్చాడు.

ఆ క్షణంలో సైఫ్ అలీఖాన్ ఆటో డ్రైవర్‌తో కనీసం మాట్లాడలేదు. ఎలాంటి ఛార్జీలు కూడా చెల్లించలేదు. అసలు ఆ ఆటో డ్రైవర్‌కు తన ఆటోలో ఉన్నది హీరో సైఫ్ అలీఖాన్ అనే విషయం కూడా తెలియదు. ఈ విషయాలన్నింటినీ నేరుగా ఆయనే మీడియాతో చెప్పారు. అయితే శస్త్ర చికిత్స అనంతరం సైఫ్ అలీఖాన్ జనవరి 21వ తేదీ రోజు ఆస్పత్రి నుంచి డిశ్ఛార్జీ అయ్యారు. ఇంటికి చేరుకున్న వెంటనే హీరో.. సరైన సమయానికి వచ్చిన తన ప్రాణాలు కాపాడిన ఆటో డ్రైవర్ భజన్ సింగ్ రాణాను కలిశారు. నేరుగా ఆయనను ఇంటికి పిలిపించుకున్న సైఫ్.. చాలా సేపు అతడితో మాట్లాడారు.

ముఖ్యంగా భజన్ సింగ్ రాణాను చూసిన వెంటనే.. సైఫ్ ఆయనను గుండెలకు హత్తుకున్నారు. ప్రత్యేక ధన్యవాదాలు తెలిపారు. ఇలా ప్రమాదాల్లో ఉన్న మరెంతో మందికి మీరు సేవలు కొనసాగించాలని చెప్పారు. అలాగే సైఫ్ అలీఖాన్ తల్లి షర్మిలా ఠాగూర్ కూడా ఆటో డ్రైవర్ భజన్ సింగ్‌తో మాట్లాడారు. జీవితాంతం సుఖ సంతోషాలతో హాయిగా జీవించమంటూ దీవించారు. మరోవైపు సైఫ్ అలీఖాన్.. ఆరోజు ఆటో ఛార్జీలు చెల్లించని విషయాన్ని గుర్తు చేశారు. తాను కచ్చితంగా ఆ డబ్బులను చెల్లిస్తానంటూ భజన్ సింగ్‌కు హామీ ఇచ్చారు. కానీ ఎంత ఇస్తారనేది మాత్రం చెప్పలేదు.