పెళ్లి చేసుకున్న ఇద్దరు మహిళలు.. కారణం ఏంటంటే?

ఉత్తర ప్రదేశ్‌లోని గోరఖ్‌పూర్‌కు చెందిన కవిత, గుంజా అనే ఇద్దరు మహిళలకు ఇది వరకే పెళ్లిళ్లు అయ్యాయి. ఇద్దరూ భర్తలతో కొంత కాలం హాయిగానే జీవించారు. ఆ తర్వాత నుంచి ఆ భర్తల్లో మార్పులు వచ్చాయి. ముఖ్యంగా తాగుడుకు బానిసలై నిత్యం వేధించడం ప్రారంభించారు. అవి తట్టుకోలేక ఆ మహిళలు నరకం అనుభవించారు. అయినా ఎవరికీ చెప్పుకోకుండా తమలో తామే నలిగిపోయారు. అయితే ఈ మహిళలు ఇద్దరూ వేర్వేరు ప్రాంతాల్లో నివాసం ఉండేవారైనా సోషల్ మీడియా ద్వారా పరిచయం ప్రారంభం అయింది.

ఈక్రమంలోనే వీరిద్దరూ ఛాటింగ్ చేసుకోవడం మొదలు పెట్టారు. తమ భర్తలు పెడుతున్న ఇబ్బందులు, కష్టాల గురించి మాట్లాడుకునే వారు. ఇక మన జీవితాలు ఇంతే మారవు అంటూ చెప్పుకుని బాధ పడేవారు. ఒకరు బాధలో ఉన్నప్పుడు మరొకరు తోడుగా నిలవడంతో.. ఇద్దరి మధ్య స్నేహం ముదిరింది. వీరి స్నేహం లాగే భర్తల వేధింపులు కూడా పెరిగాయి. ఇక వాటిని భరించాల్సిన అవసరం లేదని భావించిన ఈ మహిళలు.. భర్తలను వదిలేసి కలిసుండాలని నిర్ణయించుకున్నారు. ఈక్రమంలోనే ఇద్దరూ పెళ్లి చేసుకుంటే ఎవరూ తమను విడదీయలేరని భావించారు.

అదే విషయాన్ని ఇద్దరూ భర్తలకు చెప్పేశారు. ఆపై ఇండ్ల నుంచి వచ్చేసి.. ఇద్దరూ డియోరియోలో ఉన్న చోటీ కాశీ శివాలయానికి చేరుకున్నారు. అక్కడే పూల దండాలు, సింధూరం కొనుగోలు చేసి పెళ్లి చేసుకోవడానికి సిద్ధం అయ్యారు. ఈక్రమంలోనే గుంజా అనే మహిళ పెళ్లి కుమారుడిలా మారగా.. కవిత నుదిటిన సింధూరం పెట్టింది. ఆపై ఒకరి మెడలో మరొకరు దండలు వేసుకున్నారు. ఇలా వీరిద్దరూ పెళ్లి చేసుకోవడం చూసిన స్థానికులు వీడియోలు తీశారు. మహిళలైన మీరిద్దరూ ఎందుకిలా పెళ్లి చేసుకుంటున్నారని ప్రశ్నించగా.. తాగుబోతు భర్తల వల్ల వేధింపులకు గురయ్యామని.. వాటిని తాళలేకే ఈ పెళ్లి చేసుకుంటున్నట్లు చెప్పారు.

ముఖ్యంగా ప్రశాంతమైన, ప్రేమ జీవితాన్ని గడపాలని తాము నిర్ణయించుకున్నామని గుంజా, కవితలు వివరించారు. ఎవరో తెలియని పురుషులను చేసుకుని ఇబ్బంది పడడం కంటే.. ఒకరి గురించి మరొకరికి బాగా తెలిసిన స్నేహితురాళ్లమే వివాహం చేసుకోవడం మంచదనిపించిందని స్పష్టం చేశారు. అయితే ప్రస్తుతం తమకంటూ సొంత ఇళ్లు లేకపోయినా.. స్థానికంగానే ఓ ఇంటిని అద్దెకు తీసుకుని కొత్త జీవితాన్ని ప్రారంభిస్తామని వెల్లడించారు. అయితే గుడిలోకి వచ్చిన ఈ మహిళలు ఇద్దరూ.. ప్రశాంతంగా పెళ్లి చేసుకుని వెళ్లిపోయారని.. ఇలాంటి ఇబ్బందులు కల్గజేయలేదని ఆలయ పూజారి వెల్లడించారు.