'చైతన్యపురి నర్సు' హత్యే ప్రేరణ,,,మీర్‌పేట్ భార్యను నరికిన కేసులో వెలుగులోకి మరిన్ని సంచలనాలు

'మీర్‌పేట భార్యను ముక్కలుగా నరికిన కేసులో రోజుకో కొత్త కోణం వెలుగులోకి వస్తోంది. మీర్‌పేట పరిధి న్యూవెంకటేశ్వరనగర్‌ కాలనీలో ఈనెల 25న భార్య మాధవిని హత్య చేసిన మాజీ ఆర్మీ ఉద్యోగి గురుమూర్తి.. ఆమె శవాన్ని మాయం చేసేందుకు ఇంటర్నెట్‌లో వెతికినట్లు తెలిసింది. ఓటీటీలోని ఓ క్రైమ్ వెబ్‌సిరీస్‌లో శవాన్ని ముక్కలుగా చేయటం చూసినట్లు తెలిసిందే. దాంతో పాటుగా.. రెండేళ్ల క్రితం హైదరాబాద్ చైతన్యపురిలో సంచలనం రేకెత్తించిన నర్సు హత్య ఉదంతాన్ని కూడా ప్రేరణగా తీసుకున్నట్లు తెలిసింది. 2023 మేలో ఇంట్లో అద్దెకు ఉండే నర్సును చంపేసిన ఓనర్.. ఆమె శరీరాన్ని స్టోన్ కట్టర్ల సాయంతో ముక్కలు ముక్కలుగా చేశాడు. ఆ తర్వాత వాటిని ఫ్రిజ్‌లో భద్రపరిచి సమయం దొరికినప్పుడల్లా డిస్పోజ్ చేయాలని అనుకున్నాడు. చుట్టపక్కల వాళ్లకు దుర్వాసన రాకుండా స్ర్పేలు, కర్పూరం, ఇతర కెమికల్స్ వాడి జాగ్రత్త పడ్డాడు.

ఈ కేసులో గురుమూర్తి తన భార్య శవాన్ని ఇదే తరహాలో మాయం చేసినట్లు గుర్తించారు. ఇంట్లో ఉన్న హ్యాక్సా బ్లేడుతో ముందు మాధవి తలను వేరుచేసి మొండేన్ని మూడు ముక్కలుగా చేసినట్లు పోలీసుల విచారణలో తేలింది. ఆ తర్వాత బకెట్‌లో హీటర్ సాయంతో నీటిని వేడి చేసి.. ముక్కల్ని అందులో ఉడికించాడు. తర్వాత మళ్లీ పెద్ద స్టవ్‌ మీద శరీరా భాగాలను కాల్చాడు. ఈ క్రమంలో ముక్కలు మాంసం ముద్దలుగా మారిపోయాయి. పక్కింట్లో వాళ్లకు దుర్వాసన వెళ్లకుండా కొన్ని కెమెకల్స్ స్ర్పే చేశాడు. మాధవిని చంపిన తర్వాత.. దాదాపు 12 గంటల్లోనూ ఆమె శవాన్ని మాయం చేశాడు. మాంసం ముద్దలను తీసుకెళ్లి చెరువులో వేశాడు. ఆ తర్వాత తనకేం తెలియనట్లు మాధవి తల్లిదండ్రులకు ఫోన్‌ చేసి ఇంటి నుంచి వెళ్లిపోయినట్లు చెప్పాడు.

గతంలో ఓసారి గురుమార్తిపై భార్య తరపు బంధువులు దాడి చేశారు. ప్రకాశం జిల్లా సొంతూరులో మరో మహిళతో వివాహేతర బంధం పెట్టుకోగా.. అది తెలిసి దాడికి పాల్పడ్డారు. ఇప్పుడు భార్యను చంపేశానని తెలిస్తే.. వారు దారుణంగా స్పందిస్తారేమోనని భయపడి ఆమె మృతదేహాన్ని మాయం చేశాడు. ఈమేరకు పోలీసులు విచారణను వేగవంతం చేసి.. ఇతడిచ్చిన సమాచారం మేరకు ఇంట్లో ఆధారాలు సేకరించారు. మాధవి తల వెంట్రుకలు, స్టవ్, వాటర్‌ బకెట్, హీటర్ వద్ద రక్తం ఆనవాళ్లను గుర్తించి ఫోరెన్సిక్‌ ల్యాబ్‌కు పంపారు. మిస్సింగ్ కేసును మర్డర్ కేసుగా మార్చి గురుమూర్తిని నిందితుడిగా చేర్చారు.