నామినేటెడ్ పోస్టుల భర్తీపై,,, సీఎం నారా చంద్రబాబు నాయుడు కీలక ప్రకటన

ఆంధ్రప్రదేశ్‌లో ఎన్డీఏ కూటమి ప్రభుత్వం కొలువుదీరి ఏడు నెలలు పూర్తి కావొస్తోంది. ఎన్నికల్లో పోటీచేసి ఓడిపోయిన నేతలు, అసలు అవకాశమే రాని లీడర్లు, సీట్లు త్యాగం చేసిన నాయకులు.. ఇలా ఎందరో కూటమి సర్కారు అధికారంలోకి రావటంతో నామినేటెడ్ పదవులపై ఆశలు పెంచుకున్నారు. ఇక ఇప్పటికే రెండు విడతలుగా ఏపీ ప్రభుత్వం నామినేటెడ్ పదవులు భర్తీ చేసింది. నవంబర్ నెలలో రెండో విడత నామినేటెడ్ పదవుల భర్తీ చేపట్టింది. తాజాగా మూడో విడత నామినేటెడ్ పదవుల నియామకంపై సీఎం చంద్రబాబు కీలక ప్రకటన చేశారు.

తెలుగుదేశం పార్టీ ముఖ్య నేతలతో అధినేత నారా చంద్రబాబు నాయుడు మంగళవారం టెలీకాన్ఫరెన్స్ నిర్వహించారు. ఈ సందర్భంగా జూన్‌లోగా అన్ని నామినేటెడ్ పదవులను భర్తీ చేస్తామని చంద్రబాబు నాయకులకు హామీ ఇచ్చారు. త్వరలోనే 214 మార్కెట్‌ కమిటీలు, 1,100 ట్రస్ట్‌ బోర్డులకు సభ్యులను నియమిస్తామన్నారు. అయితే పదవుల భర్తీలో క్లస్టర్‌, యూనిట్‌, బూత్‌, సెక్షన్‌ సభ్యులనే సిఫారసు చేయాలని పార్టీ నేతలకు చంద్రబాబు సూచించారు. సుదీర్ఘకాలంగా తెలుగుదేశం పార్టీలో పని చేస్తున్న వారిని ప్రోత్సహించాలని సూచించారు. పార్టీ కోసం కష్టపడిన నేతలు, కార్యకర్తలకు న్యాయం చేస్తామని చంద్రబాబు హామీ ఇచ్చారు.

మరోవైపు గతేడాది సెప్టెంబర్‌లో చేపట్టిన తొలి విడత నామినేటెడ్ పదవుల భర్తీలో కూటమి పార్టీల నుంచి 20 కార్పొరేషన్లకు ఛైర్మన్లు, సభ్యులను నియమించారు. ఆర్టీసీ ఛైర్మన్‌గా మాజీ ఎంపీ కొనకళ్ల నారాయణ, వక్ఫ్‌ బోర్డు ఛైర్మన్‌గా అబ్దుల్‌ అజీజ్‌, శాప్‌ ఛైర్మన్‌గా రవినాయుడు, 20 సూత్రాల అమలు కమిటీ ఛైర్మన్‌గా లంకా దినకర్‌, ఏపీఐఐసీ ఛైరన్‌గా మంతెన రామరాజు ఇలా మొత్తం 90 మందితో నామినేటెడ్ పదవుల జాబితా ప్రకటించారు. ఈ భర్తీలో పార్టీల ప్రాధాన్యాలతో పాటుగా సామాజిక న్యాయం పాటించారు. నవంబర్‌లో ప్రకటించిన రెండో జాబితాలో వివిధ సామాజిక వర్గాల సంక్షేమ, అభివృద్ధి కార్పొరేషన్‌లకు ఛైర్మన్‌లను నియమించారు. ఈ క్రమంలోనే ప్రవచనకర్త చాగంటి కోటేశ్వరరావును ఏపీ నైతిక విలువల సలహాదారుగా నియమించారు.

తాజాగా జూన్‌లోగా నామినేటెడ్ పదవుల భర్తీ పూర్తి చేస్తామని.. చంద్రబాబు క్లారిటీ ఇచ్చారు. దీంతో కూటమి నేతల్లో ఆశలు మొదలయ్యాయి. రెండు జాబితాల్లో చోటు దక్కించుకోలేని నేతలు ఈసారి ఎలాగైనా పదవిని చేజిక్కించుకోవాలని ప్రయత్నాలు మొదలెట్టారు.