ఏపీ దక్షిణకోస్తా రైల్వేజోన్ పరిధి ఖరారు.. డివిజన్లు ఇవే

ఉత్తరాంధ్ర వాసుల చిరకాల కోరికను నెరవేర్చింది. విశాఖపట్నం కేంద్రంగా దక్షిణ కోస్తా రైల్వే జోన్ పరిధిని నిర్ణయించింది. ఈ మేరకు రైల్వే శాఖ ఉత్తర్వులు జారీ చేసింది. దక్షిణ కోస్తా రైల్వే‌జోన్‌లో విశాఖపట్నం, విజయవాడ, గుంటూరు, గుంతకల్లు డివిజన్లు ఉండనున్నాయి. రాష్ట్ర ప్రభుత్వం విజ్ఞప్తిని పరిగణనలోకి తీసుకున్న కేంద్రం.. వాల్తేరు డివిజన్‌ను విశాఖపట్నం డివిజన్‌గా పేరు మార్చింది. అలాగే విశాఖ డివిజన్‍లోకి 410 కి.మీ. పరిధి చేరుస్తూ.. విశాఖ కేంద్రంగా విశాఖ రైల్వే డివిజన్ ఏర్పాటు చేసింది. దీనితో పాటు విశాఖ కేంద్రంగా విశాఖపట్నం రైల్వేజోన్ పరిధిని నిర్ణయించింది.

కేంద్ర ప్రభుత్వం తీసుకున్న నిర్ణయాన్ని విశాఖపట్నం ఎంపీ శ్రీభరత్ స్వాగతించారు. ఉత్తరాంధ్ర ప్రజల ఆకాంక్ష నెరవేరిందన్న ఆయన.. ఇది కూటమి ప్రభుత్వం సాధించిన మరో విజయమన్నారు. విశాఖ రైల్వే అభివృద్ధిలో చరిత్రాత్మక ముందడుగుగా అభివర్ణించారు. అలాగే వాల్తేరును విశాఖ డివిజన్‌గా పేరు మార్చడం హర్షణీయమని కొనియాడారు. మరోవైపు రాయగడ రైల్వే డివిజన్ పరిధిని కూడా కేంద్రం ఖరారు చేసింది. అలాగే కొండపల్లి - మోటుమర్రి సెక్షన్‌ను సికింద్రాబాద్ డివిజన్ నుంచి విజయవాడ డివిజన్‌‌లోకి మార్చారు.

మరోవైపు విశాఖ రైల్వే డివిజన్‌లో పలాస - విశాఖపట్నం - దువ్వాడ, కూనేరు - విజయనగరం, నవపాడు జంక్షన్ - పర్లాకిమిడి, బొబ్బిలి జంక్షన్ - సాలూరు, సింహాచలం నార్త్ - దువ్వాడ బైపాస్, వడ్లపూడి - దువ్వాడ, విశాఖపట్నం స్టీల్ ప్లాంట్- జగ్గయ్యపాలెం వరకూ ఉన్న రైల్వే ట్రాక్ మొత్తం విశాఖ రైల్వే డివిజన్‌లోకి వస్తుందని రైల్వే శాఖ ఉత్తర్వుల్లో పేర్కొంది. మరోవైపు రాయగడ రైల్వే డివిజన్‌లోని కొన్ని మార్గాలను విశాఖ రైల్వే డివిజన్ పరిధిలోకి తెచ్చారు. రెండు డివిజన్ల పరిధిని రైల్వేశాఖ ఖరారు చేసింది. విశాఖ రైల్వే డివిజన్‌ను కొత్తగా ఏర్పాటు చేసిన నేపథ్యంలో దానిని కూడా దక్షిణకోస్తా రైల్వేజోన్ పరిధిలోకి తీసుకువచ్చారు. కేంద్రం తీసుకున్న నిర్ణయంపై ఉత్తరాంధ్ర వాసులు హర్షం వ్యక్తం చేస్తున్నారు.