అలా ఫ్రాన్స్‌లో వీర్ సావర్కర్ సాహసాన్ని గుర్తు చేసుకొన్న పీఎం మోదీ

ఫ్రాన్స్ పర్యటనలో వీర్ సావర్కర్ పోరాటం పట్ల ప్రధాని నరేంద్రమోడీ ప్రశంసలు గుప్పించారు. భారత స్వాతంత్ర్య ఉద్యమ సమయంలో ఇంగ్లండ్‌లో వీర్ సావర్కర్‌ను బ్రిటీష్ సైనికులు అదుపులోకి తీసుకోగా.. అక్కడి నుంచి భారత్‌కు తరలించే సమయంలో వారి చెర నుంచి తప్పించుకునేందుకు ఆయన ప్రయత్నించారు. ఈ సమయంలోనే ఫ్రాన్స్‌కు చేరుకోగా.. అక్కడ ఫ్రాన్స్ అధికారులు పట్టుకుని.. మళ్లీ బ్రిటిష్ వారికే అప్పగించారు. దీంతో ఆయన చేసిన పోరాటం విఫలం అయింది. చివరికి భారత్‌కు తీసుకువచ్చి అండమాన్ జైలులో కొన్నేళ్ల పాటు ఉంచి.. చివరికి విడిచిపెట్టారు. తాజాగా ఫ్రాన్స్‌లో పర్యటిస్తున్న నరేంద్ర మోదీ.. వీర్ సావర్కర్ చేసిన పోరాటాన్ని గుర్తు చేశారు.

ఫ్రాన్స్‌లోని మార్సెయిల్‌లో అమరవీరులైన భారత సైనికులకు ప్రధాని మోదీ నివాళులు అర్పించారు. ఈ సందర్భంగా వీర్‌ సావర్కర్‌ను స్మరించుకున్నారు. 1906లో లాకోర్స్ చదివేందుకు వీర్ సావర్కర్ ఇంగ్లండ్‌ వెళ్లారు. అయితే బ్రిటిష్ గడ్డపై నుంచే భారతదేశ స్వాతంత్ర్య ఉద్యమాన్ని చేశారు. దీంతో బ్రిటిష్‌ వ్యతిరేక కార్యకలాపాలకు పాల్పడుతున్నారన్న ఆరోపణలతో 1910 మార్చి 13వ తేదీన వీర్ సావర్కర్‌ను లండన్‌ పోలీసులు అరెస్ట్ చేశారు. విచారణ చేసేందుకు భారత్‌కు తీసుకువెళ్లాలని ఇంగ్లండ్ పోలీసులు నిర్ణయించారు.

ఈ క్రమంలోనే లండన్‌ నుంచి యెమెన్‌లోని ఎడెన్‌ పోర్టుకు బ్రిటిష్‌ నౌక బయలుదేరింది. అందులో నుంచి సావర్కర్‌ తప్పించుకోవడానికి వీలు లేకుండా గట్టి నిఘా ఏర్పాటు చేశారు. ఆ నౌక మార్సెయిల్‌ పోర్టుకు చేరుకోగానే టాయిలెట్‌కు వెళ్లిన సావర్కర్‌.. అందులోని చిన్న రంధ్రం నుంచి బయటికి వచ్చి అతి కష్టం మీద ఒడ్డుకు చేరుకున్నారు. ఆ సమయంలో అక్కడ గస్తీ కాస్తున్న ఫ్రాన్స్‌ అధికారులు సావర్కర్‌ను అదుపులోకి తీసుకున్నారు. తనను ఒక శరణార్థిని అని.. తనను కస్టడీలోకి తీసుకోవాలని ఫ్రాన్స్‌ అధికారులను సావర్కర్ వేడుకున్నారు. అయితే ఇంగ్లీష్‌ అర్థంకాని ఆ ఫ్రాన్స్ అధికారి సావర్కర్‌ను బ్రిటిష్‌ పోలీసులకు అప్పజెప్పడంతో ఆయన సాహసం చేసి తప్పించుకున్నది మొత్తం వృథాగా మారింది.

చివరికి జులై 22వ తేదీన సావర్కర్‌ను బాంబేకు తీసుకువచ్చిన బ్రిటిష్‌ అధికారులు విచారణ చేపట్టి రెండు కేసుల్లో దోషిగా తేల్చారు. దీంతో ఆయనకు జీవిత ఖైదు విధించడంతో అండమాన్‌లోని సెల్యూలర్‌ జైలులో ఉంచారు. ఆ తర్వాత అనేక మార్లు సావర్కర్ చేసుకున్న వినతులతో చివరికి 1924లో విడుదల చేశారు. అయితే మార్సెయిల్‌లో బ్రిటిషర్ల చెర నుంచి తప్పించుకునేందుకు సావర్కర్‌ చేసిన ప్రయత్నాన్ని ఇప్పుడు గుర్తు చేసిన ప్రధాని మోదీ.. ఆయన సాహసాన్ని కొనియాడారు.