తమ్ముడు తమ్ముడే పేకాట పేకాటే,,10 మిలియన్ డాలర్లతో ట్రంప్ తో మస్క్ సెటిల్‌మెంట్

అగ్రరాజ్యం అమెరికా అధ్యక్షుడు డొనాల్డ్ ట్రంప్ వైఖరి.. తమ్ముడు తమ్ముడే.. పేకాట పేకాటే అన్న చందంగా మారింది. గతంలో అధికారంలో ఉన్న సమయంలో ఎక్స్ అధినేత ఎలాన్ మస్క్‌తో చాలా గొడవలు పడ్డ ట్రంప్.. రెండోసారి అధికారంలోకి వచ్చాకా చాలా స్నేహంగా ఉంటున్నారు. మస్క్ కూడా ట్రంప్ వైపే నిలబడి అన్నీ అతడికి నచ్చినట్లే చేస్తున్నారు. ఒకే తాటిపై నిలబడి అందరికీ షాకిచ్చిన వీరి మధ్య తాజాగా మరో కీలక పరిణామం చోటు చేసుకుంది. ముఖ్యంగా గతంలో ఎక్స్.. ట్రంప్‌పై నిషేధం విధంచగా ఆయన కోర్టులో దావా వేశారు. అయితే తాజాగా మస్క్ దీన్ని సెటిల్ చేయబోతున్నట్లు తెలుస్తోంది. ఈక్రమంలోనే ట్రంప్‌నకు 10 మిలియన్ డాలర్లు చెల్లించబోతున్నారట. ఆ పూర్తి వివరాలు మీకోసం.

2015లో అమెరికా అధ్యక్ష ఎన్నికల్లో గెలిచి ఐదేళ్ల పాలించిన ట్రంప్.. 2020 ఎన్నికల్లో ఘోర పరాజయం పాలైన విషయం అందరికీ తెలిసిందే. అయితే ఈ ఎన్నికల్లో గెలిచిన జో బైడెన్ విజయాన్ని ధ్రువీకరించేందుకు.. అమెరికా కాంగ్రెస్ వాషింగ్టన్ డీసీలోని క్యాపిటల్ భవనంలో సమావేశం అయింది. ఈ విషయం తెలుసుకున్న ట్రంప్ మద్దతుదారులు దీన్ని అడ్డుకోవాలని చూశారు. ఈక్రమంలోనే వేలాది మంది క్యాపిటల్ భవనంలోకి చొచ్చుకెళ్లి విధ్వంసం సృష్టించారు. భవనంపై దాడి చేశారు. దీంతో చాలా మందిని అదుపులోకి తీసుకున్న పోలీసులు వారిపై కేసులు కూడా పెట్టారు.

మరోవైపై దీనికి ట్రంప్ మద్దతు తెలుపగా.. సామాజిక మాధ్యమాలన్నీ ఈయనపై నిషేధం విధించాయి. ముఖ్యంగా ఎక్స్, ఫేస్‌బుక్, యూట్యూబ్, ఇన్‌స్టాగ్రామ్‌లు ట్రంప్ సోషల్ మీడియా ఖాతాలను నిషేధించాయి. దీంతో ట్రంప్ ఆయా సంస్థలపై దావా వేశారు. కొన్నాళ్ల తర్వాత అంటే 2023లో కాస్త వెనక్కి తగ్గిన సదరు సంస్థలు ట్రంప్ ఖాతాలపై నిషేధాన్ని ఎత్తివేస్తూ వాటిని పునరుద్ధరించాయి. ఇదిలా ఉండగా.. ట్రంప్ 2025 ఎన్నికల్లో మరోసారి విజయం సాధించి అధ్కక్ష పదవీ బాధ్యతలు చేపట్టగా.. ఈ గొడవలను సెటిల్ చేసుకునేందుకు అన్ని సంస్థలు ముందుకు వచ్చాయి.

ఇప్పటికే మెటా సంస్థ 25 మిలియన్ డాలర్లతో సెటిల్ చేసుకున్నట్లు వార్తలు వచ్చాయి. తాజాగా ఎలాన్ మస్క్ ఎక్స్ సంస్థ కూడా.. ట్రంప్‌తో సెటిల్‌మెంట్‌కు వచ్చినట్లు సమాచారం. ముఖ్యంగా 10 మిలియన్ డాలర్లు చెల్లించి మస్క్ ఈ గొడవకు ఫుల్‌స్టాప్ పెట్టబోతున్నట్లు తెలుస్తోంది. 10 మిలియన్ డాలర్లు అంటే భారత కరెన్సీలో 86 కోట్ల రూపాయలు. ఈ విషయం తెలుసుకున్న నెటిజెన్లు అంతా వీళ్లిద్దరూ స్నేహితులయ్యారు కదా.. సెటిల్‌మెంట్ అవసరమా అంటూ కామెంట్లు చేస్తున్నారు. కానీ ఇందుకు రిప్లైలు ఇస్తూ మరికొంత మంది.. తమ్ముడు తమ్ముడే.. పేకాట పేకాటే అనే సిద్ధాంతాన్ని ట్రంప్ ఫాలో అవుతారని చెప్పుకొస్తున్నారు.