శ్రీలంకపై చేతులెత్తేసిన ఆస్ట్రేలియా

ఛాంపియన్స్ ట్రోఫీకి ముందు ఆసీస్‌కు దెబ్బ మీద దెబ్బ తగులుతోంది. కీలక ప్లేయర్లంతా జట్టుకు దూరమవగా.. ఉన్నవాళ్లు కూడా దారుణంగా విఫలమవుతున్నారు. శ్రీలంకతో జరిగిన వన్డే సిరీస్‌లో ఆస్ట్రేలియా ఘోరంగా విఫలమైంది. రెండు మ్యాచ్‌లలోనూ ఓటమిపాలై క్లీన్ స్వీప్‌ను మూటగట్టుకుంది. దాంతో ఆతిథ్య శ్రీలంక జట్టు 2-0తో సిరీస్ కైవసం చేసుకుంది.

శ్రీలంక వేదికగా జరిగిన వన్డే సిరీస్‌లో ఆస్ట్రేలియా జట్టు ఘోర పరాభవాన్ని చవిచూసింది. సీనియర్ ఆటగాళ్లంతా గాయాలపాలవడంతో జూనియర్స్‌తో బరిలోకి దిగిన స్టీవ్ స్మిత్ సేన 0-2తో సిరీస్‌ను ముగించింది. మొదటి వన్డేలో 49 పరుగుల తేడాతో ఓడిన ఆసీస్, రెండో వన్డేలో 174 పరుగుల తేడాతో దారుణ ఓటమిపాలయింది.

కొలంబో వేదికగా జరిగిన రెండో వన్డేలో తొలుత బ్యాటింగ్ చేసిన శ్రీలంక జట్టు నాలుగు వికెట్ల నష్టానికి 281 పరుగులు చేసింది. ఓపెనర్ పాతూమ్ నిస్సాంక 6 పరుగులకే అవుటైనా.. మధుషానక, కుశాల్ మెండీస్ కలిసి స్కోర్ బోర్డును ముందుకు నడిపించారు. మధుషానక (51) హాఫ్ సెంచరీ, వికెట్ కీపర్ కుశాల్ మెండీస్ (101) సెంచరీతో మెరిశారు. కెప్టెన్ అసలంక కూడా 66 బంతుల్లో 78 పరుగులతో నాటౌట్‌గా నిలిచాడు.

శ్రీలంక ఇచ్చిన 282 పరుగుల లక్ష్యాన్ని ఛేదించడంలో ఆసీస్ బొక్కబోర్లా పడింది. శ్రీలంక స్పిన్నర్ల ధాటికి కేవలం 107 పరుగులకే ఆలౌట్ అయింది. ఆసీస్ ఓపెనర్ ట్రావిస్ హెడ్ 18 పరుగులకు అవుట్ కాగా, జాక్‌ఫ్రేజర్ మెక్‌గర్క్ 9, స్మిత్ 29, జోష్ ఇంగ్లిస్ 22, మ్యాక్స్‌వెల్ 1 పరుగుకే పెవిలియన్ బాట పట్టారు. శ్రీలంక బౌలర్లలో ఫెర్నాండో మూడు వికెట్లు తీసుకోగా, దునిత్ వెల్లాలగే నాలుగు, వానిన్దు హసరంగా మూడు వికెట్లు పడగొట్టారు.