ఇక నో వెయిటింగ్.. సిగ్నలింగ్‌ వ్యవస్థలో కొత్త విధానం

మనం చేరాల్సిన రైల్వేస్టేషన్ మరికొన్ని కిలోమీటర్ల దూరంలో ఉంటుంది. అప్పటి వరకూ వేగంగా సాగిన మన రైలు ప్రయాణం అక్కడి నుంచి నెమ్మదిస్తుంది. సముద్రంలో నుంచి ఉవ్వెత్తున ఎగసి వచ్చిన అల.. తీరానికి సమీపించినప్పుడు నెమ్మదించిన మాదిరిగా మన రైలు కూడా.. నెమ్మదిగా కదలడం మొదలెడుతుంది. కొన్నిసార్లు ప్రధాన రైల్వేస్టేషన్‌కు కిలోమీటర్ల దూరంలోని చిన్న స్టేషన్లలో రైళ్లను ఆపివేస్తుంటారు. కారణంగా సిగ్నలింగ్. ప్రధాన రైల్వేస్టేషన్‌ నుంచి సిగ్నల్ రాక.. ఆ రైల్వేస్టేషన్‌కు కిలోమీటర్ల దూరంలోనే రైళ్లో వేచి చూడాల్సిన పరిస్థితి ఉంటుంది. అలాగే అదే రైలు ఎక్కాల్సిన వారు కూడా రైలెప్పుడొస్తుందో అంటూ ప్లాట్ ఫామ్‌ మీద నిరీక్షిస్తూ ఉంటారు. అయితే ఇకపై ఈ ఇబ్బంది తప్పనుంది.

సిగ్నల్‌ కోసం రైల్వేస్టేషన్‌కు కి.మీల దూరంలోనే రైళ్లోనే నిరీక్షిస్తూ ఉండాల్సిన పరిస్థితి పోతుందని గుంతకల్లు రైల్వే డివిజన్ మేనేజర్ చంద్రశేఖర్ గుప్తా చెప్తున్నారు. గుంతకల్లు రైల్వే డివిజన్‌లో కొత్త ఆటోమేటిక్ సిగ్నలింగ్ వ్యవస్థను అందుబాటులోకి తెస్తున్నట్లు తెలిపారు. ఈ వ్యవస్థను పూర్తి స్థాయిలో అందుబాటులోకి తెస్తే ఇలా రైల్వేస్టేషన్‌కు కిలోమీటర్ల దూరంలోనే రైళ్లల్లో వేచి ఉండాల్సిన పరిస్థితి, అలాగే రైళ్ల కోసం రైల్వేస్టేషన్లలో నిరీక్షించాల్సిన అవసరం ఉండదని తెలిపారు. నూతన సిగ్నలింగ్‌ వ్యవస్థపై అవగాహన కల్పించేందుకు పుస్తకాలను శనివారం ఆవిష్కరించారు. ఈ పుస్తకాల ద్వారా లోకో పైలెట్లు, అసిస్టెంట్ పైలెట్లకు కొత్త సిగ్నలింగ్ వ్యవస్థపై అవగాహన కల్పించనున్నారు.

మరోవైపు ప్రస్తుతం రైల్వేస్టేషన్ నుంచి ఓ రైలు బయల్దేరి పూర్తిగా స్టేషన్ దాటిన తరువాతనే మరో రైలు రావడానికి అనుమతిస్తారని గుంతకల్లు రైల్వే డీఆర్ఎం తెలిపారు. కొత్త సిగ్నల్‌ వ్యవస్థ ద్వారా ఒకదాని వెనుక ఒకటి అన్నట్లుగా రైళ్లను నడిపే అవకాశం ఉంటుందని వివరించారు. దీంతో రైలు ప్రయాణికులు గంటల తరబడి రైల్వే స్టేషన్లలో నిరీక్షించాల్సిన పరిస్థితి ఉండదన్నారు. ఈ ఆటోమేటిక్ సిగ్నలింగ్ వ్యవస్థను గుంతకల్లు డివిజన్‌లోని గుంతకల్లు - మొలగవల్లి స్టేషన్ల మధ్య ఏర్పాటు చేశారు. ఆ తర్వాత అంచెలవారీగా గుంతకల్లు రైల్వే డివిజన్‌ అంతటా ఈ వ్యవస్థను అందుబాటులోకి తెచ్చేందుకు రైల్వే శాఖ అధికారులు ప్రయత్నిస్తున్నారు.