సీతాకోక చిలుకను చంపి శరీరంలోకి ఇంజెక్ట్ చేసుకున్న బాలుడు

బ్రెజిల్‌లోని విటోరియా డా కాన్క్విస్టాకు చెందిన 14 ఏళ్ల డేవి నూన్స్ మెరీరా.. తరచుగా సోషల్ మీడియాను ఫాలో అవుతాడు. ఈక్రమంలోనే యూట్యూబ్‌లో ఓ ఛాలెంజ్ గురించి చూశాడు. దాన్ని తాను కూడా అనుసరించాలనుకున్నాడు. ఈ క్రమంలోనే ఓ సీతాకోక చిలుకను పట్టుకుని దాన్ని చంపాడు. ఆపై దాన్ని నలిపేసి.. ఓ గ్లాసులో నీళ్లు తీసుకుని దాంట్లో వేశాడు. ఆపై వాటిని సిరంజిలోకి తీసుకుని శరీరంలోకి ఇంజెక్ట్ చేసుకున్నాడు. అయితే ఇలా చేసుకున్న తర్వాత కాసేపు ఆరోగ్యంగానే ఉన్న డేవి నూన్స్ మెరీరాకు కొన్ని గంటల తర్వాత వాంతులు అవ్వడం ప్రారంభం అయింది.

చాలా సేపటి వరకు అతడు వాంతులు చేసుకుంటూనే ఉండగా.. భయపడ్డ తల్లిదండ్రులు వెంటనే అతడిని శాంటా మార్సెలినా ఆస్పత్రికి తరలించారు. ఈక్రమంలోనే వైద్యులు పరీక్షించి తీవ్రమైన నొప్పితో బాధ పడుతున్న బాలుడికి ఇన్ఫెక్షన్ సోకినట్లు గుర్తించారు. అసలీ ఇన్ఫెక్షన్ ఎలా వచ్చిందో తెలుసుకోవడానికి బాలుడు ఏమేం తిన్నాడో చెప్పాలని తల్లిదండ్రులను అడిగారు. వాళ్లు ఇంట్లో తిన్నవన్నీ చెప్పగా.. ఆపై బాలుడి వద్దకు వెళ్లి ప్రశ్నించారు. ఈక్రమంలోనే తాను ఓ ఇంజెక్షన్ చేసుకున్నట్లు వెల్లడించాడు.

ముఖ్యంగా సీతాకోక చిలుక అవశేషాలను శరీరంలోకి ఇంజెక్ట్ చేసుకున్నట్లు చెప్పగా వైద్యులు.. వెంటనే పోలీసులకు సమాచారం అందించారు. దీనిపై కేసు నమోదు కాగా వైద్యలు మాత్రం బాలుడిని కాపాడేందుకు చేయాల్సిన పనులన్నీ చేశారు. వారం రోజుల పాటు 24 గంటలూ అందుబాటులో ఉంటూ మెరుగైన వైద్య చికిత్సలు అందించారు. కానీ దురదృష్టవశాత్తు బాలుడు ప్రాణాలు కోల్పోయాడు. దీంతో కేసును మరింత సీరియస్‌గా తీసుకున్న పోలీసులు అతడు ఎవరిని చూసి ఇలాంటి ఛాలెంజ్ స్వీకరించాడో తెలుసుకనే పనిలో పడ్డారు.

అతడి ఫోన్, ల్యాప్‌టావ్ వంటివి చెక్ చేసేందుకు ఇంటికి వెళ్లగా.. బాలుడి మంచం మీద సిరంజి దొరికింది. అందులో ఇంకా సీతాకోక చిలుక అవశేషాలు ఉండడాన్ని కూడా గుర్తించారు. మరోవైపు బిడ్డ మృతితో తల్లిదండ్రులు కన్నీరుమున్నీరు అవుతున్నారు. ఎవరో చేసిన పిచ్చి ఛాలెంజ్ వల్ల తమ కుమారుడు ప్రాణాలు కోల్పోయాడంటూ కన్నీళ్లు పెడుతున్నారు. అలాగే బాధ్యులపై కఠిన చర్యలు తీసుకోవాలంటూ పోలీసులను కోరుతున్నారు.