ఏపీ అసెంబ్లీ సమావేశాలకు వెళ్ధాం..! వైసీపీ అధినేత కీలక నిర్ణయం

ఆంధ్రప్రదేశ్ అసెంబ్లీ బడ్జెట్ సమావేశాలకు రంగం సిద్ధమైంది. సోమవారం (ఫిబ్రవరి 24) నుంచి ఏపీ అసెంబ్లీ సమావేశాలు ప్రారంభం కానున్నాయి. ఈ సమావేశాల్లోనే 2025-26 ఆర్థిక సంవత్సరానికి సంబంధించిన బడ్జెట్‌ను ఏపీ ప్రభుత్వం ప్రవేశపెట్టనుంది. ఫిబ్రవరి 24వ తేదీ ఉదయం 10 గంటలకు శాసనసభ, శాసనమండలిని ఉద్దేశించి గవర్నర్ అబ్దుల్ నజీర్ ప్రసంగం ఉంటుంది. ఆ తర్వాత బీఏసీ సమావేశం నిర్వహిస్తారు. బీఏసీ సమావేశంలో అసెంబ్లీ సమావేశాలను ఎన్ని రోజులు పాటు నిర్వహించాలనే దానిపై చర్చించి ఓ నిర్ణయం తీసుకుంటారు. 24వ తేదీ గవర్నర్ ప్రసంగం, 25న గవర్నర్ ప్రసంగానికి ధన్యవాదాలు తెలిపే కార్యక్రమం ఉంటుంది. ఆ తర్వాత రెండు రోజులు సెలవులు ఉండే అవకాశాలు ఉన్నాయి.

ఫిబ్రవరి 26వ తేదీన మహాశివరాత్రి పండుగ వచ్చింది. అలాగే ఫిబ్రవరి 27న ఎమ్మెల్సీ ఎన్నికలు నిర్వహించనున్నారు. ఈ నేపథ్యంలో ఆ రెండు రోజులు ఏపీ అసెంబ్లీ సమావేశాలు నిర్వహించకపోవచ్చని తెలుస్తోంది. ఫిబ్రవరి 28వ తేదీన ఆంధ్రప్రదేశ్ బడ్జెట్ ప్రవేశపెట్టనున్నారు. అందులో భాగంగా ఫిబ్రవరి 28 ఉదయం 9 గంటలకు ఏపీ కేబినెట్‌ సమావేశం కానుంది. ఈ సమావేశంలో ఏపీ బడ్జెట్‌కు మంత్రివర్గం ఆమోదం తెలపనుంది. అదే రోజు ఆర్థిక మంత్రి పయ్యావుల కేశవ్ ఏపీ అసెంబ్లీలో బడ్జెట్ ప్రవేశపెట్టనున్నారు. మరోవైపు అసెంబ్లీ సమావేశాల నేపథ్యంలో ఆదివారం.. అసెంబ్లీ స్పీకర్ అయ్యన్నపాత్రుడు అధికారులతో సమీక్షా సమావేశం నిర్వహించనుున్నారు.

అసెంబ్లీ సమావేశాలకు వైఎస్ జగన్!

మరోవైపు ఆంధ్రప్రదేశ్ అసెంబ్లీ బడ్జెట్ సమావేశాల నేపథ్యంలో వైసీపీ అధినేత వైఎస్ జగన్ మోహన్ రెడ్డి కీలక నిర్ణయం తీసుకున్నట్లు తెలిసింది. అసెంబ్లీ బడ్జెట్ సమావేశాలకు హాజరుకావాలని వైఎస్ జగన్ నిర్ణయించినట్లు సమాచారం. అధినేత నిర్ణయానికి అనుగుణంగా వైఎస్ జగన్‌తో పాటుగా వైసీపీ ఎమ్మెల్యేలు కూడా సోమవారం అసెంబ్లీకి హాజరుకానున్నట్లు తెలిసింది. సోమవారం ఉభయసభలను ఉద్దేశించి గవర్నర్ ప్రసంగం ఉండనుంది. గవర్నర్ ప్రసంగానికి వైఎస్ జగన్, వైసీపీ ఎమ్మెల్యేలు హాజరుకానున్నట్లు సమాచారం.