కస్టమర్లకు సడెన్ షాకిచ్చిన దిగ్గజ బ్యాంక్.. వడ్డీ రేట్లు తగ్గింపు

దేశంలోని ఐదో అతిపెద్ద ప్రైవేట్ బ్యాంకుగా సేవలందిస్తున్న ఇండస్ ఇండ్ బ్యాంక్ (IndusInd Bank) తమ కస్టమర్లకు షాకిచ్చింది. రూ.3 కోట్ల లోపు ఉండే రిటైల్ ఫిక్స్‌డ్ డిపాజిట్లపై వడ్డీ రేట్లను తగ్గించినట్లు ప్రకటించింది. ఈ మేరకు కొత్త ఎఫ్‌డీ వడ్డీ రేట్లు ఫిబ్రవరి 24, 2025 నుంచే అమలోకి వచ్చినట్లు బ్యాంక్ తన అధికారిక వెబ్‌సైట్ ద్వారా వెల్లడించింది. ఈ బ్యాంక్ ఇప్పటి వరకు జనరల్ కస్టమర్లకు అత్యధికంగా 7.99 శాతం వడ్డీ ఇస్తుండగా సీనియర్ సిటిజన్లకు 8.49 శాతం మేర వడ్డీ ఆఫర్ చేసేది. ఇప్పుడు ఈ వడ్డీ రేట్లలో కోత పెట్టింది.

వడ్డీ రేట్లు సవరించిన తర్వాత ఇప్పుడు జనరల్ కస్టమర్లకు అత్యధిక వడ్డీ రేటు 7.75 శాతంగా ఉంది. అంటే దాదాపు 24 బేసిస్ పాయింట్ల మేర వడ్డీ తగ్గింది. ఇక సీనియర్ సిటిజన్లకు సైతం 24 బేసిస్ పాయింట్లు వడ్డీ తగ్గించడంతో కొత్త గరిష్ఠ వడ్డీ రేటు 8.25 శాతానికి పడిపోయింది. వడ్డీ రేట్ల సవరణ తర్వాత ఇండస్ ఇండ్ బ్యాంకులో 7 రోజుల నుంచి 10 సంవత్సరాల ఫిక్స్‌డ్ డిపాజిట్లపై సాధారణ కస్టమర్లకు 3.50 శాతం నుంచి 7.75 శాతం వరకు వడ్డీ ఆఫర్ చేస్తోంది. ఇక సీనియర్ సిటిజన్లకు అయితే 4 శాతం నుంచి 8.25 శాతం వడ్డీ అందిస్తోంది. గరిష్ఠ వడ్డీ రేట్లు అనేవి 1 ఏడాది 5 నెలల నుంచి 1 ఏడాది 6 నెలలలోపు ఉండే డిపాజిట్లపై కల్పిస్తోంది.

ఇండస్ ఇండ్ బ్యాంక్ లేటెస్ట్ వడ్డీ రేట్లు..

7 రోజుల నుంచి 30 రోజుల మెచ్యూరిటీ టెన్యూర్ డిపాజిట్లపై సాధారణ కస్టమర్లకు 3.50శాతం వడ్డీ ఇస్తోంది.

31 రోజుల నుంచి 45 రోజుల డిపాజిట్లపై 3.75 శాతం వడ్డీ ఇస్తోంది.

46 రోజుల నుంచి 120 రోజుల వరకు ఉండే వివిధ టెన్యూర్ డిపాజిట్లపై 4.75 శాతం వడ్డీ అందిస్తోంది.

121 రోజుల నుంచి 180 రోజుల కాల పరిమితి డిపాజిట్లపై 5.85 శాతం వడ్డీ ఇస్తోంది.

211 రోజుల నుంచి 269 రోజులకు 6.10 శాతం, 270 రోజుల నుంచి 354 రోజులకు 6.35 శాతం వడ్డీ ఇస్తోంది.

355 రోజుల నుంచి 364 రోజుల వరకు 6.50 శాతం వడ్డీ అందిస్తోంది.

1 ఏడాది నుంచి 1 ఏడాది 3 నెలలు, 1 ఏడాది 3 నెలల నుంచి 1 ఏడాది 4 నెలలు, 1 ఏడాది 4 నెలల నుంచి 1 ఏడాది 5 నెలలు, 1 ఏడాది 5 నెలల నుంచి 1 ఏడాది 6 నెలలు, 1 ఏడాది 6 నెలల నుంచి రెండేళ్ల వరకు ఉండే డిపాజిట్లపై 7.75 శాతం వడ్డీ ఇస్తోంది.

2 సంవత్సరాల నుంచి 61 నెలల వరకు 7.25 శాతం వడ్డీ అందిస్తోంది.

61 నెలలు ఆపైన డిపాజిట్లపై 7 శాతం వడ్డీ ఇస్తోంది.

ఇక 5 సంవత్సరాల ట్యాక్స్ సేవింగ్స్ ఫిక్స్‌డ్ డిపాజిట్లపై 7.25 శాతం వడ్డీ ఆఫర్ చేస్తుంది.

ఆయా టెన్యూర్ డిపాజిట్లపై సీనియర్ సిటిజన్లకు 50 బేసిస్ పాయింట్లు అదనపు వడ్డీ లభిస్తుంది.