కోడి గుడ్డు తినేవారు కొన్ని తప్పుల్ని అస్సలు చేయకూడదు

మనలో చాలా మందికి గుడ్లు అంటే ఇష్టం. చాలా మంది బ్రేక్‌ఫాస్ట్‌లో గుడ్డును ఎక్కువగా తీసుకుంటారు. గుడ్డులో ప్రొటీన్లు పుష్కలంగా ఉండటంలో ఫిట్‌నెస్ ప్రియులు దీనిని ఎక్కువ తినడానికి ఇష్టపడుతున్నారు. కొంతమంది దీనిని పచ్చిగా తింటారు. మరికొందరు ఆమ్లెట్ వేసుకుని తింటారు. అయితే ఉడికించిన గుడ్లు ఆరోగ్యానికి మరింత మేలు చేస్తాయి. బ్యాచిలర్స్ అయితే గుడ్డు మీద రకరకాల ప్రయోగాలు చేస్తుంటారు. బ్యాచిలర్స్ గుడ్డుతోనే ఎక్కువ కూరలు చేసుకుంటూ ఉంటారు. అయితే, గుడ్లను వాడేటప్పుడ తెలిసో తెలియకో కొన్ని తప్పులు చేస్తుంటారు. ఆ తప్పుల వల్ల ఆరోగ్యం ప్రమాదంలో పడే అవకాశం ఉంది. గుడ్డు తినేటప్పుడు, వండేటప్పుడు చేయకూడని తప్పులేంటో తెలుసుకుందాం.

గుడ్లను అతిగా ఉడకబెట్టడం

చాలా మంది గుడ్లను ఎక్కువగా ఉడికిస్తారు. దీనివల్ల వాటి పోషకాలు చాలా వరకు పోతాయి. గుడ్డులోని పచ్చ సొన చుట్టూ ఆకుపచ్చ రంగు పొర ఏర్పడితే... గుడ్డు అతిగా ఉడికిందని అర్థం. అలాగే, పచ్చి లేదా తక్కువగా ఉడికించిన గుడ్లు తినడం కూడా పొరపాటే. ఈ పొరపాట్ల వల్ల కడుపు ఇన్ఫెక్షన్ తో అనారోగ్యానికి గురవుతారు. కనీసం 20 నిమిషాల పాటు గుడ్లను ఉడికిస్తే మంచిదంటున్నారు నిపుణులు.

గుడ్ల తాజాదనాన్ని తనిఖీ చేయకపోవడం

గుడ్లను వంట కోసం ఉపయోగిస్తున్నప్పుడు చాలా తక్కువ మంది మాత్రమే వాటి తాజాదనాన్ని తనిఖీ చేస్తారు. ఆరోగ్యకరమైనగుడ్లు తినాలనుకుంటే ఖచ్చితంగా తాజాదనాన్ని తనిఖీ చేయండి. ఎల్లప్పుడూ తాజా గుడ్లను తినండి. గుడ్డును ఎక్కువ రోజుల పాటు నిల్వ ఉంచి వండుకుంటే దాని రుచి తక్కువగా ఉంటుంది. అంతేకాకుండా అది తక్కువ పోషకాల్ని మాత్రమే అందిస్తుంది.

రిఫ్రిజిరేటర్‌లో సరిగ్గా నిల్వ చేయకపోవడం

చాలా మంది గుడ్లను రిఫ్రిజిరేటర్ డోర్‌లో స్టోర్ చేస్తారు. ఇది పూర్తిగా తప్పు. రిఫ్రిజిరేటర్ తలుపు రోజంతా తెరిచి ఉంటుంది. దీంతో డోర్‌లో ఉంచిన వస్తువుల ఉష్ణోగ్రత పెరుగుతూ, తగ్గుతూ ఉంటుంది. దీంతో గుడ్లు పాడయ్యే ప్రమాదముంది. అందుకే గుడ్లను ఓ కంటైనర్‌లో పెట్టి ఫ్రిజ్‌ లోపల ఒకే ఉష్ణోగ్రత వద్ద స్టోర్ చేయండి.

గుడ్డు కడగడం

చాలా మంది మార్కెట్ నుంచి గుడ్లు తెచ్చిన వెంటనే కడిగేస్తారు. అది పూర్తిగా తప్పు. నిజానికి, గుడ్డు మీద బాహ్య బ్యాక్టీరియా నుంచి రక్షించే సహజ పొర ఉంటుంది. మీరు దానిని నీటితో కడిగిన వెంటనే, ఈ పొర తొలగిపోతుంది. దీంతో గుడ్డు త్వరగా చెడిపోవడం ప్రారంభమవుతుంది. గుడ్లు వాడాల్సినప్పుడు మాత్రమే వాటిని కడగాలి. దీంతో దాని సహజ పొర చెక్కుచెదరకుండా ఉంటుంది. గుడ్డు త్వరగా చెడిపోదు.

గుడ్లను నేరుగా పాన్‌లోకి పగలగొట్టడం

గుడ్లను నేరుగా పాన్ లేదా వంట పాత్రలోకి పగలగొట్టకూడదు. ఎందుకంటే గుడ్డు పెంకుపై బ్యాక్టీరియా ఉంటుంది. గుడ్డులోని ఒక చిన్న కణం ఆహారంలోకి వెళ్లి ఈ బ్యాక్టీరియా కడుపులోకి చేరితే, ఇన్ఫెక్షన్ వచ్చే ప్రమాదం ఉంది. అందుకే ఒక పాత్రలో గుడ్డును పగలకొట్టి.. దానిలో పెంకులు లేకుండా ఫిల్టర్ చేసి ఆ తర్వాత వంటకు ఉపయోగించండి.

పగిలిన గుడ్లను ఉపయోగించడం

కొన్ని సార్లు మార్కెట్ నుంచి గుడ్లు తీసుకువచ్చినప్పుడు అవి కొంచెం పగిలి ఉంటాయి. అలాంటి గుడ్లను కొన్ని రోజులు నిల్వ చేస్తారు. ఆ తర్వాత వంటకు ఉపయోగించడం చేస్తుంటారు. ఇది పెద్ద పొరపాటు. ఎందుకంటే పగుళ్లు ఏర్పడిన తర్వాత బ్యాక్టీరియా గుడ్డు లోపలికి ప్రవేశిస్తుంది. ఇది ఆరోగ్యానికి ప్రమాదకరంగా మారవచ్చు.

నూనెలో వేయించడం

చాలా మంది ఉడకబెట్టిన గుడ్లను టేస్ట్ కోసం నూనెలో వేయించి.. ఆ తర్వాత కూర వండుకుంటారు. ఇలా గుడ్లను ఎక్కువ నూనెలో వేయించవద్దు. ఇలా చేయడం వల్ల గుడ్డు రుచి పెరగవచ్చేమో కానీ.. దానిలోని పోషకాలు నశిస్తాయి. ఉడకబెట్టిన గుడ్లను అలాగే కూర వండుకోండి. దీంతో.. గుడ్డులోని పోషకాలు అలాగే ఉంటాయి.