కుంభమేళా వెళ్లొస్తుండగా రోడ్డు ప్రమాదం.. ఎంపీకి తీవ్ర గాయాలు!

జార్ఖండ్‌కు చెందిన రాజ్యసభ ఎంపీ మహువా మాజీ తన కుటుంబ సభ్యులతో కలిసి రెండు రోజుల క్రితం ఉత్తర ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభమేళాకు వెళ్లారు. అక్కడే శివ నామస్మరణ చేస్తూ.. గంగ, యమున, సరస్వతీ నదులు కలిసే త్రివేణీ సంగమం వద్ద పుణ్య స్నానాలు ఆచరించారు. ఆపై అక్కడి ఆలయాలను దర్శించుకుని మంగళవారం రాత్రి ఇంటికి తిరుగు ప్రయాణం అయ్యారు. కానీ దురదృష్టవశాత్తు బుధవారం రోజు వేకువజామున వీరు వెళ్తున్న కారు రోడ్డు ప్రమాదానికి గురికాగా.. ఎంపీకి తీవ్ర గాయాలు అయ్యాయి. ఆ పూర్తి వివరాలు మీకోసం.

జార్ఖండ్ ముక్తి మోర్చా (జేఎంఎం) పార్టీకి చెందిన ఎంపీ మహువా మాజీ తన కుమారుడు, కోడలితో కలిసి రెండు రోజుల క్రితమే కుంభమేళాకు వెళ్లారు. అక్కడే పుణ్య స్నానాలు ఆచరించి, ప్రత్యేక పూజల్లో పాల్గొన్నారు. ఆపై పలు ఆలయాలను కూడా సందర్శించుకున్నారు. మంగళ వారం రోజు రాత్రి వీరు ఇంటికి తిరుగు ప్రయాణం అయ్యారు. ఈక్రమంలోనే బుధవారం రోజు వేకువ జామున 2.30 గంటలకు జార్ఖండ్‌లోని లతేహార్ ప్రాంతానికి చేరుకున్నారు.

దురదృష్టవశాత్తు అప్పుడే వీరి కారు ఆగి ఉన్న ఓ ట్రక్కును ఢీకొట్టింది. ఈక్రమంలోనే కారులో ఉన్న వారందరికీ తీవ్ర గాయాలు అయ్యాయి. ముఖ్యంగా ఎంపీ ముహవా మాజీ, ఆమె కొడుకు, కోడలికి విపరీతమైన దెబ్బలు తగిలాయి. విషయం గుర్తించిన స్థానికులు వీరిని వెంటనే స్థానికంగా ఉన్న సదర్ ఆస్పత్రికి తరలించారు. అక్కడే పరీక్షించిన వైద్యులు ఎంపీ సహా ఆమె కుటుంబ సభ్యులకు చికిత్స అందించారు. అనంతరం మెరుగైన వైద్య చికిత్స కోసం రాంచీలోని రిమ్స్ ఆస్పత్రికి తరలించినట్లు సదర్ పోలీస్ స్టేషన్ ఇంఛార్జీ దులార్ చౌడే వెల్లడించారు. అయితే ఎంపీ చేతికి పలు ఫ్రాక్చర్లు అయ్యాయని.. ప్రస్తుతం వీరి పరిస్థితి నిలకడగానే ఉందని చెప్పారు.