భార్య వేధింపులు తట్టుకోలేక మరో టెకీ ఆత్మహత్య

ఉత్తర్‌ప్రదేశ్‌లోని ఆగ్రా డిఫెన్స్ కాలనీకి చెందిన మానవ్ శర్మ అనే 35 వ్యక్తి.. తన ఇంట్లోనే ఉరివేసుకుని ప్రాణాలు తీసుకున్నాడు. మానవ్ శర్మ.. టీసీఎస్ కంపెనీలో రిక్రూట్‌మెంట్ మేనేజర్‌గా పనిచేసేవాడు. అయితే తాను ఆత్మహత్య చేసుకోవడానికి ముందు.. మానవ్ శర్మ.. తీవ్ర భావోద్వేగంతో ఒక వీడియోను రికార్డ్ చేసి.. విడుదల చేశాడు. ఆ వీడియో చూస్తే.. అతడు ఎంత నరకాన్ని అనుభవించాడో అర్థం అవుతోంది. ఆ వీడియోలో తన భార్యపై మానవ్ శర్మ.. తీవ్ర ఆరోపణలు చేశాడు. తన భార్య తనను తీవ్రంగా వేధించిందని.. ఆమె ప్రవర్తనపై కూడా తనకు అనుమానం వచ్చిందని.. కన్నీళ్లతో చెప్పాడు.

అంతేకాకుండా తన భార్య ఎప్పుడూ తనతో మంచిగా ఉండలేదని.. తరచూ దురుసుగా ప్రవర్తించేదని తన ఆవేదనను వెళ్లగక్కాడు. అయితే తాను గతంలో కూడా ఆత్మహత్య చేసుకునేందుకు ప్రయత్నించానని.. కానీ తన కుటుంబం, తల్లిదండ్రుల గురించి ఆలోచించి వెనక్కి తగ్గినట్లు చెప్పాడు. కానీ రోజురోజుకూ తన భార్య వల్ల పడుతున్న మానసిక క్షోభను తట్టుకోలేక.. చివరికి ఈ నిర్ణయం తీసుకున్నట్లు వివరించాడు. ఈ సందర్భంగా మొత్తంగా 6.57 నిమిషాల వీడియోలో.. గత కొన్నేళ్లుగా తాను పడుతున్న వేదనను పూర్తిగా వెల్లడించాడు.

ఇక ఆ వీడియోలో తన తల్లిదండ్రులకు మానవ్ శర్మ క్షమాపణలు చెప్పాడు. "మమ్మీ, డాడీ, అక్కూ.. సారీ, ఇక నేను వెళ్లిపోతున్నా” అని పేర్కొన్నాడు. అయితే సూసైడ్ వీడియోలో తన గురించి మాత్రమే కాకుండా తనలాగా వేధింపులు ఎదుర్కొంటున్న మిగితా మగాళ్ల గురించి కూడా గుర్తు చేశాడు. ఈ సమాజంలో పురుషుల రక్షణ కోసం కూడా ప్రత్యేకంగా చట్టాలు ఉండాల్సిన అవసరం ఉందని మానవ్ శర్మ నొక్కిచెప్పాడు. చాలా మంది పురుషులు కూడా చాలా ఒంటరితనాన్ని అనుభవిస్తారని.. దయచేసి ఎవరో ఒకరు మగవారి గురించి కూడా మాట్లాడాలని మానవ్ శర్మ తీవ్ర మనోవేదనతో చెప్పాడు. ఆ వీడియో చివరలో ఉరి వేసుకుని ఆత్మహత్య చేసుకున్నాడు.

దీంతో మానవ్ శర్మ తండ్రి పోలీసులకు ఫిర్యాదు ఇచ్చాడు. తన కుమారుడికి గతేడాది పెళ్లి అయిందని పేర్కొన్నాడు. ముంబైలో ఉద్యోగం చేసే మానవ్ శర్మ.. పెళ్లి తర్వాత తన భార్యను ముంబైకి తీసుకెళ్లినట్లు చెప్పాడు. ఆమె అక్కడ తరచూ తన కుమారుడితో గొడవలు పడేదని.. తమ కుటుంబాన్ని తప్పుడు కేసుల్లో ఇరికిస్తానని బెదిరించేదని ఆరోపించాడు. అంతేకాకుండా ఆమె మరో వ్యక్తితో సంబంధం పెట్టుకున్నట్లు తన కుమారుడికి అనుమానం ఉందని పేర్కొన్నాడు. కొన్ని రోజుల క్రితం మానవ్ శర్మ తన భార్యను తీసుకుని ఆగ్రాకు వచ్చాడని.. ఆ తర్వాత ఆమె తన పుట్టింటికి వెళ్లిపోయిందని తెలిపాడు. ఆ తర్వాత తమ కోడలు, ఆమె కుటుంబ సభ్యులతో కలిసి తన కుమారుడిని తీవ్రంగా బెదిరించినట్లు చెప్పాడు. దీంతో మానవ్ శర్మ తీవ్ర మానసిక ఒత్తిడికి గురై ఆత్మహత్య చేసుకున్నాడని తెలిపాడు.