నారా భువనేశ్వరిని అభినందించిన ముఖ్యమంత్రి చంద్రబాబు నాయుడు

తెలుగు రాష్ట్రాల్లో ఎన్టీఆర్ ట్రస్ట్ ఎన్నో కార్యక్రమాలు నిర్వహిస్తోంది. బ్లడ్ బ్యాంక్ ద్వారా ఎంతోమందికి రక్తదానం చేస్తోంది. అంతేకాకుండా తలసేమియా బాధితులకు కూడా సేవలు అందిస్తోంది. అయితే 28 ఏళ్ల క్రితం ప్రారంభం అయిన ఈ ఎన్టీఆర్ ట్రస్ట్ ద్వారా.. కోట్లాదిమంది బాధితులకు సహాయం అందింది. ప్రకృతి వైఫరీత్యాలు సంభవించిన సమయంలో కూడా ఎన్టీఆర్ ట్రస్ట్.. అనేక సహాయ చర్యలు చేపట్టింది. ఈ సందర్భంగానే ఎన్టీఆర్ ట్రస్ట్ తమ సేవలను మరింత విస్తరించేందుకు సిద్ధం అయింది. ఇందుకోసం విజయవాడలో ఎన్టీఆర్ ట్రస్ట్ భవన్‌ నిర్మించనున్నారు. దానికి సంబంధించి తాజాగా శంకుస్థాపన కార్యక్రమం నిర్వహించారు. ఇందులో ఎన్టీఆర్ ట్రస్ట్ మేనేజింగ్ ట్రస్టీ నారా భువనేశ్వరి సహా ట్రస్ట్ సిబ్బంది అంతా పాల్గొన్నారు.

అయితే ఈ ఎన్టీఆర్ ట్రస్ట్ భవన్ నిర్మాణ శంకుస్థాపన కార్యక్రమంలో ట్రస్ట్ మేనేజింగ్ ట్రస్టీ, తన సతీమణి నారా భువనేశ్వరిపై ముఖ్యమంత్రి నారా చంద్రబాబు నాయుడు ప్రశంసలు కురిపించారు. ఎన్టీఆర్ ట్రస్ట్ ద్వారా ఎన్నో మంచి కార్యక్రమాలు చేపడుతున్నారని ఎక్స్ వేదికగా కొనియాడారు. పేదలకు, అభాగ్యులకు సాయం అందిస్తున్న ఎన్టీఆర్ ట్రస్ట్ ఇవాళ విజయవాడలో సొంత భవన నిర్మాణానికి శంకుస్థాపన చేసుకోవడం శుభ పరిణామం అని పేర్కొన్నారు. ఈ సందర్భంగా ట్రస్ట్ మేనేజింగ్ ట్రస్టీ నారా భువనేశ్వరి, ట్రస్ట్ యజమాన్యం, దాతలను అభినందనలు తెలియజేశారు.

ఇక ఎన్టీఆర్ ట్రస్ట్ ఆధ్వర్యంలోని బ్లడ్ బ్యాంక్ ద్వారా ఎంతో మంది ప్రాణాలను నిలబెట్టారని చంద్రబాబు తెలిపారు. ఇక ఆపదలో ఉన్న వారికి సేవా కార్యక్రమాలు చేసేవారికి ఎన్టీఆర్ ట్రస్ట్ ఒక స్ఫూర్తిగా నిలుస్తోందని వివరించారు. తలసేమియా బాధిత పిల్లలను ట్రస్ట్ కంటికి రెప్పలా చూసుకుంటుందని సీఎం చంద్రబాబు ఎక్స్‌లో అభినందనల వెల్లువ కురిపించారు. ఇక ఈ కార్యక్రమంలో పాల్గొన్న నారా భువనేశ్వరి.. ట్రస్ట్ సేవలను ప్రజలకు మరింత చేరువ చేయడానికి ఇది మరో మైలురాయి అని తెలిపారు. ఎన్టీఆర్ పేరు మీద పెట్టిన ఈ ట్రస్ట్ సేవా కార్యక్రమాలు ఎప్పటికీ కొనసాగుతూనే ఉంటాయని నారా భువనేశ్వరి చెప్పారు.