ఫైనల్‌కు ముందు కివీస్‌కు షాక్.. గాయంతో స్టార్ పేసర్‌ ఔట్‌!

ఛాంపియన్స్ ట్రోఫీ 2025 ఫైనల్‌కు ముందు న్యూజిలాండ్‌కు బిగ్ షాక్ తగిలేలా ఉంది. ఆ జట్టు స్టార్ పేసర్, ఈ టోర్నీలో అత్యధిక వికెట్లు పడగొట్టిన బౌలర్‌ మ్యాట్ హెన్రీ గాయంతో బాధపడుతున్నాడు. దీంతో అతడు భారత్‌తో జరిగే ఫైనల్‌లో ఆడేది అనుమానంగా మారింది. దక్షిణాఫ్రికాతో జరిగిన సెమీ ఫైనల్‌లో హెన్రీ భుజానికి గాయమైంది. దీంతో అతడు తన పూర్తి ఓవర్ల కోటా కూడా బౌలింగ్ చేయలేదు.

దక్షిణాఫ్రికాతో మ్యాచ్‌లో ఫీల్డింగ్ చేస్తూ హెన్రీ గాయపడ్డాడు. హెన్రిచ్ క్లాసెన్ ఇచ్చిన క్యాచ్‌ను అందుకునే క్రమంలో హెన్రీ భుజానికి గాయమైంది. దీంతో అతడు మైదానాన్ని వీడాడు. అతడి గాయంపై న్యూజిలాండ్ హెడ్ కోచ్ గ్యారీ స్టీడ్ అప్‌డేట్ ఇచ్చాడు.

‘హెన్రీ విషయంలో అప్పుడే ఎలాంటి నిర్ణయం తీసుకోవడానికి తొందరపడం. ఫైనల్‌కు ఇంకా సమయం ఉంది. అప్పటివరకు అతడు కోలుకోవాలని ఆశిస్తున్నాం’ అని గ్యారీ స్టీడ్ చెప్పాడు.

అయితే, ఫైనల్ మ్యాచ్ నాటికి హెన్రీ పూర్తి ఫిట్‌నెస్ సాధించడం కష్టమే అనే అభిప్రాయాలు వ్యక్తం అవుతున్నాయి. ఇదిలా ఉండగా, ఛాంపియన్స్ ట్రోఫీలో మాట్ హెన్రీ అద్భుతంగా రాణిస్తున్నాడు. ఇప్పటివరకు నాలుగు మ్యాచ్‌ల్లో 10 వికెట్లు పడగొట్టి టోర్నీలో టాప్ వికెట్ టేకర్‌గా కొనసాగుతున్నాడు. ఈ టోర్నీ లీగ్‌ మ్యాచ్‌లో భారత్‌పై 5 వికెట్లతో హెన్రీ సత్తా చాటాడు.

ఫైనల్ మ్యాచ్‌కు హెన్రీ అందుబాటులోకి రాకపోతే, కివీస్‌కు పెద్ద లోటే. హెన్రీ మ్యాచ్ సమయానికి కోలుకోపోతే అతడి స్థానంలో ఫాస్ట్ బౌలర్ జాకబ్ డఫీకి తుది జట్టులో చోటు దక్కే అవకాశాలు ఉన్నాయి. భారత్, న్యూజిలాండ్ జట్ల మధ్య ఆదివారం ఫైనల్ మ్యాచ్ జరగనుంది. దుబాయ్ వేదికగా మధ్యాహ్నం 2.30 గంటలకు మ్యాచ్ ప్రారంభం కానుంది.

ఛాంపియన్స్ ట్రోఫీకి న్యూజిలాండ్ జట్టు:

మిచెల్ శాంట్నర్ (కెప్టెన్), మైకెల్ బ్రేస్‌వెల్, మార్క్ చాప్‌మన్, డెవాన్ కాన్వే, విల్ యంగ్, విలియమ్సన్, డేరిల్ మిచెల్, రచిన్ రవీంద్ర, గ్లెన్ ఫిలిప్స్, నాథన్ స్మిత్, టామ్ లేథమ్, విలియమ్ ఒరుర్కే, మ్యాట్ హెన్రీ, జాకబ్ డఫీ, కైల్ జెమీసన్.