మెక్సికో, కెనడాలపై సుంకాల విషయంలో వెనక్కితగ్గిన ట్రంప్

కెనడా, మెక్సికోలపై విధించిన అధిక సుంకాలను అమెరికా అధ్యక్షుడు డొనాల్డ్ ట్రంప్ తాత్కాలికంగా నిలిపివేశారు. సుంకాల దెబ్బకు స్టాక్ మార్కెట్లు కుదేలవడంతో పాటు వాణిజ్య ఉద్రిక్తతలకు దారితీయడంతో ట్రంప్ వెనక్కి తగ్గారు. వ్యాపారాలు, వినియోగదారులకు ఉపశమనం కలిగించేలా ప్రతికార సుంకాల విధిస్తూ జారీచేసిన కార్యనిర్వాహక ఉత్తర్వుల అమలను ఏప్రిల్ 2 వరకు తాత్కాలికంగా వాయిదా వేస్తున్నట్టు అమెరికా అధ్యక్షుడు ప్రకటించారు. పొరుగు దేశాలైన కెనడా, మెక్సికో సహా చైనాలపై అమెరికా అధ్యక్షుడు ట్రంప్‌ సుంకాలు విధించడం ఆయా దేశాలతో వాణిజ్య యుద్ధానికి కారణమైంది.

అమెరికా ఆటోమొబైల్ దిగ్గజాలు స్టెల్లాంటిస్, ఫోర్డ్, జనరల్ మోటార్స్‌తో చర్చల అనంతరం అమెరికా-మెక్సికో-కెనడా ఒప్పందం  కింద రవాణా చేసిన వాహనాలపై అధిక సుంకాలకు ఒక నెల పాటు మినహాయింపునకు ట్రంప్ ఆమోదించారు. అయితే, ఇప్పటికీ కెనడా, మెక్సికో నుంచి దిగుమతయ్యే వస్తువులపై సుంకాలు ఇప్పటీకీ గణనీయంగా ప్రభావితం చేస్తాయని వైట్ హౌస్ సూచించింది. కెనడా దిగుమతుల్లో దాదాపు 62% కొత్త సుంకాలకు లోబడి ఉంటాయని, ప్రధానంగా ఇంధన దిగుమతులు 10% తగ్గిన రేటుతో ఉంటాయని ఒక ప్రతినిధి పేర్కొన్నారు. దాదాపు సగం మెక్సికో దిగుమతులు USMCA పరిధిలోకి వస్తాయి. అదనపు సుంకాల నుంచి వీటికి మినహాయింపు లభిస్తుంది.

అధిక సుంకాలతో అమెరికా ఆర్థిక వృద్ధి మందగించి, ద్రవ్యోల్బణాన్ని పెంచుతాయని ఆర్థికవేత్తలు ఆందోళనలు, తన నిర్ణయం మార్కెట్ అస్థిరతను ప్రభావితం చేసిందనే వాదనలను ట్రంప్ తోసిపుచ్చారు. వాణిజ్య రక్షణవాదంపై తన వైఖరిని పునరుద్ఘాటించిన ట్రంప్.. రాబోయే రోజుల్లో మరిన్ని చర్యలు తప్పవనే సంకేతాలు ఇస్తున్నారు. ‘వచ్చేవారం మరో కీలక నిర్ణయం ఉంటుంది.. అత్యంత కీలకమైన ప్రతీకార సుంకాలు ఏప్రిల్ 2న అమల్లోకి వస్తున్నాయి’ అని ట్రంప్ వ్యాఖ్యానించారు. ‘అమెరికా ఎగుమతులపై అత్యధిక సుంకాలు విధిస్తోన్న దేశం కెనడా.. మా పాల ఉత్పత్తులపై 250 శాతం మేర పన్నులు వసూలు చేస్తోంది.. మిగతావాటిపై కూడా భారీగా వడ్డిస్తోంది’ అని పేర్కొన్నారు.

అటు, ట్రంప్‌ విధిస్తున్న సుంకాలపై కెనడా ప్రధాన మంత్రి జస్టిన్‌ ట్రూడో కీలక వ్యాఖ్యలు చేశారు. ట్రంప్‌తో బుధవారం నాటి చర్చలు నిర్మాణాత్మకంగా జరిగినప్పటికీ.. భవిష్యత్తులో కెనడా-అమెరికాల మధ్య వాణిజ్య యుద్ధం ఉండే అవకాశం ఉందని అంచనా వేస్తున్నట్లు చెప్పారు. సుంకాల అమలును నెలరోజుల పాటు వాయిదా వేయడం స్వాగతించదగిన విషయమేనని ఆయన అన్నారు. అయినప్పటికీ.. ప్రతీకార సుంకాలు విధించే ప్రణాళికలో ఎటువంటి మార్పు లేదని ట్రూడో స్పష్టం చేశారు.