మీ జుట్టు చాలా బాగుంది.. మేము మిమ్మల్ని ప్రేమిస్తున్నాం

అగ్రరాజ్యం అమెరికా అధ్యక్షుడిగా డొనాల్డ్ ట్రంప్ రెండోసారి పదవీ బాధ్యతలు చేపట్టినప్పటి నుంచి అంతరిక్షంలో చిక్కుకుపోయిన వ్యోమగాములను తిరిగి భూమ్మీదకు తీసుకు వచ్చేందుకు ఎంతగానో ప్రయత్నిస్తున్నారు. ఈక్రమంలోనే వారిద్దరి బాధ్యతను టెస్లా అధినేత ఎలాన్ మస్క్‌కు అప్పజెప్పారు. మస్క్ కూడా వారిద్దరినీ త్వరలోనే భూమ్మీదకు తీసుకురాబోతున్నారు. అయితే తాజాగా డొనాల్డ్ ట్రంప్ వ్యోమగాముల గురించి మాట్లాడారు. షాకింగ్ కామెంట్లు చేసి అందరినీ ఆశ్చర్యానికి గురి చేశారు.

ముఖ్యంగా సునీతా విలియమ్స్ జుట్టు చాలా బాగుందని, అందంగా, ధృడంగా కనిపిస్తుందని వివరించారు. అంతటితో ఆగకుండా మేము మిమ్మల్ని ప్రేమిస్తున్నామని.. త్వరలోనే మీ ఇద్దరినీ భూమ్మీదకు తీసుకు వస్తామంటూ మరోసారి వెల్లడించారు. తాజాగా ట్రంప్ చేసిన ఈ వ్యాఖ్యలు నెట్టింట తెగ వైరల్ అవుతున్నాయి. ఆ పూర్తి వివరాలు మీకోసం.

గతేడాది జూన్ 6వ తేదీన వ్యోమగాములు సునీతా విలియమ్స్, బుచ్ విల్‌మోర్‌లు రోదసిలోకి వెళ్లారు. అయితే 8 రోజుల మిషన్‌లో భాగంగా బోయింగ్ స్టార్‌లైనర్ క్యాప్సుల్‌లో అంతరిక్ష కేంద్రానికి వెళ్లారు. అయితే అదే నెల 14వ తేదీన తిరిగి భూమ్మీదకు రావాల్సి ఉండగా.. వ్యోమనౌకలో హీలియం లీకేజీ కారణంగా సాంకేతిక సమస్యలు వచ్చాయి. దీంతో వేరే వ్యోమగామి ద్వారా వారిని తిరిగి భూమ్మీదకు తీసుకు వచ్చేందుకు ప్రయత్నాలు చేశారు. కానీ అవేవీ ఫలించలేదు. దీంతో 9 నెలలుగా వారు అక్కడే ఉండిపోవాల్సి వచ్చింది.

డొనాల్డ్ ట్రంప్ అధక్షుడిగా రెండోసారి బాధ్యతలు చేపట్టిన తర్వాత వీరిని త్వరగా భూమ్మీదకు తీసుకు రావాలంటూ టెస్లా అధినేత ఎలాన్ మస్క్‌కు బాధ్యతలు అప్పగించారు. ఈక్రమంలోనే స్సేస్‌ఎక్స్‌కు చెందిన క్రూ-10 అంతరిక్ష నౌకను.. రోదసిలోకి పంపబోతున్నారు. దీంట్లో కొందరు వ్యోమగాములు అక్కడకు వెళ్లి సునీతా విలియమ్స్, బుచ్ విల్‌మోర్‌లను తీసుకురాబోతున్నారు. ఈ విషయాన్ని వ్యోమగాములే నేరుగా తెలిపారు.

తాజాగా దీనిపై స్పందిచిన డొనాల్డ్ ట్రంప్.. మేము మిమ్మల్ని ప్రేమిస్తున్నామంటూ వ్యోగాములకు తెలిపారు. తీసుకు వెళ్లడానికి వస్తున్నామని వివరించారు. అలాగే సునీతా విలియమ్స్‌ను తానూ రోజూ చూస్తున్నానని.. ఆమె జుట్టు చాలా ధృడంగా, అందంగా ఉందని చెప్పుకొచ్చారు. తానేమీ జోక్ చేయడం లేదని.. ఆమె శిరోజాలతో ఆటలాడడం లేదన్నారు. అలాగే జోబైడెన్ ప్రభుత్వం వ్యోమగాములను తిరిగి భూమ్మీదకు తీసుకు వచ్చేందుకు పెద్దగా ఆసక్తి చూపలేదని చెప్పారు.

అమెరికా చరిత్రలోనే బైడెన్ అసమర్థ అధ్యక్షుడని.. ఆయన వల్లే వ్యోమగాములు తిరిగొచ్చేందుకు ఆలస్యం అయిందని ఆరోపించారు. డ్రాగన్ స్పేస్‌షిప్ ద్వారా ఆస్ట్రోనాట్లను తీసుకువచ్చే ప్రయత్నం చేశామని.. కానీ బైడెన్ సర్కారు అందుకు అనుమతి ఇవ్వలేదని మస్క్ చెప్పినట్లు వివరించారు.