మహిళల భద్రత కోసమే శక్తి యాప్ అందుబాటులోకి తీసుకువచ్చాము

చిన్నారులపై లైంగిక దాడికి పాల్పడితే జీవితం జైలు పాలేనని డీజీపీ హరీశ్‌ కుమార్‌ గుప్తా హెచ్చరించారు. రాష్ట్రంలో గడచిన ఆర్నెల్లలో జరిగిన నాలుగు అత్యాచారాల కేసుల్లో పోలీసులు సమర్థవంతంగా చేసిన దర్యాప్తు వల్ల రేపిస్టులకు ఐదేళ్ల నుంచి పాతికేళ్ల వరకూ శిక్షలు పడ్డాయని తెలిపారు. విజయనగరం జిల్లా రామభద్రపురం పోలీసు స్టేషన్‌ పరిధిలో ఐదు నెలల పసికందుపై అత్యాచారానికి పాల్పడిన సమీప బంధువు ఎరుకన్న దొర(40)కు 25 సంవత్సరాల కఠిన కారాగార శిక్ష విధిస్తూ న్యాయస్థానం తాజాగా తీర్పు వెలువరించిందన్నారు. విశాఖలోని గంట్యాడ పోలీసు స్టేషన్‌ పరిధిలో మూడున్నరేళ్ల చిన్నారిపై లైంగిక దాడి చేసిన 31 ఏళ్ల విసినిగిరి రవికి కేవలం 134రోజుల్లో పోక్సో కోర్టు 25ఏళ్ల కఠిన కారాగార శిక్ష విధించిందని చెప్పారు. విజయగనరం జిల్లా పూసపాటిరేగ పోలీసు స్టేషన్‌ పరిధిలో ఐదేళ్ల చిన్నారిపై అఘాయిత్యానికి పాల్పడిన మైనపు హరీశ్‌(19)కు ఏడేళ్ల కఠిన కారాగార శిక్ష పడిందని పోలీస్‌ బాస్‌ తెలిపారు. విజయనగరంలో ఏడేళ్ల బాలికపై 55 ఏళ్ల ఆటోడ్రైవర్‌ అసభ్యకరంగా ప్రవర్తించి ఇబ్బంది పెట్టడంతో ఐదేళ్లపాటు జైలుపాలయ్యాడని తెలిపారు. రాష్ట్రంలో మహిళలు, చిన్నారుల భద్రతపై సమీక్షించిన పోలీస్‌ బాస్‌.. మహిళలు, చిన్నారుల రక్షణ కోసం ఐజీ ర్యాంకు అధికారి నేతృత్వంలో ‘ఉమెన్‌ అండ్‌ చైల్డ్‌ సేఫ్టీ వింగ్‌’ ఏర్పాటు చేసినట్లు చెప్పారు. ఆపదలో ఉన్న మహిళలు టోల్‌ ప్రీ నంబర్‌ 181, 112, 1098, 1093కి ఫోన్‌ చేస్తే నిమిషాల వ్యవధిలోనే పోలీసులు రక్షిస్తారని భరోసా ఇచ్చారు. వేధింపులు, నేరాల కట్టడి కోసమే శక్తి టీమ్స్‌ పని చేస్తున్నాయన్న డీజీపీ అబలలు, బాలికల భద్రత కోసం ‘శక్తి’ యాప్‌ అందుబాటులోకి తెచ్చామని అన్నారు.