మద్యం విధానాలపై అధికార, ప్రతిపక్ష సభ్యుల మధ్య మాటల యుద్ధం
Andhra Pradesh Telugu | Suryaa Desk | Published : Wed, Mar 12, 2025, 11:02 AM
మద్యం అమ్మకాలు, అక్రమాలపై మంగళవారం శాసనమండలిలో అధికార, ప్రతిపక్ష సభ్యుల మధ్య మాటల యుద్ధం నడిచింది. గత వైసీపీ ప్రభుత్వంలో మద్యం అమ్మకాల్లో ఆ పార్టీ నేతలు దోపిడీకి పాల్పడ్డారని మంత్రి కొల్లు రవీంద్ర విమర్శించారు. గత ప్రభుత్వంలో మద్యం అమ్మకాలపై ప్రభుత్వం ప్రత్యేక దర్యాప్తు బృందాన్ని(సిట్) నియమించిందని, అయితే సిట్ వేసిన రోజు సాయంత్రానికే తాడేపల్లిలో సంబంధిత ఫైళ్లను తగలబెట్టారని మంత్రి ఆగ్రహం వ్యక్తం చేశారు. దీనిపై సీఐడీ విచారణ జరుగుతోందని తెలిపారు. ఈ సందర్భంగా జోక్యం చేసుకున్న మండలిలో విపక్ష నేత, మాజీ మంత్రి బొత్స సత్యనారాయణ.. తాడేపల్లిలో మాజీ సీఎం జగన్ ఇంటి ముందు ఫైళ్లు తగులబెట్టారన్న వ్యాఖ్యలను రికార్డుల నుంచి తొలగించాలని పట్టుబట్టారు. గత ప్రభుత్వంలో అవినీతి అక్రమాలు జరిగితే విచారించి చర్యలు తీసుకోవచ్చన్నారు. ఇంట్లో ఏదో జరిగితే సీసీ టీవీ ఫుటేజ్ ఇవ్వమని అడిగితే ఇస్తారా? అని ప్రశ్నించారు. మంత్రి అచ్చెన్నాయుడు జోక్యం చేసుకుని.. షాపింగ్ కాంప్లెక్స్ వద్ద ఏదైనా ప్రమాదం జరిగితే సీసీ టీవీ ఫుటేజ్ తీసుకుంటారని, తాడేపల్లి ఘటనపై ఫుటేజ్ ఇవ్వాలని గుంటూరు ఎస్పీ మూడు నాలుగు సార్లు అడిగినా ఇవ్వలేదని పేర్కొన్నారు. బాధ్యతాయుత పదవిలో ఉన్నవారు బాధ్యతారాహిత్యంగా వ్యవహరించడం సరైంది కాదని హోంమంత్రి అనిత అన్నారు. విచారణలో భాగంగా పోలీసులు సీసీ టీవీ పుటేజ్ అడిగితే ఎవరైనా ఇవ్వాల్సిందేనన్నారు.
|
|