ఎంత ప్రయత్నించినా బరువు తగ్గలేకపోతున్నారా, ఒక్కసారి చేయండి

ఈ రోజుల్లో చాలా మంది అధిక బరువు, ఊబకాయం సమస్యలతో బాధపడుతున్నారు. ఒక వ్యక్తి ఆహారపు అలవాట్లు, చెడు జీవనశైలి అతని ఆరోగ్యంపై ప్రత్యక్ష ప్రభావాన్ని చూపుతాయి. ఆహారపు అలవాట్ల కారణంగా అధిక బరువు, బెల్లీ ఫ్యాట్ సమస్యలతో బాధపడుతున్నారు. అయితే, బరువు తగ్గడానికి చాలా మంది నానా ప్రయత్నాలు చేస్తున్నారు. కొందరు ఆహారంలో మార్పులు చేసుకుంటే.. మరికొందరు జిమ్‌లు చుట్టూ తిరుగుతున్నారు. అయితే, చాలా మందిలో ఎక్కువ మార్పు కనిపించడం లేదు. ఎన్ని ప్రయత్నాలు చేసినా బరువు తగ్గలేకపోతున్నారు.

అయితే, ఈ రోజుల్లో బరువు తగ్గడానికి 30-30-30 ఫార్ములా గురించి ఎక్కువగా మాట్లాడుకుంటున్నారు. ఈ పద్ధతి బరువు తగ్గడానికి మాత్రమే కాకుండా ఆరోగ్యానికి కూడా చాలా మేలు చేస్తుందని నిపుణులు అంటున్నారు. ఈ ఫార్ములా ఎలా పనిచేస్తుంది, దీని ఫాలో అయ్యేటప్పుడు ఎలాంటి విషయాల్ని గుర్తించుకోవాలో ఇక్కడ తెలుసుకుందాం.

30-30-30 ఫార్ములా ఏంటి?

30-30-30 ఫార్ములా అనేది మూడు విషయాలపై దృష్టి సారించే సరళమైన, నిర్మాణాత్మక పద్ధతి. ఇందులో ఉదయం నిద్రలేచిన 30 నిమిషాలలోపు 30 గ్రాముల ప్రోటీన్ తినాలి. ఆ తర్వాత 30 నిమిషాలు తక్కువ తీవ్రత కలిగిన వ్యాయామం చేయాలి.ప్రోటీన్ శరీరానికి అవసరమైన మాక్రోన్యూట్రియెంట్. ఇది జీవక్రియను పెంచుతుంది. ఆకలిని నియంత్రించడంలో సాయపడుతుంది. ఇక, వ్యాయామంలో నడక, యోగా, స్ట్రెచ్ వర్కౌట్స్, తేలికపాటి కార్డియో వ్యాయామాలు చేయాలి. ఇవి శరీరాన్ని చురుగ్గా ఉంచుతాయి. కేలరీలను బర్న్ చేయడంలో సాయపడతాయి.

బరువు తగ్గడంలో 30-30-30 ఫార్ములా ఎలా పనిచేస్తుంది?

ఉదయం నిద్ర లేచిన తర్వాత శరీరంలో జీవక్రియ మందగిస్తుంది. 30 గ్రాముల ప్రోటీన్ తినడం వల్ల జీవక్రియ వేగవంతం అవుతుంది. ఇది రోజంతా కేలరీలను బర్న్ చేసే సామర్థ్యాన్ని పెంచుతుంది. ప్రోటీన్ జీర్ణం కావడానికి ఎక్కువ సమయం పడుతుంది. ఇది మీకు కడుపు నిండిన అనుభూతిని కలిగిస్తుంది. అంతేకాకుండా అతిగా తినకుండా నిరోధిస్తుంది. దీని వల్ల కలిగే ప్రయోజనాలేంటో ఇక్కడ చుద్దాం.

కండరాలను బలంగా చేస్తుంది

కండరాలకు ప్రోటీన్ చాలా అవసరం. బరువు తగ్గే సమయంలో కండరాలు బలహీనంగా తయారయ్యే ప్రమాదముంది. కానీ పుష్కలంగా ప్రోటీన్ తినడం దీనిని నివారిస్తుంది. అలాగే, తక్కువ తీవ్రత గల వ్యాయామాలు కండరాలను టోన్ చేసి శరీర ఆకృతిని మెరుగుపరుస్తాయి.

శక్తి స్థాయిలను పెంచుతుంది

ఉదయం ప్రోటీన్ అధికంగా ఉండే అల్పాహారం తినడం వల్ల శరీరానికి శక్తి లభిస్తుంది. ఇది రోజంతా మిమ్మల్ని చురుగ్గా ఉంచడంలో సాయపడుతుంది. అంతేకాకుండా తక్కువ తీవ్రత కలిగిన వ్యాయామం శక్తి స్థాయిలను పెంచుతుంది. ఒత్తిడిని తగ్గిస్తుంది. మానసిక ప్రశాంతతను మెరుగుపరుస్తుంది.

బరువు తగ్గడాన్ని స్థిరంగా ఉంచుతుంది

30-30-30 నియమం సులభం. దీనిని చాలా కాలం పాటు పాటించవచ్చు. దీనికి చాలా కఠినమైన ఆహారం లేదా భారీ వ్యాయామం అవసరం లేదు. అందువల్ల, ఇది బరువు తగ్గడానికి ఒక స్థిరమైన పద్ధతిగా పరిగణించబడుతుంది.

30-30-30 ఫార్ములా ఫాలో అయ్యేటప్పుడు గుర్తించుకోవాల్సిన విషయాలు

* సరైన ప్రోటీన్: 30 గ్రాముల ప్రోటీన్ కోసం, గుడ్లు, పెరుగు, కాటేజ్ చీజ్, పీనట్ బటర్, ప్రోటీన్ షేక్స్ లేదా చియా విత్తనాలు వంటి ఆరోగ్యకరమైన ఆహారాల్ని తినండి. ప్రాసెస్ చేసిన ఆహారాలకు దూరంగా ఉండండి.

* వ్యాయామ తీవ్రత: తక్కువ తీవ్రత వ్యాయామం అంటే మీరు అలసిపోయే దాకా చేయడం కాదు. నడక, యోగా వంటి తేలికపాటి వ్యాయామాలు చేసుకోవచ్చు. మీకు ఏవైనా ఆరోగ్య సమస్యలు ఉంటే, వ్యాయామం ప్రారంభించే ముందు వైద్యుడిని సంప్రదించండి.

* హైడ్రేషన్: ఉదయం లేవగానే ముందుగా నీళ్లు తాగాలి. ప్రోటీన్ తిన్న తర్వాత కూడా పుష్కలంగా నీరు తాగడం కీలకం.

* ఆరోగ్యకరమైన ఆహారం: ప్రోటీన్ మీద మాత్రమే దృష్టి పెట్టే బదులు, రోజంతా సమతుల్య ఆహారం తీసుకోండి. అందులో అవసరమైన అన్ని పోషకాలు సరైన మొత్తంలో ఉండాలి. ఆహారంలో పండ్లు, కూరగాయలు, తృణధాన్యాలు, ఆరోగ్యకరమైన కొవ్వులను కూడా భాగం చేసుకోండి.

* ప్రతిరోజూ దీన్ని అనుసరించండి: ఈ నియమాన్ని ప్రతిరోజూ పాటించడానికి ప్రయత్నించండి. కానీ మీరు ఏదో ఒక రోజు అల్పాహారం మిస్ అయితే లేదా వ్యాయామం చేయకపోతే, ఒత్తిడికి గురికాకండి.

* ఈ ఫార్ములా అనేక ప్రయోజనాలను అందించినప్పటికీ, ఇది బరువు తగ్గడానికి సహాయపడుతుందని సూచించడానికి ప్రస్తుతం ఎటువంటి శాస్త్రీయ ఆధారాలు లేవు. అందువల్ల, మీకు ఏదైనా ఆరోగ్య సమస్య ఉంటే, నిపుణుడిని సంప్రదించిన తర్వాతే దాన్ని ప్రారంభించండి.