ఏపీలో కొత్త ఎయిర్‌పోర్టు.... గేమ్ ఛేంజర్ అంటూ కేంద్ర మంత్రి ట్వీట్

ఆంధ్రప్రదేశ్‌లో నూతన విమానాశ్రయాల ఏర్పాటు కోసం వేగంగా అడుగులు పడుతున్నాయి. ఏపీలో ఇప్పటికే ఏడు విమానాశ్రయాలు అందుబాటులో ఉన్నాయి. అయితే వీటి సంఖ్యను 14కు పెంచి ఆంధ్రప్రదేశ్ రాష్ట్రాన్ని లాజిస్టిక్‌ హబ్‌గా మార్చాలని ఏపీ ప్రభుత్వం భావిస్తోంది. ఈ క్రమంలోనే ఏపీలో కొత్త ఎయిర్‌పోర్టులు ఏర్పాటు చేయడంపై కేంద్రానికి ప్రతిపాదనలు పంపింది. కేంద్రం కూడా ఈ ప్రతిపాదనలపై సానుకూలత వ్యక్తం చేసిన సంగతి తెలిసిందే. ఈ క్రమంలోనే అమరావతి, శ్రీకాకుళంలో గ్రీన్‌ఫీల్డ్ ఎయిర్‌పోర్టులు ఏర్పాటు చేసే దిశగా అడుగులు పడుతున్నాయి. ఈ గ్రీన్‌ఫీల్డ్ ఎయిర్‌పోర్టుల ఏర్పాటు విషయంలో టెక్నికల్, ఎకనమికల్ ఫీజబులిటీ రిపోర్టు తయారీ కోసం ఇటీవల కన్సల్టెన్సీలను కూడా ఆహ్వానించారు.

ఈ క్రమంలోనే శ్రీకాకుళం గ్రీన్‌ఫీల్డ్ ఎయిర్‌పోర్టు ఏర్పాటుపై కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు ఆసక్తికర ట్వీట్ చేశారు. శ్రీకాకుళం ఎంపీగా, పౌర విమానయాన శాఖ మంత్రిగా శ్రీకాకుళం విమానాశ్రయం కల సాకారమవుతున్నందుకు గర్విస్తున్నానంటూ రామ్మోహన్ నాయుడు ట్వీట్ చేశారు. రాష్ట్రంతో పాటుగా కేంద్రంలోని సమర్ధవంతమైన నాయకత్వంతో సవాళ్లను అధిగమించి, మౌలిక సదుపాయాలను మెరుగు పరుస్తున్నట్లు వివరించారు. విమానాశ్రయం ఏర్పాటుతో ఇక్కడ ఆర్థిక వ్యవస్థ బలపరచడంతో పాటు ప్రజలకు కనెక్టివిటీని మెరుగుపరచడంలో ఈ విమానాశ్రయం గేమ్ ఛేంజర్‌గా మారుతుందని రామ్మోహన్ నాయుడు విశ్వాసం వ్యక్తం చేశారు.

మరోవైపు భోగాపురం అంతర్జాతీయ విమానాశ్రయానికి సమీపంలో శ్రీకాకుళం జిల్లాలో మరో విమానాశ్రయం ఏర్పాటు చేయాలని ఆంధ్రప్రదేశ్ ప్రభుత్వం నిర్ణయించింది. అందులో భాగంగానే ఆంధ్రప్రదేశ్‌ విమానాశ్రయ అభివృద్ధి సంస్థ.. విమానాశ్రయం ఏర్పాటుపై సాంకేతిక, ఆర్థిక అంశాల సాధ్యాసాధ్యాలపై నివేదిక రూపకల్పన కోసం కన్సల్టెన్సీలను ఇటీవల ఆహ్వానించింది. ఇందుకోసం బిడ్లను పిలిచింది. అలాగే బిడ్లు దాఖలు చేసేందుకు సమయం ఇచ్చింది. ఎయిర్‌పోర్టుల నిర్మాణానికి అనువైన ప్రదేశాన్ని గుర్తించడంతో పాటుగా.. అక్కడ వ్యాపారాభివృద్ధి అవకాశాలు ఎంతమేరకు ఉన్నాయనే దానిపై ఈ కన్సల్టెన్సీలు సాంకేతిక, ఆర్థిక అంశాలపై సాధ్యాసాధ్యాలను నివేదించనున్నాయి. ఆ నివేదిక ప్రకారం ప్రభుత్వాలు కొత్త విమానాశ్రయాల ఏర్పాటుపై నిర్ణయం తీసుకునే అవకాశం ఉంది.