ఇన్‌స్టాగ్రామ్‌లో లైవ్ పెట్టి ఉరివేసుకున్న భర్త.. విడ్డూరం చూసిన భార్య, అత్త

ఇదెక్కడి శాడిజంరా అయ్యా.. సాటి మనిషి, అందులోనూ ఎన్నో నెలల పాటు కలిసి ఉన్న వ్యక్తి చనిపోతుంటే చోద్యం చూస్తూ ఉన్నారు తప్పా, కనీసం వద్దని వారించడమో, కాపాడటమో చేయలేదు. మధ్యప్రదేశ్‌లో జరిగిన ఈ ఘటన విస్మయం కలిగిస్తోంది. కనీస మానవత్వం చూపని వారిని చూస్తే ఒళ్లు గగుర్పొడుస్తుంది. అసలు విషయం ఏమిటంటే..?

ఇది కూడా ఓ భార్యా బాధితుడి వ్యథే. భార్య, అత్త వేధింపులు భరించలేక ఆత్మహత్యకు పాల్పడ్డ ఓ పూజారి దీనగాథ ఇది. మధ్యప్రదేశ్‌ రేవా జిల్లాలోని అమా నౌధియా గ్రామానికి చెందిన శివ ప్రకాష్ త్రిపాఠి ఓ పూజారి. ఛత్తీస్‌గఢ్‌లోని వార్దాలోని ఓ ఆలయంలో పూజారిగా సేవ చేశాడు. కాగా, రోడ్డు ప్రమాదంలో కాలికి తీవ్ర గాయం అయింది. ఊతకర్ర లేనిది నడవలేని పరిస్థితి దీంతో అతను తన స్వగ్రామానికి తిరిగి వచ్చేశాడు.

26 ఏళ్ల శివ ప్రకాష్ త్రిపాఠికి రెండేళ్ల క్రితం ప్రియా శర్మతో వివాహం జరిగింది. రోడ్డు ప్రమాదం జరగడంతో వైవాహిక సమస్యలు తలెత్తాయి. ఈ క్రమంలోనే భార్య మరో వ్యక్తితో చనువుగా ఉండటం మొదలైంది. ఇది గమనించిన త్రిపాఠికి తనకు నచ్చజెప్పేందుకు ప్రయత్నించాడు. కానీ ప్రియ శర్మ ఎంతకీ తన పద్ధతి మార్చుకోలేదు సరికదా.. భర్తను వదిలేసింది. పసి బిడ్డతో కలిసి పుట్టింటికి వెళ్లిపోయింది.

భార్యను తిరిగి ఇంటికి తీసుకువచ్చేందుకు త్రిపాఠి చాలా సార్లు అత్తింటికి వెళ్లి నచ్చజెప్పే ప్రయత్నం చేశాడు. కానీ ప్రియ శర్మ ఒప్పుకోలేదు, అత్త కూడా అడ్డుపడింది. ఇటీవలి మరోసారి త్రిపాఠి అత్తింటికి వెళ్లి నచ్చజెప్పే ప్రయత్నం చేశాడు. భార్యను, అడ్డుపడుతున్న అత్తను ప్రాధేయపడ్డాడు. వారు అతడ్ని తీవ్రంగా అవమానించడంతో పాటు చేయి చేసుకున్నారు. మానసికంగా ఎంతో కుమిలిపోయిన పూజారి త్రిపాఠి ఇంటికి తిరిగి వచ్చాడు. తన గదిలోకి వెళ్లి లాక్ చేసుకున్నాడు. ఇన్‌స్టాగ్రామ్ లైవ్‌లో ఉరి వేసుకుని ఆత్మహత్యకు పాల్పడ్డాడు.

తను ఉరి వేసుకుని ఆత్మహత్యకు పాల్పడటాన్ని త్రిపాఠి ఇన్‌స్టాగ్రామ్‌ లైవ్‌ పెట్టాడు. దానిని త్రిపాఠి భార్య, ఆమె తల్లి కలిసి వీక్షించారు కూడా. కానీ త్రిపాఠిని వారించలేదు, ఆపే ప్రయత్నం కూడా చేయలేదు. చివరకు త్రిపాఠి కుటుంబ సభ్యులు గమనించి పోలీసులకు సమాచారం ఇచ్చారు. దీంతో అతడి ఆత్మహత్యపై కేసు నమోదు చేశారు. భార్య ప్రియ, ఆమె తల్లిని పోలీసులు అరెస్టు చేసి కస్టడీకి తరలించారు. ప్రియకు మరో వ్యక్తితో వివాహేతర సంబంధం ఉందని దర్యాప్తులో తెలుసుకున్నారు. ఈ కేసుపై మరిన్ని వివరాలు సేకరిస్తున్నారు.