అమ్మాయిల గొంతెమ్మ కోర్కెలకు అడ్డూ అదుపు లేదా,,అమెరికాలో పెళ్లికాని ప్రసాదుల బాధ..

కళ్యాణమొచ్చినా? కక్కొచ్చినా? ఆగదు అంటారు. ఈ కాలంలో పెద్దగా కష్టపడకుండానే కక్కొస్తోంది కానీ.. కళ్యాణం అంటే మాత్రం ఏళ్లకు ఏళ్లు ఎదురుచూడాల్సొస్తుంది. కాలం మారిందో.. జ్ఞానం పెరిగిందో తెలియదు. పెళ్లికి లెక్కలు మాత్రం పూర్తిగా మారిపోయాయి. అమెరికాలో పేరున్న కంపెనీల్లో పెద్ద పెద్ద ప్రాజెక్ట్స్ చిటికెలో చేసి పడేసే మన భారతీయ కుర్రాళ్లు.. పెళ్లి ప్రాజెక్టును మాత్రం డీల్ చేయలేకపోతున్నారు. ఇండియాలో మన అమ్మాయిల కోరికలు చిట్టా చూసి.. అమెరికా అందగాళ్లు వెక్కివెక్కి ఏడుస్తున్నారట. మరేం చేస్తారు పాపం అక్కడ ఆరంకెల జీతం, సొంత ఇల్లు, వాకిలీ ఉన్నా అమ్మాయిలు వారిని రిజెక్ట్ చేస్తున్నారంట. అంతా బాగానే ఉన్నా ఎందుకు నో చెప్తున్నారు... కారణమేంటి ఈ వీడియోలో తెలుసుకుందాం రండి...

1980 వ దశకం వరకు అబ్బాయిలకు ప్రభుత్వ ఉద్యోగమో, లేక బ్యాంక్ జాబో ఉంటే కళ్లకద్దుకుని కట్నం ఇచ్చి మరీ కన్యాదానం చేసేవారు అమ్మాయి తల్లిదండ్రులు. కానీ, 90లు వచ్చేసరికి గాలి అమెరికా వైపుకు వీయడం మొదలుపెట్టింది. ఇండియాలోనే ఉండే పెద్ద ఉద్యోగం చెసేవాడికంటే అమెరికా భర్త అయితే హుందాగా ఉంటుందనే ఆలోచన మొదలైంది. దీంతో ఎన్నారై సంబంధాలకి గిరాకీ పెరిగింది. కట్నాలు కూడా దానికి తగ్గట్టే ఉండేవి. క్రమంగా రోజులు మారుతూ వచ్చాయి. “మంది ఎక్కువైతే మజ్జిగ పలచన” అంటారుగా.. అలా వీధికొక పిల్లాడు అమెరికాలో ఉండటం వల్ల వారి డిమాండ్ ఢమాలున పడిపోయింది. కేవలం ఎన్నారై స్టేటస్ ఉంటే సరిపోదు, అబ్బాయికి ఆస్తిపాస్తులుంటేనే పెళ్లికి ఒప్పుకునే అమ్మాయిలు బయలుదేరారు.

పైగా ఈ రోజుల్లో అమ్మాయిలూ బాగానే చదువుకుంటున్నారు. ఇక అమ్మాయిలను ఆకట్టుకోడానికి అబ్బాయిలు ఎంతో ఎక్కువగా ఏదో చేయాల్సి వస్తోంది. దీంతో మంచి అమ్మాయి దొరికితే చాలు.. కట్నాలక్కర్లేదనే రోజులు వచ్చాయి. ఇంకేముంది అమ్మాయిలందరూ మంచోళ్లే కదా.. మరి మేలిమి బంగారాలు ఊరికే దొరికేస్తారా? అందుకే, ఎంత తిన్నా తరగని ఆస్తి ఉంటేనే పెళ్లి చేసుకుంటామని నిర్మొహమాటంగా చెప్పేస్తున్నారు. ఇంకా కన్యాశుల్కం అడగట్లేదు సంతోషించండి

తెలియని వాళ్లకి ఇదంతా అతిశయోక్తిగా ఉండొచ్చు కానీ, అబ్బాయిల పెళ్లిళ్ల కోసం వధువుని వెతుక్కుంటూ మ్యాట్రిమోనీ సైట్లల్లో తొంగిచూసే తల్లిదండ్రులకి కళ్లు బైర్లు కమ్ముతున్నాయి. తమ కొడుకు అమెరికాలో H-1B Visa మీద ఉంటూ ఉద్యోగం చేసుకుంటున్నాడని చెబితే చాలు అమ్మాయిలు క్యూ కడతారు అనుకునే వాళ్లకి షాక్ మీద షాక్ తగులుతుంది. ఆరేడేళ్లు పది, ఇరవై మంది సంబంధాలు చూసినా ఒక్కటీ సెట్ అవ్వట్లేదు.

ఎందుకంటే.. కేవలం అమెరికాలో ఉద్యోగం సరిపోదంటున్నారు అమ్మాయిలు. అమెరికాతో పాటు స్వదేశంలోనూ సొంత ఇళ్లు ఉండాలి. లేదా తక్కువలో తక్కువ 10-15 ఎకరాల పొలమైనా ఉండాలట. అయితే..ఇలా డిమాండ్ చేస్తున్న మధ్యతరగతి అమ్మాయిల తల్లిదండ్రుల్లో చాలామందికి సొంత ఫ్లాట్ కూడా లేదు అనేది ఇక్కడ కఠిన వాస్తవం.

ఇక కొద్దో గొప్పో ఆస్తి ఉండి, అందచందాలు మెండుగా ఉంటే ఇక ఆ అమ్మాయిల కోరికలు అన్నీ ఇన్నీ కావు. కోట్లల్లో ఆస్తులు, విల్లాలు, అమెరికాలో టాప్ యూనివెర్సిటీ బ్యాక్ గ్రౌండ్ ఉండి టాప్ లెవెల్లో జాబ్ ఉన్న అబ్బాయిలు మాత్రమే కాకుండా, కచ్చితంగా గ్రీన్ కార్డ్ వాళ్లు కావాలని కోరుకుంటున్నారు. ఆ రేంజ్ అబ్బాయిలు కూడా ఇలాంటి వాళ్ల కోసం వెతుక్కుని వచ్చి పోటీ పడి పెళ్లిళ్లు చేసుకుంటున్నారు.

మధ్యతరగతి కుటుంబంలో పుట్టి పెరిగి, ప్రతిభతో విదేశాలకు వెళ్లి చదువుకున్నారు. జాబ్ కొట్టారు. అలాగే, వారి ఆస్తులూ వారే సంపాదిస్తారు అని చెప్పినా వినే పరిస్థితుల్లో లేరట అమ్మాయిలు. వీ వాంట్ గ్యారంటీడ్ లైఫ్ అంటున్నారు. ఇక కొంతమంది అమ్మాయిల తల్లిదండ్రులు సంబంధం వెతికేటప్పుడే వాట్సాప్ గ్రూపుల్లో, మెట్రిమోనిల్లో Looking for a partner with a Green Card only. అని మెన్షన్ చేస్తున్నారు.... అంటే గ్రీన్ కార్డు ఉన్నవారికి తప్పా ‘ మిగితావారికి ఎ-క్లాస్ అమ్మాయిలు దొరికే పరిస్థితి ఉండదని ఇండియన్ మ్యారేజ్ మార్కెట్లో.

ఇక ఇప్పుడు పరిస్థితి మరీ కఠినంగా మారుతోంది. ట్రంప్ రెండోసారి అధ్యక్షుడిగా ప్రమాణస్వీకారం చేసిన తర్వాత అమెరికాలో సీన్ మారిపోయింది. హెచ్ 1 బీ వీసా పైన ఆంక్షలు, సవరణలు పెరుగుతున్నాయి. అలాగే టాప్ యూనివర్సిటీల్లో సీట్ పొంది మెరిట్లో పాసైన విద్యార్థులకి మాత్రం సత్వరం గ్రీన్ కార్డ్ ఇచ్చేస్తానంటున్నారు. ఈ పరిస్థితుల్లో అబ్బాయిలకు పెళ్లిళ్లయేదెలా?

ఈ పరిస్థితిని దాటాలంటే అమెరికాని వదిలేసి మరో దేశాన్ని వెతుక్కోవాలేమో భారతీయ యువకులు. అలా అనుకుందామనుకున్నా అమెరికా తర్వాత డిమాండ్ ఉన్న దేశం కెనెడా. అక్కడ జాబ్ మార్కెట్ అమెరికా అంత స్ట్రాంగ్ కాదు. ఆ తర్వాత యూకే. అది ఆల్రెడీ ఇబ్బందుల్లో ఉంది. అసలక్కడ చదివిన ఏ భారతీయుడైనా తిరిగి ఇంటికొస్తున్నాడే తప్ప అక్కడ జాబ్ పొందడం చాలా కష్టంగా ఉంది. ఇక మిగిలింది ఆస్ట్రేలియా. అక్కడ కూడా జాబ్ వీసాలు కఠినమయ్యాయి.

పోనీ.. అమ్మాయిలే పెద్ద మనసు చేస్కుని కాస్త కాంప్రమైజ్ అయితే అబ్బాయిలకి పెళ్ళిళ్లు ఈజీగా అవుతాయా అంటే.. అదీ చెప్పలేం. ఎందుకంటే మారిన సినారియోలో ఇండియాలో నిరుద్యోగులు పెరిగే అవకాశాలున్నాయి. కొద్దో గొప్పో ఉద్యోగాలుంటేనే ఇక్కడ పరిస్థితి కష్టంగా ఉంది, ఇక ఉద్యోగం లేని అబ్బాయిల్ని చేసుకునేదెవరు? అందుకని అమెరికాలో స్థిరపడాలి అనుకునేవారికి అవకాశాలు పెరగొచ్చు.

అయినా.. అమ్మాయిలు.. కోట్లున్న ప్రతి మగాడు మంచోడు కాదు.. ఆస్తులు లేని అబ్బాయిలంతా వేస్ట్ అనీ కాదు.. బళ్లు ఓడలు.. ఓడలు బళ్లు అవుతాయి. మీరు అడుగు పెట్టాక వారే సెటిల్ అవ్వొచ్చు.. మరీ కమర్షియల్ అవ్వకుండా.. కామన్ సెన్స్ ఉన్న అబ్బాయిలకు ఓటేసి జీవితమిచ్చేయండి మరి