మరోసారి రాహుల్ గాంధీ అమెరికా పర్యటన

లోక్‌సభలో ప్రతిపక్ష నేత, కాంగ్రెస్ అగ్రనేత రాహుల్‌ గాంధీ మరోసారి అమెరికా పర్యటనకు సిద్ధమైనట్లు సమాచారం. రాహుల్ గాంధీ అమెరికా టూర్ గురించి అధికారిక సమాచారం బయటికి రానప్పటికీ హస్తం పార్టీ వర్గాలు మాత్రం చర్చించుకుంటున్నాయి. దీంతో ఈ విషయాలను నేషనల్ మీడియా వెల్లడించింది. అమెరికా పర్యటనలో భాగంగా ప్రవాస భారతీయులను, స్టూడెంట్స్‌తో రాహుల్ గాంధీ సమావేశం కానున్నట్లు కాంగ్రెస్ వర్గాలు పేర్కొంటున్నాయి. అయితే రాహుల్ అమెరికా పర్యటన ఎన్నిరోజులు ఉంటుంది అనేది మాత్రం ఇంకా తెలియరాలేదు.

ఏప్రిల్‌ 19వ తేదీ నుంచి రాహుల్‌ గాంధీ అగ్రరాజ్యంలో పర్యటించనున్నట్లు ఆ పార్టీ వర్గాల్లో చర్చ జరుగుతోంది. అమెరికా టూర్‌లో భాగంగా బ్రౌన్‌ యూనివర్శిటీని రాహుల్ గాంధీ సందర్శించనున్నట్లు సమాచారం. బోస్టన్‌లో ఎన్ఆర్ఐలతో రాహుల్ గాంధీ.. భేటీ అయ్యే అవకాశాలు ఉన్నాయి. ఇక గతంలో రాహుల్ గాంధీ విదేశాల్లో పర్యటించిన సమయంలో చేసిన వ్యాఖ్యలు తీవ్ర దుమారం రేపిన నేపథ్యంలో ఇప్పుడు ఏం జరుగుతుందోననే చర్చ జరుగుతోంది.

మరోవైపు.. గతేడాది సెప్టెంబరులో రాహుల్‌ గాంధీ 3 రోజుల పాటు అమెరికాలో పర్యటించారు. ఆ పర్యటనలో అనేక కార్యక్రమాల్లో పాల్గొన్న రాహుల్ గాంధీ.. భారత్‌లో మత స్వేచ్ఛ, రిజర్వేషన్లకు సంబంధించిన అంశాలపై చేసిన వ్యాఖ్యలు తీవ్ర దుమారానికి కారణం అయ్యాయి. ప్రస్తుతం ప్రధానమంత్రి నరేంద్ర మోదీ ప్రభుత్వంలో భారత్‌లోని ఆదివాసీలు, దళితులు, ఓబీసీలకు దక్కాల్సిన ప్రాధాన్యం దక్కడం లేదని ఆ సమయంలో రాహుల్‌ గాంధీ వెల్లడించారు. అంతేకాకుండా అభివృద్ధిలో ఆయా వర్గాల భాగస్వామ్యం కూడా చాలా తక్కువగా ఉంటోందని పేర్కొన్నారు.

భారత్‌లో అన్ని వర్గాల వారికి సరైన, పారదర్శక అవకాశాలు దక్కే పరిస్థితులు వచ్చిన తర్వాతే దేశంలో రిజర్వేషన్ల రద్దు గురించి కాంగ్రెస్ పార్టీ ఆలోచన చేస్తుందని రాహుల్ గాంధీ అమెరికాలో వెల్లడించారు. అదే సమయంలో సిక్కులను ఉద్దేశించి రాహుల్ గాంధీ చేసిన వ్యాఖ్యలు తీవ్ర వివాదానికి దారితీశాయి. ఇక రాహుల్ గాంధీ అమెరికా పర్యటనలో చేసిన వ్యాఖ్యలను, ఆరోపణలను అధికార బీజేపీ తీవ్ర స్థాయిలో ఖండించింది.

భారతదేశ పరువును రాహుల్ గాంధీ విదేశాల్లో తీస్తున్నారని కమలం పార్టీ నేతలు తీవ్రంగా మండిపడ్డారు. సిక్కులపై రాహుల్ చేసిన వ్యాఖ్యలకు వ్యతిరేకంగా.. బీజేపీ మద్దతు గల సిక్కు గ్రూప్‌ కార్యకర్తలు ఢిల్లీలోని సోనియాగాంధీ ఇంటి ముందు తీవ్ర నిరసనలు వ్యక్తం చేశారు. ఈ నేపథ్యంలోనే తాజాగా మరోసారి రాహుల్ అమెరికా వెళ్లడంపై తీవ్ర చర్చ జరుగుతోంది. మళ్లీ భారత్‌ గురించి ఏవైనా వ్యాఖ్యలు చేస్తారా అనే సందేహాలు నెలకొన్నాయి.