భార్య చేతిలో రియల్ ఎస్టేట్ వ్యాపారి దారుణ హత్య

బెంగళూరులో ఒక రియల్ ఎస్టేట్ వ్యాపారి దారుణ హత్యకు గురయ్యాడు. భార్య, అత్త కలిసి ఈ దారుణానికి పాల్పడినట్టు పోలీసులు వెల్లడించారు. రియల్ ఎస్టేట్ వ్యాపారి లోక్‌నాథ్ సింగ్ (37) వివాహేతర సంబంధాలు, చట్టవిరుద్ధమైన వ్యాపారాలే ఈ హత్యకు దారితీసినట్టు పోలీసులు గుర్తించారు. అతడు తినే ఆహారంలో మత్తుమందు కలిపి.. ఆపై కారులో నిర్మానుష్య ప్రదేశానికి తీసుకెళ్లి గొంతు కోసి హత్య చేశారు. పోలీసుల కథనం ప్రకారం... చిక్కబనవరలో శనివారం సాయంత్రం ఒక కారులో లోక్‌నాథ్ సింగ్ మృతదేహాన్ని స్థానికులు గుర్తించి, పోలీసులకు సమాచారం అందించారు. సాయంత్రం 5.30 గంటలకు 112కు కాల్ చేసి.. ఒక వ్యక్తి చనిపోయి ఉన్నాడని చెప్పారని ఉత్తర బెంగళూరు డీసీపీ సైదుల్ అదావత్ తెలిపారు. అతడి భార్య, అత్తను అరెస్ట్ చేశామని, మరింత లోతుగా దర్యాప్తు చేస్తున్నామని వివరించారు.

లోక్‌నాథ్ సింగ్ భార్యకు అతడి వివాహేతర సంబంధాలు, చట్టవిరుద్ధమైన వ్యాపారాల గురించి తెలియడంతో చంపడానికి పథకం వేశారు. మొదట అతడికి నిద్రమాత్రలు కలిపిన ఆహారం ఇచ్చి, మత్తులో ఉండగా కారులో నిర్మానుష్య ప్రదేశానికి తీసుకెళ్లి గొంతు కోసి చంపేశారు. రెండేళ్లు ప్రేమలో ఉన్న లోక్‌నాథ్, ఆమె గత డిసెంబర్‌లో కునిగల్‌లో వివాహం చేసుకున్నారు. వారిద్దరి మధ్య వయసులో తేడా ఉండటంతో లోక్‌నాథ్ కుటుంబ సభ్యులు ఈ పెళ్లిని వ్యతిరేకించారు. కానీ, ఇరుల కుటుంబాలకు ఈ పెళ్లి విషయం తెలియలేదు. పెళ్లైన వెంటనే లోక్‌నాథ్ తన భార్యను ఆమె తల్లిదండ్రుల ఇంటి వద్ద వదిలిపెట్టాడు.

రెండు వారాల కిందటే ఆమె కుటుంబ సభ్యులకు ఈ పెళ్లి గురించి తెలిసింది. ఇదే సమయంలోనే లోక్‌నాథ్ పలువురి మహిళలతో సంబంధాలు, చట్టవిరుద్ధమైన వ్యాపారాల గురించి కూడా భార్యకు తెలియడంతో వారి మధ్య గొడవలు జరిగాయి. విడాకులు తీసుకోవాలని కూడా అనుకున్నారు. లోక్‌నాథ్ తన అత్తమామలను బెదిరించడం మొదలుపెట్టాడు. చివరకు విసిగిపోయిన అతడి భార్య, అత్త కలిసి చంపాలని నిర్ణయించుకున్నారు.

గతంలో మోసానికి పాల్పడిన ఆరోపణలతో బెంగళూరు సెంట్రల్ క్రైమ్ బ్రాంచ్ అతడిపై కేసు నమోదుచేసింది. ఈ కేసుతో ఏమైనా హత్యకు సంబంధం ఉందా? అని పోలీసులు అన్ని కోణాల్లో విచారిస్తున్నారు. లోక్‌నాథ్ హత్యకు గల కారణాలు ఇంకా పూర్తిగా తెలియాల్సి ఉంది. కుటుంబసభ్యులు ఇచ్చిన ఫిర్యాదు ఆధారంగా లోక్‌నాథ్ సింగ్ భార్యను, అతడి అత్తను అరెస్టు చేసి, విచారిస్తున్నారు. ఈ హత్యకు సంబంధించిన మరిన్ని పూర్తి వివరాలు త్వరలో వెల్లడవుతాయని, దర్యాప్తు సాగుతోందని పోలీసులు వెల్లడించారు.