రష్యాలో కరోనా తరహా మిస్టరీ వైరస్ విజృంభణ

ఐదేళ్ల కిందట మొదలైన కరోనా వైరస్ నుంచి ప్రపంచం ఇప్పుడిప్పుడే కోలుకుంటోంది. అయితే, తాజాగా, రష్యాలో అంతుచిక్కని వైరస్ వ్యాప్తి ఆందోళనకు గురిచేస్తోంది. కోవిడ్-19 తరహా ఈ కొత్తరకం వైరస్‌ వల్ల శ్వాస సంబంధిత సమస్యలు, జ్వరంతో ఆసుపత్రుల్లో చేరుతోన్న బాధితుల సంఖ్య పెరుగుతున్నట్టు అంతర్జాతీయ మీడియా కథనాలు నివేదించాయి. అంతేకాదు, బాధితులు దగ్గినప్పుడు నోటి రక్తం కూడా పడుతోందని కొన్ని నివేదికలు పేర్కొన్నాయి. అయితే, ఈ వార్తలను ఖండించిన రష్యా అధికారులు.. దేశంలో కొత్త వైరస్ వ్యాప్తి చెందలేదని స్పష్టం చేశారు. అయితే, రష్యాలో మిస్టరీ వైరస్ వ్యాప్తి చెందుతోందని, చాలా నగరాల్లో ప్రజలు వారాల తరబడి జ్వరం, ఒళ్లు నొప్పులు, దగ్గుతో బాధపడుతున్నారని నివేదికలు చెబుతున్నాయి. ఈ వైరస్ చాలా వేగంగా వ్యాప్తి చెందుతోందని, కరోనా వైరస్ నిర్దారణ పరీక్షలు చేసినా నెగటివ్ వస్తోందని, ఇది కొత్త వైరస్ అయి ఉంటుందని అభిప్రాయపడ్డాయి.

ఐదు రోజులుగా జ్వరంతో బాధపడుతోన్న అలెగ్జాండ్రా అనే మహిళకు దగ్గుతున్నప్పుడు రక్తం పడుతోందని పేర్కొంది. ఎన్ని మందులు వాడినా తగ్గడం లేదని ఆమె ఆందోళన చెందుతున్నట్లు తెలిపింది. ఇలాంటి బాధితులు చాలా మంది ఉన్నారని పలు నివేదికలు వెల్లడించాయి. కొంతమంది సోషల్ మీడియాలో దగ్గుతున్నప్పుడు రక్తం పడుతోందని పోస్ట్ చేశారు. యాంటీబాడీ చికిత్సకు కూడా ఈ వైరస్ లొంగడం లేదని, వైద్య నిపుణులకు సవాల్ మారిందని తెలిపారు.

ఈ వార్తలపై స్పందించిన రష్యా యంత్రాంగం.. దేశంలో ఎలాంటి కొత్త వ్యాధి కారకాలు గుర్తించలేదని ప్రకటించింది. కొత్త వైరస్ వ్యాప్తికి ఎటువంటి ఆధారాలు లేవని స్పష్టం చేసింది. తప్పుడు వార్తలతో ప్రజలు ఆందోళన చెందుతున్నారని, అందులో నిజం లేదని పేర్కొంది. నివేదికల్లో పేర్కొన్న మహిళకు మైకోప్లాస్మా న్యుమోనియా ఉందని వైద్యులు నిర్ధారించారని అధికారులు తెలిపారు. ఒకవేళ కోవిడ్ లాంటి వైరస్ వస్తే ఎదుర్కోవడానికి యంత్రాంగం సిద్ధంగా ఉందని చెప్పారు. ‘బాధితులకు నిర్వహిస్తోన్న పరీక్షల్లో ఎలాంటి నూతన వ్యాధి కారకాలు బయటపడలేదు.... కొత్త వైరస్‌ వ్యాపించినట్లు ఎటువంటి ఆధారాలు లేవు’ అని అధికారులు పేర్కొన్నారు.

అయితే, వైద్య వర్గాలు కూడా ఈ వ్యాధికి మైకోప్లాస్మా న్యుమోనియా అనే బాక్టీరియంతో సంబంధం ఉందని భావిస్తున్నాయి. ఇది మానవులకు సోకే అవకాశం ఉంది. ఇది సాధారణంగా ఎగువ శ్వాసకోశ ఇన్ఫెక్షన్లకు కారణమవుతుంది. క్రమంగా న్యుమోనియాకు దారితీస్తుంది. ఈ ఇన్ఫెక్షన్ కారణంగా గతేడాది చివర్లో రష్యాలో భారీగా కేసులు నమోదయ్యాయి. కానీ, అప్పట్లో రష్యా అధికారులు దీనిని నిర్ధారించలేదు. సాధారణ ఫ్లూగానే కొట్టిపారేయడం గమనార్హం.