ఫొటోలకు ఫోజులు ఇస్తూ స్టేజీ పైనుంచి పడిపోయిన ప్రధాని

ఆస్ట్రేలియా ప్రధాన మంత్రి ఆంథోని ఆల్బనీస్ ఇటీవలే ఓ కార్యక్రమానికి హాజరయ్యారు. అక్కడే ప్రజలను ఉద్దేశించి మాట్లాడిన ఆయన.. ఆ తర్వాత మీడియో కోసం ఫొటోలకు ఫోజులు ఇచ్చారు. ఈక్రమంలోనే స్టేజీపై ఎక్కువ మంది నేతలు ఉండగా.. మధ్యలోకి వెళ్లాలని ప్రయత్నించారు. దురదృష్టవశాత్తు ఫొటోలకు ఫోజులిస్తూ స్టేజీ పైనుంచి కింద పడిపోయారు. దీంతో వెంటనే సిబ్బంది ఆయన వద్దకు వెళ్లి లేపారు. ఏమైనా దెబ్బలు తగిలాయేమోనని చూశారు. ఆయనకు ఎలాంటి గాయాలు కాకపోవడంతో అంతా ఊపిరి పీల్చుకున్నారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతుండగా అంతా షాక్ అవుతున్నారు. ఆ పూర్తి వివరాలు మీకోసం.

ఆస్ట్రేలియాలో మే 3వ తేదీన ఎన్నికలు జరగబోతున్న విషయం అందరికీ తెలిసిందే. ఈక్రమంలోనే ఆ దేశ ప్రధాని ఆంథోని ఆల్బనీస్ ప్రస్తుతం ఎన్నికల ప్రచార కార్యక్రమాల్లో పాల్గొంటూ తెగ సందడి చేస్తున్నారు. అయితే గురువారం రోజు ఉదయం కూడా ఎన్నికల ప్రచారంలో భాగంగా న్యూ సౌత్ వేల్స్‌లో జరిగిన ఓ కార్యక్రమానికి హాజరయ్యారు. ఆయనతో పాటు పలువురు ముఖ్య నేతలు కూడా అక్కడకు వెళ్లగా.. అందరూ స్టేజీపై నిల్చుని సందడి చేశారు. ముందుగా ప్రజలను ఉద్దేశించి మాట్లాడారు. ఆపై వారంతా కలిసి ఫొటోలకు ఫోజులు ఇచ్చారు.

అయితే కుడివైపు ఉన్న ఆస్ట్రేలియా ప్రధాని ఆంథోని ఆల్బనీస్.. వారి మధ్యలోకి వెళ్లాలని ఎడమ వైపుకు వెళ్లాడు. కానీ వారంతా స్టేజీ చివర్లో నిల్చోవడం.. వెనకాల ఎక్కువ స్థలం లేకపోవడంతో ఆంథోని కిందపడిపోయారు. దీంతో వెంటనే విషయం గుర్తించిన నేతలు ఆయన్ను పట్టుకుని పైకి లాగారు. అదృష్టవశాత్తు ఈ ప్రమాదంలో ఆస్ర్టేలియా ప్రధానికి ఎలాంటి గాయాలు కాలేదు. దీంతో నేతలతో పాటు మీడియా మిత్రులు అంతా ఊపిరి పీల్చుకున్నారు. ముఖ్యంగా ఆయనే పైకి లేచాకా ఏమీ కాలేదని చెబుతూ.. ఫుల్లుగా నవ్వారు. దీంతో అక్కడున్న వారు కూడా ఒక్కసారిగా ఘొల్లుమన్నారు.

ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. ఇది చూసిన ప్రతీ ఒక్కరూ సార్ కాస్త చూస్కోవాలి కదా సార్ అంటూ చెప్పుకొస్తున్నారు. మరికొందరేమో స్టేజీ కాస్త పెద్దగా ఉంటే బాగుండేదని.. ప్రమాదం నుంచి బయటపడ్డ వెంటనే పరిస్థితులను నవ్వుతూ భలే చక్కదిద్దారని మరికొందరు కామెంట్ల రూపంలో చెప్పుకొస్తున్నారు. ఇంకొందరు అయితే నవ్వుతున్న ఎమోజీలు పెడుతూ... వీడియో భలే ఫన్నీగా ఉందని రాసుకొస్తున్నారు. మరి ఈ వీడియో చూస్తే మీకేమనిపిస్తుందో కామెంట్ల రూపంలో వెల్లడించేయండి.