అమెరికాకు గట్టి షాకిచ్చిన చైనా.. సుంకాలు భారీగా పెంపు

అమెరికా అధ్యక్షుడు డొనాల్డ్ ట్రంప్ దూకుడైన.. వాణిజ్య విధానాలకు ప్రతిస్పందనగా చైనా తన ప్రతీకార చర్యలను మరింత తీవ్రతరం చేసింది. తాజాగా, అమెరికా నుంచి దిగుమతి చేసుకునే వస్తువులపై 84 శాతం సుంకాలు విధిస్తున్నట్లు బీజింగ్ ప్రభుత్వం ప్రకటించింది. ఇదివరకే అన్ని అమెరికా వస్తువులపై 34 శాతం సుంకం విధిస్తున్నట్లు గత వారం చైనా ప్రకటించిన విషయం తెలిసిందే. ఈ తాజా పెంపుతో అమెరికా వస్తువులపై చైనా విధిస్తున్న మొత్తం సుంకం 84 శాతానికి చేరనున్నట్లు తెలుస్తోంది. దీంతో ఆర్థిక మాంద్యం భయాలు మరింత పెరిగాయని చెప్పొచ్చు.

బుధవారం రోజు.. ట్రంప్ ప్రభుత్వం చైనా నుంచి అమెరికాకు ఎగుమతి అయ్యే వస్తువులపై ఏకంగా 104 శాతం సుంకాన్ని అమలులోకి తెచ్చింది. ఈ చర్యను తీవ్రంగా ఖండిస్తూ చైనా ప్రభుత్వం సుదీర్ఘ విధాన ప్రకటన విడుదల చేసింది. అమెరికా ఏకపక్ష వాణిజ్య విధానాలకు వ్యతిరేకంగా "చివరి వరకు పోరాడుతామని" చైనా స్పష్టం చేసింది. రెండు దేశాల మధ్య వాణిజ్యం సమతుల్యంగా ఉందని వాదిస్తూ, అమెరికా చర్యలు తమ ఆర్థిక వ్యవస్థకు తీవ్ర నష్టం కలిగిస్తున్నాయని పేర్కొంది. ఇతర దేశాలు అమెరికాతో వాణిజ్య చర్చలు జరుపుతున్నప్పటికీ, తాము వైట్ హౌస్‌తో చర్చలకు సిద్ధంగా ఉన్నామా లేదా అనే దానిపై చైనా ప్రభుత్వం ఇంకా ఎటువంటి స్పష్టమైన ప్రకటన చేయలేదు.

గత శుక్రవారం.. ట్రంప్ ప్రభుత్వం విధించిన "లిబరేషన్ డే" సుంకాలను నిరసిస్తూ చైనా అనేక చర్యలు ప్రకటించింది. అమెరికా నుంచి దిగుమతి చేసుకునే అన్ని వస్తువులపై 34 శాతం సుంకం విధించడంతో పాటు, అరుదైన ఖనిజాల ఎగుమతులపై నియంత్రణలు సహా ఇతర వాణిజ్యపరమైన ఆంక్షలను కూడా విధించింది. దీనికి ప్రతిస్పందనగా ట్రంప్.. చైనా నుంచి వచ్చే వస్తువులపై అదనంగా 50 శాతం సుంకాన్ని ప్రకటించడమే కాకుండా, చైనాతో ఇకపై ఎటువంటి వాణిజ్య చర్చలు జరిపేది లేదని తేల్చి చెప్పారు. దీంతో.. అంతకుముందే 54 శాతం సుంకం ఉండగా.. ఇది 104 శాతానికి పెరిగింది. ఈ క్రమంలో తాజాగా చైనా.. మరోసారి సుంకాల్ని పెంచింది.

ఈ వరుస చర్యలు ప్రపంచంలోని రెండు అతిపెద్ద ఆర్థిక శక్తుల మధ్య వాణిజ్య యుద్ధం మరింత ముదురుతున్నదని స్పష్టం చేస్తున్నాయి. ఒకరిపై ఒకరు భారీగా సుంకాలు విధించుకోవడం వల్ల అంతర్జాతీయ వాణిజ్యం కుంటుపడుతుంది, తద్వారా సప్లై చెయిన్ కూడా తీవ్రంగా దెబ్బతింటుంది. దీని ప్రభావం ప్రపంచవ్యాప్తంగా వినియోగదారులు, వ్యాపారాలపై గణనీయంగా పడే అవకాశం ఉంది. ఆర్థిక నిపుణులు ఈ పరిణామాలను నిశితంగా పరిశీలిస్తున్నారు. ప్రపంచ ఆర్థిక వ్యవస్థపై దీని యొక్క దీర్ఘకాలిక ప్రభావం ఎలా ఉంటుందో అంచనా వేస్తున్నారు.