తమిళనాడు మంత్రి వివాదాస్పద వ్యాఖ్యలు.. పార్టీ పదవి నుంచి తొలగించిన అధిష్టానం

తమిళనాడు అటవీశాఖ మంత్రి కె.పొన్ముడి వివాదాస్పద వ్యాఖ్యలు చేశారు. ఇటీవలే ఓ కార్యక్రమానికి హాజరైన ఆయన ప్రజలను ఉద్దేశించి మాట్లాడుతూ.. ఓ జోక్ వేశారు. ముఖ్యంగా హిందువులు పెట్టుకునే బొట్టును శృంగారం, వేశ్యతో ముడి పెడుతూ కామెంట్లు చేశారు. ముందుగానే మహిళలూ నన్ను అపార్థం చేసుకోకండని చెప్పిన మంత్రి.. ఆపై ఓ వ్యక్తి వేశ్య దగ్గరకు వెళ్లాడని వివరించారు. అయితే ఆమె అతడిని నీవు వైష్ణవుడివా, శైవుడివా అని అడగ్గా.. అతడికి అర్థం కాలేదని చెప్పారు. దీంతో ఆ వేశ్య సదరు వ్యక్తిని నీవు పొడువు నామాల వాడివా, అడ్డ నామానా వాడివా అని అడిగిందని తెలిపారు. అడ్డంగా బొట్టు పెట్టుకునే వారైతే పడుకుని, నిలువు బొట్టు పెట్టుకునే వాడైతే నిల్చుని శృంగారం చేస్తారంటూ ఆమె వివరించినట్లుగా చెప్పి మంత్రి పచ్చి కామెంట్లు చేశారు.

ఆపై ఈ వీడియోను ఆయిన ఎక్స్ వేదికగా పోస్ట్ చేయగా.. నెట్టింట తెగ వైరల్ అయింది. మంత్రి పదవిలో ఉన్న పొన్ముడి.. అంత పచ్చిగా మహిళల గురించి ఎలా మాట్లాడగల్గారంటూ నెటిజెన్లు తీవ్ర ఆగ్రహం వ్యక్తం చేశారు. ముఖ్యంగా బీజేపీ నాయకురాలు, నటి షుష్బూ సుందర్ స్పందిస్తూ.. మంత్రి చేసిన ఈ వివాదాస్పద వ్యాఖ్యలకు ముఖ్యమంత్రి ఎంకే స్టాలిన్ సమాదానం చెప్పాలని కోరారు. ఇంత పచ్చిగా మాట్లాడే మాటలను మీ ఇంట్లోని మహిళలు అంగీకరిస్తారా అంటూ ప్రశ్నించారు. ఆయన్ను వెంటనే మంత్రి పదవి నుంచి తొలగించాలని డిమాండ్ చేశారు.

అలాగే ప్రముఖ గాయని చిన్మయి శ్రీపాద కూడా దీనిపై స్పందించారు. ఇలాంటి వారిని ఆ భగవంతుడే శిక్షిస్తాడని రాసుకొచ్చారు. మరోవైపు డీఎంకే ఎంపీ కనిమొళి సైతం ఈ వ్యాఖ్యలను ఖండించారు. మంత్రి పొన్ముడి మహిళలను తీవ్రంగా అవమానించారని, ఇది ఏమాత్రం ఆమోదయోగ్యం కాదని ఎక్స్ వేదికగా వెల్లడించారు. ఇలా అనేక మంది సినీ, రాజకీయ ప్రముఖులు స్పందిస్తూ.. మంత్రిపై విమర్శలు గుప్పిస్తుండగా.. డీఎంకే పార్టీ సైతం స్పందించింది. మంత్రి పొన్ముడిని డీఎంకే పార్టీ డిప్యూటీ జనరల్ సెక్రటరీ పదవి నుంచి తొలగిస్తున్నట్లు ప్రకటించింది.