పది నిమిషాల్లో పరీక్ష అనగా హాల్‌టికెట్ ఎత్తుకెళ్లిన గద్ద

కేరళ పబ్లిక్ సర్వీస్ కమిషన్ ప్రభుత్వ ఉద్యోగాల కోసం ఇటీవలే రాత పరీక్షలు నిర్వహించింది. అయితే కొన్ని సంవత్సరాలుగా సర్కారు ఉద్యోగం సంపాదించేందుకు విపరీతంగా కష్టపడి చదువుతున్న ఓ మహిళా అభ్యర్థి.. తనకు కేటాయించిన పరీక్షా కేంద్రానికి వచ్చింది. ఆలస్యం అయితే ఎక్కడ లోపలికి రానివ్వరేమోనని అరగంట ముందుగానే అక్కడకు చేరుకుంది. లోపలికి పిలిచే వరకు ఏం చేయాలో తెలియక ఓ చెట్టు కింద కూర్చుంది. అన్నీ సరిగ్గానే ఉన్నాయో లేదోనంటూ హాల్ టికెట్, పెన్నులను చెక్ చేసుకుంటుంది. ఇంతలోనే అక్కడకు ఓ గద్ద వచ్చి అమ్మాయి హాల్ టికెట్‌ను ఎత్తుకెళ్లిపోయింది. ఏం జరిగిందో అర్థం అయ్యలోపే ఆ గద్ద పరీక్షా కేంద్ర భవనం పైనున్న కిటికీపై కూర్చుంది.

ఆపై విషయం గుర్తించిన సదరు అభ్యర్థి ఛూ, ఛూ అంటూ గద్దను అదిరించింది. కానీ అది మాత్రం చప్పుడు చేయకుండా అలాగే ఉండిపోయేసరికి అమ్మాయి భయపడి పోయింది. పరీక్ష రాస్తానో లేదేనంటూ ఆందోళన చెందుతూ ఏడ్వడం ప్రారంభించింది. దీంతో పక్కనున్న అభ్యర్థులు ఆ విషయాన్ని గుర్తించారు. గద్దపైకి చిన్న చిన్న రాళ్లు విసరడం, చప్పట్లు కొడుతూ దాన్ని అదిరించడం చేశారు. అయినా ఆ గద్ద వారికి స్పందించలేదు. మరో 10 నిమిషాల్లోనే పరీక్ష ప్రారంభం అవుతుండగా.. అంతా లోపలికి వెళ్లిపోయారు. దీంతో అమ్మాయి మరింత ఆవేదన చెందగా.. ఉన్నట్టుండి ఆ గద్దే కిందకు వచ్చి హాల్ టికెట్ విసిరేసి పోయింది. దీంతో ఊపిరి పీల్చుకున్న ఆమె వెంటనే లోపలికి వెళ్లిపోయి.. హాయిగా పరీక్ష రాసుకుంది.

అయితే ఇదంతా జరుగుతుండగా.. అక్కడున్న కొందరు దీన్ని వీడియోగా తీశారు. ఆపై సోషల్ మీడియాలో పోస్ట్ చేశారు. దీంతో ఈ వీడియో కాస్తా నెట్టింట వైరల్ అయింది. పరీక్షకు 10 నిమిషాల ముందే గద్ద హాల్ టికెట్ ఎత్తుకుపోవడం, కొన్ని నిమిషాల్లోనే తిరిగిచ్చేయడం చూసి అంతా షాక్ అవుతున్నారు.