లివర్ ప్రమాదంలో పడినప్పుడు కనిపించే కొన్ని లక్షణాలు

కాలేయం మానవ శరీరంలో ముఖ్యమైన అవయవం. ఇది రక్తాన్ని శుభ్రపరుస్తుంది. జీవక్రియను వేగవంతం చేస్తుంది. ఆహారాన్ని జీర్ణం చేసే ఎంజైమ్స్ విడుదలతో పాటు అనేక పనులు నిర్వహిస్తుంది. ఇక, ప్రతి ఏటా ఏప్రిల్ 19న ప్రపంచ కాలేయ దినోత్సవాన్ని జరుపుకుంటారు. కొందరికి చిన్నప్పటి నుంచి లివర్ సమస్యలు ఉంటాయి. అయితే, మరికొందరికి వయసు పెరిగే కొద్దీ కాలేయ పనితీరు నెమ్మదిస్తుంది. దీంతో.. అనేక వ్యాధుల బారిన మనం పడవచ్చు.

ఫ్యాటీ లివర్‌తో పాటు లివర్ సిర్రోసిస్, లివర్ ఇన్‌ఫెక్షన్, లివర్ ఫెయిల్యూర్ మొదలైన వాటి ప్రమాదం పెరుగుతుంది. అయితే, తీవ్రమైన లేదా దీర్ఘకాలిక కాలేయ వ్యాధుల విషయంలో కొన్ని లక్షణాలు చాలా మందికి తెలియవంటున్నారు డాక్టర్ చక్షు బన్సాల్ (సీనియర్ కన్సల్టెంట్ మరియు DGM ల్యాబ్ ఆపరేషన్స్, మెట్రోపోలిస్ హెల్త్‌కేర్ లిమిటెడ్). కాలేయ వ్యాధుల ప్రమాదం, ఆ లక్షణాలేంటో డాక్టర్ మాటల్లోనే ఇక్కడ తెలుసుకుందాం.

కాలేయ వ్యాధులు ఎంత ప్రమాదం?

​కాలేయ వ్యాధులు ప్రపంచవ్యాప్తంగా ఒక ప్రధాన ఆరోగ్య సమస్య. లివర్ డ్యామేజ్ అయి ఏటా 2 మిలియన్ల మరణాలు నమోదవుతున్నాయి. ఈ ప్రపంచ మరణాల్లో భారతదేశంలో ఎక్కువగా నమోదవుతున్నాయి. 18.3 శాతం మంది కాలేయ వ్యాధితో మన దేశంలో చనిపోతున్నట్టు డాక్టర్ తెలిపారు. ఏది పడితే అది తినడం, చెడు అలవాట్లు, మద్యపానం ఎక్కువగా తీసుకోవడం వల్ల కాలేయ వ్యాధులు ఎక్కువ అవుతున్నాయని డాక్టర్ చెప్పారు.

తీవ్రమైన, దీర్ఘకాలిక కాలేయ వ్యాధులు

​కాలేయ వ్యాధి తీవ్రమైన లేదా దీర్ఘకాలికంగా ఉండవచ్చు. ఏదైనా అకస్మాత్తుగా లివర్‌ని దెబ్బతీసినప్పుడు తీవ్రమైన కాలేయ వ్యాధి సంభవిస్తుంది. ఈ పరిస్థితి ఆరు లేదా అంతకంటే ఎక్కువ నెలలు కాలేయాన్ని ప్రభావితం చేస్తూనే ఉంటే అది దీర్ఘకాలిక కాలేయ వ్యాధి కిందకి వస్తుందని డాక్టర్ తెలిపారు. వైరల్ ఇన్ఫెక్షన్లు, విషప్రయోగం, లేదా జీవనశైలిలో మార్పులు దీర్ఘకాలిక కాలేయ వ్యాధికి సాధారణ కారణాలు.

తీవ్రమైన కాలేయ వ్యాధి లక్షణాలు

తీవ్రమైన కాలేయ వ్యాధి ఆకస్మిక లక్షణాలతో ప్రారంభమవుతుంది లేదా అప్పుడప్పుడు తీవ్రమైన లక్షణాలని కలిగి ఉంటుంది. తీవ్రమైన లక్షణాలలో జ్వరం, అలసట లేదా బలహీనత, కామెర్లు, చర్మం, కళ్ళు పసుపు రంగులోకి మారడం, ముదురు మూత్రం, లేత మలం, వికారం, వాంతులు ,శరీరం యొక్క కుడి వైపున పక్కటెముకల కింద నొప్పి ఉంటాయి. అంతగా తెలియని లక్షణాలలో చర్మం దురద, మానసిక గందరగోళం, దిక్కుతోచని స్థితి, దుర్వాసనతో కూడిన శ్వాస ఉంటాయి.

దీర్ఘకాలిక కాలేయ వ్యాధి ఉన్నవారు కొన్ని సంవత్సరాల వరకు ఈ లక్షణాల్ని అనుభవించకపోవచ్చు. కళ్ళు పసుపు రంగులోకి మారడం లేదా కామెర్లు రావడం అత్యంత సాధారణ లక్షణం. కానీ కాలేయ వ్యాధి ముదిరే కొద్దీ అనేక ఇతర సంకేతాలు, లక్షణాలు కనిపిస్తాయి. ఎందుకంటే ఇది రక్త ప్రవాహం, హార్మోన్లు, పోషక స్థితిని ప్రభావితం చేస్తుంది.

తక్కువగా తెలిసిన లక్షణాలు

దీర్ఘకాలిక కాలేయ వ్యాధి యొక్క కొన్ని లక్షణాలు చాలా మందికి తక్కువగా మాత్రమే తెలుస్తాయి. ఈ లక్షణాలు సంకేతాలు చర్మం, గోళ్లను ప్రభావితం చేస్తాయి. అవి స్పూన్ గోర్లు, టెర్రీ గోర్లు, నెయిల్ క్లబ్బింగ్, స్పైడర్ ఆంజియోమాస్ (స్పైడర్ కాళ్ళలాగా బయటికి ప్రసరించే సన్నని, ఎర్రటి నాళాలతో కూడిన మధ్య ఎరుపు మచ్చలు), చర్మంపై చిన్న ఎర్రటి మచ్చలు (పెటెచియే), చర్మం లేదా కనురెప్పలపై కొవ్వు నిల్వల చిన్న పసుపు గడ్డలు. కనురెప్పలపై ఉన్న ఈ పరిస్థితి జాంథెలాస్మాస్ అని పిలుస్తారు.

అంతేకాకుండా రక్తనాళాల నుంచి ద్రవాలు కారడం, ద్రవాలు శరీరంలో పేరుకుపోవడం, ఉదరం వాపు, చీలమడంల వాపు, పాదాలు, చేతులు, ముఖంలో వాపు కూడా సంభవించవచ్చు. స్త్రీలు సక్రమంగా లేని పీరియడ్స్ (ఋతుస్రావం), వంధ్యత్వాన్ని అనుభవించవచ్చు. పురుషులు కుంచించుకుపోయిన వృషణాలు, విస్తరించిన పురుషుల రొమ్ము కణజాలం (గైనెకోమాస్టియా) అనుభవించవచ్చని డాక్టర్ తెలిపారు.