రైతులు, కార్మికులకు నెలకు రూ.5 వేలు.. కేంద్రం స్కీమ్‌

అసంఘటిత రంగాల్లోని కార్మికులకు సైతం రిటైర్మెంట్ తర్వాత ఉద్యోగుల మాదిరిగా పెన్షన్ అందించే అద్భుతమైన పథకాన్ని కేంద్ర ప్రభుత్వం అందిస్తోంది. అదే ప్రధాన మంత్రి అటల్ పెన్షన్ యోజన. ఈ పథకం ద్వారా రైతులు, రోజూవారీ కూలీలు, భవన నిర్మాణ కార్మికుల వంటి అసంఘటిత రంగాలకు చెందిన వారు ఇందులో చేరి పదవీ విరమణ తర్వాత ఉద్యోగుల మాదిరిగానే నెల నెలా పెన్షన్ పొందవచ్చు. గరిష్ఠంగా నెలకు రూ.5 వేలు పొందవచ్చు. తాజాగా ఈ అటల్ పెన్షన్ యోజన సంబంధించిన కీలక విషయాలు వెల్లడించింది కేంద్ర ప్రభుత్వం.

అటల్ పెన్షన్ యోజన  పింఛను పథకంలో కొత్తగా 11.7 మిలియన్ల మంది సబ్‌స్క్రైబర్లు చేరినట్లు పెన్షన్ ఫండ్ రెగ్యులేటరీ, డెవలప్మెంట్ అథారిటీ  తెలిపింది. దీంతో మొత్తం సబ్‌స్క్రైబర్ల సంఖ్య 76 మిలియన్లు (7.60 కోట్ల మంది)కు చేరినట్లు తెలిపింది. అలాగే అటల్ పెన్షన్ యోజనలో ఆస్తుల మొత్తం రూ.44,780 కోట్లుగా ఉన్నట్లు వెల్లడించింది. వాటిపై వార్షిక రాబడులు 9.11 శాతంగా వస్తున్నట్లు పేర్కొంది.

అటల్ పెన్షన్ యోజన పథకం అసంఘటిత రంగాల్లోని కార్మికుల కోసం 2015లో తీసుకొచ్చారు. 18 సంవత్సరాల నుంచి 40 ఏళ్ల వయసులోపు వారు చేరవచ్చు. 60 సంవత్సరాల వయసు తర్వాత పెన్షన్ ఇస్తారు. అప్పటి వరకు ప్రీమియం చెల్లించాల్సి ఉంటుంది. చిన్న వయసులోనే చేరితే తక్కువ ప్రీమియం ఉంటుంది. వయసు పెరిగే కొద్ది ప్రీమియం పెరుగుతుంది. కనీస పెన్షన్ రూ.1000గా ఉండగా.. గరిష్ఠంగా రూ.5 వేలు పొందవచ్చు. ప్రీమియం ఆధారంగా పెన్షన్ మారుతుంది. 18 ఏళ్ల వయసులో చేరి నెలకు రూ.42 ప్రీమియం కడితే 60 ఏళ్ల వయసు వచ్చాక నెలకు రూ.1000 పెన్షన్ పొందవచ్చు. అదే నెలకు రూ.210 చెల్లిస్తే పెన్షన్ రూ.5000 లభిస్తుంది.

ఇక ఒక 40 ఏళ్ల వయసున్న వ్యక్తి నెలకు రూ.291 ప్రీమియం చెల్లిస్తే నెలకు రూ.1000 పెన్షన్ వస్తుంది. అందే నెలకు రూ.1454 అంటే రోజుకు రూ.48 కట్టినట్లయితే నెలకు రూ.5000 పెన్షన్ పొందవచ్చు. కేంద్ర ప్రభుత్వం అందిస్తున్న ఈ పథకంలో చేరేందుకు సమీప బ్యాంకులు లేదా పోస్టాఫీసును సంప్రదించాల్సి ఉంటుంది. మీ దగ్గర్లోని బ్యాంకు బ్రాంచీకి వెళ్లి రిజిస్టర్ చేసుకోవచ్చు. ఆన్‌లైన్ ద్వారా సైతం ఈ పథకానికి దరఖాస్తు చేసుకోవచ్చు.

ఆన్‌లైన్ ప్రాసెస్ ఇదే..

నెట్ బ్యాంకింగ్ సౌకర్యం ద్వారా ఏపీవై అకౌంట్ తీసుకోవచ్చు. ముందుగా తమ బ్యాంక్ ఖాత నెట్ బ్యాంకింగ్ లోకి లాగిన్ కావాలి.

డ్యాష్ బోర్డులో APY కోసం సర్చ్ చేయాలి.

ఆ తర్వాత వచ్చిన పేజీలో కస్టమర్ వివరాలు, నామినీ వివరాలు అందించాలి.

అటల్ పెన్షన్ యోజనకు ఆటో డెబిట్ అయ్యేందుకు కస్టమర్ అంగీకారం తెలపాల్సి ఉంటుంది.

లేదా https://enps.nsdl.com/eNPS/NationalPensionSystem.html ద్వారా కూడా రిజిస్టర్ చేసుకోవచ్చు.