విద్యార్థులకు బిగ్ రిలీఫ్,,,వీసాల విషయంలో వెనక్కి తగ్గిన ట్రంప్

ఉన్నత విద్యను అభ్యసించేందుకు ప్రపంచ దేశాల నుంచి అమెరికాకు వెళ్లిన వందల మంది విదేశీ విద్యార్థులకు భారీ ఊరట లభించింది. ఫారిన్ స్టూడెంట్‌లకు వీసాలు, చట్టబద్ధ హోదాను రద్దు చేస్తూ ఇటీవల డొనాల్డ్ ట్రంప్ ప్రభుత్వం తీసుకున్న వివాదాస్పద నిర్ణయంపై తాజాగా వెనక్కి తగ్గింది. ఈ నేపథ్యంలోనే దాదాపు 1200 మంది స్టూడెంట్స్ లీగల్ స్టేటస్‌ను పునరుద్ధరిస్తున్నట్లు అమెరికా ప్రభుత్వ లాయర్ తాజాగా కోర్టుకు వెల్లడించారు. దీంతో ఆ 1200 మంది విద్యార్థులు బహిష్కరణ, నిర్బంధం ముప్పు నుంచి బయటపడి ఊపిరి పీల్చుకున్నారు.

అమెరికాలో అధ్యక్ష పదవిలోకి వచ్చినప్పటి నుంచి అక్రమ వలసదారులపై ఉక్కుపాదం మోపుతున్న డొనాల్డ్ ట్రంప్.. అంతకుముందు వివిధ కారణాలతో 187 కళాశాలలకు చెందిన 1200 మందికి పైగా విదేశీ విద్యార్థుల వీసాలను, వారి చట్టబద్ధ హోదాలను రద్దు చేస్తూ సంచలన నిర్ణయం తీసుకున్నారు. ఈ నిర్ణయంతో తీవ్ర ఆందోళనకు గురైన వందల మంది విదేశీ విద్యార్థులు న్యాయపోరాటం చేశారు. కాలిఫోర్నియా, బోస్టన్‌లోని కోర్టుల్లో ట్రంప్ తీసుకున్న నిర్ణయానికి వ్యతిరేకంగా పిటిషన్లు దాఖలు చేశారు. ఈ క్రమంలోనే వారి పిటిషన్లను స్వీకరించి.. విచారణ జరిపిన ఆయా కోర్టులు.. విదేశీ విద్యార్థుల వీసా రద్దును నిలిపివేయాలని ట్రంప్ సర్కార్‌కు ఆదేశాలు జారీ చేశాయి.

ఈ నేపథ్యంలోనే ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ఐసీఈ).. ఆ 1200 మంది విద్యార్థుల చట్టబద్ధ హోదాను తాత్కాలికంగా పునరుద్ధరిస్తున్నట్లు ప్రకటించింది. సాధారణంగా వీసా లేదా చట్టబద్ధ హోదా రద్దు అయినప్పుడు.. విదేశీ విద్యార్థుల వివరాలు ఉండే స్టూడెంట్ అండ్‌ ఎక్స్ఛేంజ్‌ విజిటర్‌ ఇన్ఫర్మేషన్‌ సిస్టమ్స్‌ (ఎస్ఈవీఐఎస్) డేటాబేస్ నుంచి ఆయా స్టూడెంట్స్ రికార్డులను తొలగిస్తారు. అయితే ఈ రికార్డుల టెర్మినేషన్‌కు సంబంధించి డొనాల్డ్ ట్రంప్ ప్రభుత్వం కొత్త విధానం తీసుకురానున్నట్లు తెలుస్తోంది. అప్పటివరకు తొలగించిన విద్యార్థుల రికార్డులన్నింటినీ తిరిగి యాక్టివేట్ చేస్తున్నట్లు ప్రభుత్వ లాయర్ కోర్టుకు తెలిపారు.

ఇక ఈ వీసాలు రద్దయిన 1200 మంది విదేశీ విద్యార్థుల్లో కొంతమంది భారతీయ విద్యార్థులు కూడా ఉన్నారని తెలుస్తోంది. ట్రాఫిక్ ఉల్లంఘనలు వంటి చిన్న కారణాలతో కూడా ఆయా విద్యార్థుల చట్టబద్ధ హోదాను తొలగించారని అమెరికన్ ఇమిగ్రేషన్ లాయర్స్ అసోసియేషన్ కోర్టులో ఆరోపించింది. కోర్టు ఇచ్చిన ఆదేశాలతో ట్రంప్ తీసుకున్న తాజా పరిణామంతో అమెరికాలో ఉంటున్న విదేశీ విద్యార్థులు ఊపిరి పీల్చుకున్నారు. అయితే ట్రంప్ ప్రభుత్వం కొత్తగా ఏం విధానం తీసుకువస్తుందో వేచి చూడాలి. అయితే వీసాలు, లీగల్ స్టేటస్ రద్దు చేయడంతో డిపోర్టేషన్‌ లేదా నిర్బంధం ముప్పు ఉంటుందని భావించిన ఆ విద్యార్థులంతా తీవ్ర ఆందోళనకు గురయ్యారు. వారిలో కొంతమంది ఇప్పటికే అమెరికాను వీడగా.. కొందరు రహస్య ప్రదేశాల్లో తల దాచుకున్నారు. మరికొందరు కాలేజీల్లో క్లాసులకు కూడా వెళ్లడం లేదు.