పుచ్చకాయ, అరటిపండు కలిపి తింటే ఏమవుతుందో తెలుసా

ఆరోగ్యమే మహాభాగ్యం అంటారు. మనం తినే ఆహారం నేరుగా మన ఆరోగ్యాన్ని ప్రభావితం చేస్తుంది. ఏది తిన్నా, ఏ సమయంలో తిన్నా అది ఆరోగ్యంపైనే ప్రత్యక్ష ప్రభావం చూపుతుంది. అందుకే సరైన సమయంలో.. సరైన ఆహారం తీసుకోవాలని ఆరోగ్య నిపుణులు సూచిస్తున్నారు. సాధారణంగా ఉదయం పూట భారీగా బ్రేక్ ఫాస్ట్, రాత్రి సమయాల్లో తేలికపాటి భోజనం చేయాలని నిపుణులు సలహా ఇస్తున్నారు. అయితే, చాలా మంది ఎలా పడితే అలా తింటున్నారు. దీంతో లేని పోని రోగాలను కొని తెచ్చుకుంటున్నారు.

ఇక, చాలా మంది ఆరోగ్యానికి మంచిదని పండ్లు తింటారు. పండ్లలో ఆరోగ్యానికి మేలు చేసే ఎన్నో పోషకాలు ఉంటాయి. అందుకే పండ్లను సలాడ్, జ్యూస్ రూపంలో తీసుకుంటారు. నిజమే పండ్లు ఆరోగ్యానికి మేలు చేస్తాయి. అయితే, కొన్ని పండ్లు కలిపి తినకూడదంటున్నారు ఆయుర్వేద నిపుణులు. అలాంటి కాంబినేషన్‌లో పుచ్చకాయ - అరటి పండు. ఈ రెండు కలిపి తినడం వల్ల ఆరోగ్యానికి ముప్పు కలుగుతుందని హెచ్చరిస్తున్నారు. అసలు ఈ రెండు కలిపి తినకూడదో తెలుసుకుందాం.

పుచ్చకాయతో ఆరోగ్య ప్రయోజనాలు

వేసవిలో విరివిగా దొరికే పుచ్చకాయ ఆరోగ్యానికి ఎంతో మేలు చేస్తుంది. పుచ్చకాయలోదాదాపు 90 శాతం నీటితో నిండి ఉంటుంది. ఇది వేసవిలో శరీరాన్ని హైడ్రేట్‌గా ఉంచుతుంది. ఇప్పటికే మార్కెట్లో పుచ్చకాయలు విరివిగా లభిస్తున్నాయి.. పుచ్చకాయలో విటమిన్‌ ఏ, బీ కాంప్లెక్స్‌, సీ, పొటాషియం మీ చర్మానికి పోషణ అందిస్తాయి. వీటితో పాటు.. పుచ్చకాయలోని లైకోపీన్‌, బీటా - కెరోటిన్‌ వంటి యాంటీఆక్సిడెంట్లు ఉంటాయి. ఇవి ఆరోగ్యానికి ఎంతో మేలు చేస్తాయి. ఎండాకాలంలో డీహైడ్రేట్ అవ్వకుండా పుచ్చకాయ కాపాడుతుంది.

అరటిపండుతో ప్రయోజనాలు

​అరటి పండులో పోషకాలు మెండుగా ఉంటాయి. ఇందులో ఎక్కువగా పొటాషియం ఉంటుంది. ఇది అనేక రకాల దీర్ఘకాలిక వ్యాధుల నుంచి శరీరాన్ని రక్షిస్తుంది. అలాగే అరటిలో సహజ చక్కెర అధికంగా ఉంటుంది. రోజు తినడం వల్ల శరీరానికి తక్షణ శక్తి లభిస్తుంది. అరటి పండు ఎనర్జీ బూస్టర్‌లా పనిచేస్తుంది. అంతేకాకుండా వ్యాయామాలు, జిమ్ చేసేవారు అరటిపండును తినడం వల్ల అనేక ఆరోగ్య ప్రయోజనాలు పొందుతాయి. అరటిపండు అనేది పొటాషియం, మెగ్నీషియం, విటమిన్ బీ6, ఫాస్పరస్ వంటి విటమిన్లు, ఖనిజాల గని. జీర్ణశక్తిని బలోపేతం చేయడం, బరువు తగ్గడం, బరువు పెరగడం, బలమైన ఎముకలు, శక్తి స్థాయిలను పెంచడం, గుండెను ఆరోగ్యంగా ఉంచడం, రక్తంలో చక్కెరను నియంత్రించడం వంటి అనేక ప్రయోజనాలను అరటిపండు అందిస్తుంది.

పుచ్చకాయ, అరటిపండు ఎందుకు కలిపి తినకూడుదు?

పుచ్చకాయ, అరటిపండు కలిపి తినే విషయంలో జాగ్రత్తగా ఉండాలి. ఈ రెండింటిని ఎట్టి పరిస్థితుల్లో కలిపి తినకూడదు. జ్యూస్ చేసుకుని తాగకూడదు. ఎందుకంటే పుచ్చకాయలో నీటి శాతం ఎక్కువగా ఉంటుంది. అరటి పండులో డైటరీ ఫైబర్ ఎక్కువగా ఉంటుంది. ఈ రెండింటిని కలిపి తీసుకోవడం వల్ల జీర్ణవ్యవస్థ నిదానిస్తుంది. దీంతో కడుపులో అసౌకర్యంగా ఉంటుంది. గ్యాస్, ఎసిడిటీ, కడుపు నొప్పి, అజీర్తి వంటి సమస్యలు వచ్చే అవకాశం ఉంది. అయితే, వీటిని వేర్వేరుగా తింటే మాత్రం ఆరోగ్యానికి మేలు జరుగుతుంది.

జామ, అరటిపండు విషయంలో కూడా జాగ్రత్త

జామపండులో ఎన్నో పోషకాలు ఉన్నాయి. చలికాలంలో జామపండు తింటే ఎన్నో ఆరోగ్య ప్రయోజనాలు పొందవచ్చు. జామపండులో విటమిన్ సి ఎక్కువగా ఉంటుంది. దీంతో.. ఇమ్యూనిటీ పవర్ పెరుగుతుంది. రోగాలు రాకుండా అడ్డుకుంటుంది. ఇందులో డైటరీ ఫైబర్ అధికంగా ఉంటుంది. దీంతో.. మలబద్ధక సమస్యతో బాధపడేవారికి జామపండు అద్భుతంగా పనిచేస్తుంది. కానీ, జామను అరటి పండుతో కలిపి తినకూడదు. ఎందుకంటే ఈ రెండింటిలో డైటరీ ఫైబర్ అధికంగా ఉంటుంది. దీంతో.. ఈ రెండూ పండ్లు జీర్ణమవ్వడం కష్టంగా ఉంటుంది. దీంతో.. జీర్ణక్రియ మందగిస్తుంది. కడుపు నొప్పి, మలబద్ధకం సమస్యలు తీవ్రమయ్యే ప్రమాదముంది. అందుకే ఈ రెండింటిని కలిపి తీసుకోకూడదని నిపుణులు చెబుతున్నారు.

ఈ పండ్లు కూడా కలిపి తినకూడదు

* మామిడి, పైనాపిల్

* క్యారెట్, నారింజ

* నేరేడు, దానిమ్మ

* పైన చెప్పిన పండ్లను కలిపి తినడం వల్ల కడుపులో గందరగోళం ఏర్పడుతుంది. అంతేకాకుండా కిడ్నీలపై చెడు ప్రభావం చూపే అవకాశం ఉంది. గ్యాస్, ఎసిడిటీ, మలబద్ధకం వంటి జీర్ణ సమస్యలు వచ్చే అవకాశం ఉంది. అందుకే ఈ పండ్లను కలిపి ఎట్టి పరిస్థితుల్లో తినకూడదని నిపుణులు చెబుతున్నారు.