కశ్మీర్ అంశంపై ట్రంప్ స్పందన

భారత్, పాకిస్థాన్ దేశాలు కశ్మీర్ విషయంలో 1,000 ఏళ్లుగా కొట్టుకుంటూనే ఉన్నాయని అమెరికా అధ్యక్షుడు డొనాల్డ్ ట్రంప్ ఆసక్తికర వ్యాఖ్యలు చేశారు. ఇరు దేశాల మధ్య సరిహద్దుల్లో ఏకంగా 1,500 ఏళ్లుగా ఉద్రిక్తతలు నెలకొని ఉన్నాయని ఆయన పేర్కొన్నారు. ఇటీవలి పహల్గామ్ ఉగ్రదాడుల నేపథ్యంలో ఇరు దేశాల మధ్య ఉద్రిక్తతలు పెరిగిన తరుణంలో ట్రంప్ ఈ వ్యాఖ్యలు చేయడం గమనార్హం. ఆయన మాటలపై సోషల్ మీడియాలో నెటిజన్లు తీవ్ర విస్మయం, ఆగ్రహం వ్యక్తం చేస్తున్నారు.పోప్ ఫ్రాన్సిస్ అంత్యక్రియల కార్యక్రమానికి వాటికన్‌కు బయలుదేరే ముందు ట్రంప్ విలేకరులతో మాట్లాడారు. ఈ సందర్భంగా భారత్-పాక్ సంబంధాలపై స్పందిస్తూ, తనకు భారత్‌తోనూ, పాకిస్థాన్‌తోనూ సన్నిహిత సంబంధాలున్నాయని అన్నారు. సుదీర్ఘకాలంగా కొనసాగుతున్న కశ్మీర్ వివాదానికి ఇరు దేశాలు కచ్చితంగా ఏదో ఒక పరిష్కారం కనుగొంటాయని తాను విశ్వసిస్తున్నట్లు తెలిపారు. ఇటీవల జరిగిన దాడి ఉగ్రదాడి చాలా దురదృష్టకరం. ట్రంప్ వ్యాఖ్యలు వెలుగులోకి వచ్చిన వెంటనే, పలువురు సోషల్ మీడియా వినియోగదారులు 'ఎక్స్'  వేదికగా ఆయనపై విమర్శలు గుప్పించారు. "ఆయన చాలా ఇబ్బందికరంగా మాట్లాడుతున్నారు" అని ఒక వినియోగదారు వ్యాఖ్యానించగా, "కశ్మీర్ వివాదం గురించి ఆయనకంటే బాగా ఎవరికీ తెలియదు" అంటూ మరొకరు వ్యంగ్యంగా స్పందించారు. "వివిధ కాలాల్లో భూభాగాల పేర్లు మారినా, అదే ప్రాంతంపై గిరిజన యుద్ధాలు 8వ శతాబ్దం నుంచే ఉన్నాయి. మంచి ప్రయత్నం" అని మరో వినియోగదారు పేర్కొన్నారు.గతంలో తన అధ్యక్ష పదవి కాలంలో, ఇరు దేశాల నేతలు ఆసక్తి చూపితే కశ్మీర్ విషయంలో మధ్యవర్తిత్వం చేయడానికి తాను సిద్ధమని ట్రంప్ ప్రకటించిన విషయం తెలిసిందే. ఇదే విషయాన్ని ప్రధాని నరేంద్ర మోదీ తనను కోరినట్లు కూడా ట్రంప్ అప్పట్లో పేర్కొనగా, భారత్ ఆ వాదనను తీవ్రంగా ఖండించింది.