పాకిస్థాన్ మీదుగా స్వదేశం వెళ్లలేక ఇరాన్ మహిళా పర్యాటకురాలు ఇల్హామ్ ఇక్కట్లు

పహల్గామ్ ఉగ్రదాడి నేపథ్యంలో భారత్-పాకిస్థాన్ మధ్య అట్టారీ సరిహద్దును మూసివేయడంతో ఇరాన్‌కు చెందిన ఓ మహిళా పర్యాటకురాలు తీవ్ర ఇబ్బందులు ఎదుర్కొంటున్నారు. తన వీసా గడువు మరికొన్ని రోజుల్లో ముగియనుండటంతో, స్వదేశానికి తిరిగి వెళ్లే మార్గం లేక ఆమె ఆందోళన చెందుతున్నారు. ఈ విషయంలో తనకు సహాయం చేయాలని ఆమె ప్రధానమంత్రి నరేంద్ర మోదీ, కేంద్ర హోంమంత్రి అమిత్ షాకు విజ్ఞప్తి చేశారు.ఇల్హామ్ అనే ఈ ఇరాన్ పౌరురాలు, తన ప్రత్యేక వ్యాన్‌లో పాకిస్థాన్ మీదుగా ఫిబ్రవరి నెలలో పర్యాటకంగా భారత్‌కు వచ్చారు. ప్రస్తుతం ఇరాన్ తిరిగి వెళ్లాలని ప్రయత్నించగా, సరిహద్దు మూసి ఉండటంతో అధికారులు ఆమెను అనుమతించడం లేదు. దీంతో అట్టారీ వద్దే తన వ్యాన్‌లో నిద్రిస్తూ కాలం గడుపుతున్నానని, ఇక్కడ పూర్తిగా చిక్కుకుపోయానని ఆమె ఆవేదన వ్యక్తం చేశారు. "భారత్ నుంచి ఇరాన్ వెళ్లేందుకు ఇదే ఏకైక భూమార్గం. నన్ను అనుమతించకపోతే వేరే దారి కనిపించడం లేదు. దయచేసి ప్రధాని మోదీ, హోంమంత్రి అమిత్ షా నాకు సహాయం చేయాలి" అని ఆమె ఓ జాతీయ మీడియాతో అన్నారు.ఏప్రిల్ 22న పహల్గామ్‌లోని పచ్చికబయళ్లలో ఉగ్రవాదులు జరిపిన ఘాతుకంలో ఎక్కువ మంది పర్యాటకులతో సహా 26 మంది మరణించిన విషయం తెలిసిందే. ఈ దాడికి ప్రతిస్పందనగా, పాకిస్థాన్‌పై ప్రతీకార చర్యల్లో భాగంగా భారత్ అట్టారీ సరిహద్దు మార్గాన్ని మూసివేసింది. ఈ సరిహద్దు మూసివేత వల్ల తాను తీవ్రంగా నష్టపోతున్నానని ఇల్హామ్ వాపోయారు. సరిహద్దు వద్ద అధికారులు కేవలం పాకిస్థాన్ పాస్‌పోర్ట్ హోల్డర్లను మాత్రమే అనుమతిస్తామని స్పష్టం చేస్తున్నారని ఆమె తెలిపారు.తాను గతంలో భారత్‌లో చదువుకున్నానని, ఇక్కడి ప్రజలు, సంస్కృతి అంటే తనకు ఎంతో ఇష్టమని ఇల్హామ్ పేర్కొన్నారు. పహల్గామ్ ఉగ్రదాడి గురించి తెలిసినప్పుడు తాను ఎంతో బాధపడ్డానని, కన్నీళ్లు పెట్టుకున్నానని చెప్పారు. "నా రోడ్ వీసా మరికొన్ని రోజుల్లో ముగిసిపోతుంది. నేను ఇరాన్ తిరిగి వెళ్లాలి. ప్రస్తుతం నాకు వేరే మార్గం లేదు" అని ఆమె తన పరిస్థితిని వివరించారు.