14 ఏళ్ల చిచ్చరపిడుగు వైభవ్ సూర్యవంశీపై టీమిండియా మాజీ కోచ్ గ్రెగ్ చాపెల్ వ్యాఖ్యలు

భారత క్రికెట్‌లో సంచలనంగా మారుతున్న 14 ఏళ్ల యువ కెరటం వైభవ్ సూర్యవంశీ ప్రతిభను కాపాడుకోవాల్సిన బాధ్యత బీసీసీఐ, ఐపీఎల్ ఫ్రాంచైజీలపై ఉందని ఆసీస్ లెజెండ్, టీమిండియా మాజీ కోచ్ గ్రెగ్ చాపెల్ అన్నాడు. చిన్న వయసులోనే అసాధారణ ప్రతిభ కనబరుస్తున్న వైభవ్‌కు సరైన మార్గనిర్దేశం, మద్దతు లభించకపోతే దారి తప్పే ప్రమాదం ఉందని హెచ్చరించాడు.యువ క్రీడాకారుల భవిష్యత్తును తీర్చిదిద్దడంలో క్రికెట్ వ్యవస్థల పాత్ర కీలకమని గ్రెగ్ చాపెల్ అభిప్రాయపడ్డాడు. సచిన్ టెండూల్కర్ ప్రపంచ స్థాయి ఆటగాడిగా ఎదగడానికి అతని ప్రతిభతో పాటు, చిన్ననాటి కోచ్ మార్గనిర్దేశం, కుటుంబ సభ్యుల అండ ఎంతో దోహదపడ్డాయని గుర్తుచేశాడు. "సచిన్ విజయానికి కారణం కేవలం అతని ప్రతిభ మాత్రమే కాదు. భావోద్వేగ పరిపక్వత, కోచ్ మార్గదర్శకత్వం, బయటి ప్రపంచపు ఆకర్షణలకు లోనుకాకుండా కుటుంబం అందించిన రక్షణ కూడా కీలక పాత్ర పోషించాయి" అని చాపెల్ వివరించాడు.అయితే, సచిన్‌తో సమానమైన ప్రతిభ ఉన్న వినోద్ కాంబ్లీ చిన్న వయసులో వచ్చిన పేరు ప్రఖ్యాతులను, ఒత్తిడిని తట్టుకోలేకపోయాడని చాపెల్ పేర్కొన్నాడు. "వినోద్ కాంబ్లీ కూడా సచిన్ అంతటి ప్రతిభావంతుడే. కానీ చిన్న వయసులో వచ్చిన గుర్తింపును సరిగా నిర్వహించుకోలేక క్రమశిక్షణ కోల్పోయాడు. ఎంత వేగంగా పైకి వచ్చాడో, అంతే వేగంగా కనుమరుగయ్యాడు" అని అన్నాడు. ఇదే తరహాలో మరో యువ సంచలనం పృథ్వీ షా కూడా కెరీర్‌లో ఒడిదొడుకులు ఎదుర్కొంటున్నాడని, అయితే అతనికి మళ్లీ పుంజుకునే అవకాశం ఉండవచ్చని చాపెల్ అభిప్రాయపడ్డాడు.ఈ నేపథ్యంలో, వైభవ్ సూర్యవంశీ విషయంలో బీసీసీఐ, ఐపీఎల్ ఫ్రాంచైజీలు అత్యంత జాగ్రత్తగా వ్యవహరించాలని చాపెల్ సూచించారు. "యువ క్రీడాకారుల ప్రతిభను సరైన మార్గంలో నడిపించాల్సిన అవసరం ఉంది. వైభవ్‌ను కాపాడుకోవాలి. అతడిని మార్కెటింగ్ అవసరాల కోసం అతిగా ఉపయోగించుకోవద్దు" అని ఆయన స్పష్టం చేశాడు. చిన్న వయసులోనే వచ్చే కీర్తి ప్రతిష్ఠలు, వాణిజ్య ఒప్పందాల ఒత్తిడి వారి ఎదుగుదలకు ఆటంకం కాకుండా చూడాలని హితవు పలికాడు.