స్కూటీ డ్రైవ్ చేసిన ఎద్దు.. ఈ వీడియో ఇప్పుడు తెగ వైరల్

మనుషులంటే సైకిల్ మొదలు రాకెట్ల వరకు దేన్ని అయినా హ్యాండిల్ చేయగలరు.. అలవోకగా నడిపించగలరు. ఎందుకంటే ఆయా వాహనాల మెకానిజం గురించి మనకు ఓ అవగాహన ఉంటుంది కనుక. అయితే అప్పుడప్పుడు జంతువులు కూడా వాహనాల మీద ప్రయోగాలు చేస్తుంటాయి. వాటిని డ్రైవ్ చేసి తమ సరదా తీర్చుంటాయి. తాజాగా ఈ కోవకు చెందిన వీడియో ఒకటి వెలుగులోకి వచ్చింది.

స్కూటీని చూసి మనసు పారేసుకున్న ఓ ఎద్దు.. సరాదగా దాన్ని డ్రైవ్ చేయాలని భావించింది. ఇంకేముంది స్కూటీ దగ్గరకు పోయి.. కొమ్ములతో హ్యాండిల్ పట్టుకుని.. కొద్ది దూరం చక్కా డ్రైవ్ చేసింది. ప్రస్తుతం ఇందుకు సంబంధించిన వీడియో సోషల్ మీడియాలో తెగ వైరల్ అవుతోంది. ఎద్దు డ్రైవింగ్ స్కిల్స్ చూసిన వాళ్లు.. అన్ బుల్ ఈవబుల్ అని కామెంట్స్ చేస్తున్నారు. ఆ వివరాలు.

ఈ విచిత్ర సంఘటన ఉత్తరాఖండ్, డెహ్రాడూన్ జిల్లా రిషికేష్, గుమానివాలా ప్రాంతంలో చోటు చేసుకుంది. రోడ్డు మీద ఉన్న సీసీటీవీ కెమరాల్లో ఎద్దు డ్రైవింగ్ స్కిల్స్ రికార్డ్ అయ్యాయి. ఈ సంఘటన మే 2, శుక్రవారం మధ్యాహ్నం 12.30 గంటల ప్రాంతంలో చోటు చేసుకుంది. నిర్మానుష్యమైన వీధిలో ఎద్దు ఒకటి నడుచుకుంటూ వెళ్తుంది. అలా వెళ్తున్న ఎద్దు కంట్లో ఓ ఇంటి ముందు పార్క్ చేసి ఉన్న తెలుపు రంగు హీరో మ్యాస్ట్రో స్కూటీ పడింది. మరి దాని కలర్‌కి ఫిదా అయ్యిందో.. లేక స్కూటీ అని అర్థం అయ్యిందో తెలియదు కానీ.. ఆ ఎద్దు మాత్రం తెల్ల బుజ్జి స్కూటీ మీద ఓ రౌండ్ తిరిగి రావాలనుకుందేమో.

ఇంకేముందు చుట్టుపక్కల జనాలు కూడా పెద్దగా లేరు. దాంతో ఆ ఎద్దు చక్కా స్కూటీ దగ్గరకు వెళ్లి.. తన కొమ్ములతో హ్యాండిల్‌ను పట్టుకుని.. కొద్ది దూరం ముందుకు నడిపించుకుంటూ వెళ్లింది. పర్లేదు నాకు కూడా డ్రైవింగ్ వచ్చింది అనుకుందో ఏమో.. ఓ పక్కకు ఆపి వెళ్లిపోయింది. ఇక అదే రోడ్డులో ఓ తల్లి తన కుమార్తెను స్కూల్ నుంచి ఇంటికి తీసుకెళ్తుంది. ఎద్దు స్కూటీని డ్రైవ్ చేస్తున్న దృశ్యం ఆమె కంటపడి భయంతో వణికిపోయింది. అయితే ఇక్కడ ఎద్దు నిజంగానే స్కూటీని డ్రైవ్ చేయలేదు. రోడ్డు కాస్త వాలుగా ఉండటంతో.. అలా కిందకు వెళ్లిపోయి.. ఓ చోట గేటుకు తగిలి ఆగిపోయింది.

ఆ తర్వాత ఎద్దు కూడా అక్కడ నుంచి వెళ్లిపోయింది. సుమారు 32 సెకన్ల నిడివి ఉన్న ఈ వీడియో ఇంటర్నెట్‌ని షేక్ చేస్తుంది. వీడియో చూసిన నెటిజనులు అన్ బుల్ ఈవబుల్.. మాకన్నా బాగా డ్రైవ్ చేస్తున్నావ్ కదా.. స్కూటీ మీద ఎద్దు షికారు సూపరో సూపరు అని కామెంట్స్ చేస్తున్నారు. జంతువులకు మనకన్నా తెలివితేటలు కాస్త ఎక్కువే అంటున్నారు.