ఉగ్రవాద దాడుల నుంచి భద్రత కల్పించాలని కోరుతూ దాఖలైన ప్రజా ప్రయోజన వ్యాజ్యం సుప్రీంకోర్టు తీవ్ర ఆగ్రహం వ్యక్తం చేసింది

జమ్మూకశ్మీర్ లో విహారయాత్రకు వచ్చే పర్యాటకులకు ఉగ్రవాద దాడుల నుంచి భద్రత కల్పించాలని కోరుతూ దాఖలైన ప్రజా ప్రయోజన వ్యాజ్యం  సుప్రీంకోర్టు తీవ్ర ఆగ్రహం వ్యక్తం చేసింది. ఇది కేవలం ప్రచారం కోసమే దాఖలు చేసిన పిటిషన్ అని, ఇందులో నిజమైన ప్రజా ప్రయోజనం ఏమాత్రం లేదని సర్వోన్నత న్యాయస్థానం నేడు వ్యాఖ్యానించింది. ఇలాంటి పిటిషన్లు భద్రతా దళాల స్థైర్యాన్ని దెబ్బతీస్తాయని హితవు పలికింది.జస్టిస్ సూర్య కాంత్, జస్టిస్ ఎన్ కోటీశ్వర్ సింగ్‌లతో కూడిన ధర్మాసనం ఈ పిటిషన్‌ను విచారించింది. పిటిషనర్, న్యాయవాది అయిన విశాల్ తివారీని ఉద్దేశించి ధర్మాసనం తీవ్ర స్వరంతో స్పందించింది. "ఇలాంటి పిల్ ఎందుకు దాఖలు చేశారు మీ అసలు ఉద్దేశం ఏమిటి ఈ అంశంలో ఉన్న సున్నితత్వం మీకు అర్థం కావడం లేదా ఈ పిటిషన్ దాఖలు చేసినందుకు మీకు భారీ జరిమానా విధించాల్సి వస్తుందని మేము భావిస్తున్నాము" అని జస్టిస్ సూర్య కాంత్ వ్యాఖ్యానించారు. దీనిపై పిటిషనర్ స్పందిస్తూ, జమ్మూ కశ్మీర్‌లో పర్యాటకులను లక్ష్యంగా చేసుకోవడం ఇదే మొదటిసారని, అందుకే వారి భద్రత కోసం ఆదేశాలు కోరుతున్నానని తెలిపారు.అయితే, ధర్మాసనం పిటిషనర్ వాదనతో ఏకీభవించలేదు. "పిటిషనర్ ఒకదాని తర్వాత ఒకటిగా ప్రజా ప్రయోజన వ్యాజ్యాలు దాఖలు చేస్తున్నారని, వీటి వెనుక అసలు ప్రజా ప్రయోజనం కంటే ప్రచార ఆర్భాటమే ప్రధానంగా కనిపిస్తోందని" తమ ఉత్తర్వుల్లో పేర్కొంది.ఇటీవల జమ్మూ కశ్మీర్‌లోని పెహల్గామ్‌లో జరిగిన ఘోర ఉగ్రదాడిపై సుప్రీంకోర్టు రిటైర్డ్ న్యాయమూర్తి పర్యవేక్షణలో న్యాయ విచారణ జరపాలని కోరుతూ దాఖలైన పిటిషన్లను కూడా సర్వోన్నత న్యాయస్థానం తిరస్కరించిన సంగతి తెలిసిందే. ఆ సమయంలో కూడా న్యాయస్థానం ఇలాంటి వ్యాజ్యాలపై అసంతృప్తి వ్యక్తం చేసింది. "ఇలాంటి పిల్‌లు దాఖలు చేసే ముందు బాధ్యతాయుతంగా వ్యవహరించండి. దేశం పట్ల మీకు కూడా కొంత బాధ్యత ఉంటుంది. ఈ విధంగా మీరు భద్రతా దళాల స్థైర్యాన్ని దెబ్బతీయాలనుకుంటున్నారా ఉగ్రవాద దాడుల దర్యాప్తులో మాకు ఎప్పటి నుంచి నైపుణ్యం వచ్చింది? దళాల స్థైర్యాన్ని దెబ్బతీసే ఇలాంటి పిల్‌లు దాఖలు చేయవద్దు" అని ధర్మాసనం స్పష్టం చేసింది. న్యాయమూర్తులు ఉగ్రవాద కేసుల దర్యాప్తులో నిపుణులు కారని, ఇలాంటి సున్నితమైన విషయాల్లో పిటిషన్లు దాఖలు చేసేటప్పుడు బాధ్యత అవసరమని కోర్టు నొక్కి చెప్పింది.