ఏపీలో విచిత్రం.. ఓవైపు వర్షాలు, మరోవైపు ఎండలు

ఏపీలో ఎండలు, వానలతో ప్రజలు తీవ్ర ఉక్కిరి బిక్కిరి అవుతున్నారు. రాష్ట్రంలోని పలు జిల్లాలను భారీ వర్షాలు, ఉరుములు, పిడుగులు భయపెడుతుండగా.. మరికొన్ని జిల్లాలను మాత్రం భానుడు వణికిస్తున్నాడు. కొన్ని జిల్లాల్లో ఈదురు గాలులతో కూడిన వానలు పడుతుండగా.. మరికొన్ని జిల్లాలు మాత్రం ఎండ వేడిమిని తట్టుకోలేకపోతున్నాయి. ఇక రానున్న రోజుల్లో కూడా ఇదే రకమైన వాతావరణం ఉంటుందని వాతావరణ శాఖ అంచనా వేసింది. మరోవైపు.. ఇలాంటి పరిస్థితుల్లో ఏపీలోని కూటమి ప్రభుత్వం చర్యలు తీసుకుంటోంది. వర్షాలు పడే జిల్లాల్లోని ప్రజలు అప్రమత్తంగా ఉండాలని సూచిస్తోంది. ఇక ఎండలు ఎక్కువగా ఉన్న జిల్లాల్లోని ప్రజలు.. మధ్యాహ్నం వేళ.. అత్యవసరం అయితే తప్ప ఇళ్ల నుంచి బయటికి రావద్దని హితవు పలికింది.

మరోవైపు.. రేపు(మంగళవారం) శ్రీకాకుళం, విజయనగరం, మన్యం, అల్లూరి, అనకాపల్లి, పల్నాడు, ప్రకాశం జిల్లాల్లో పలుచోట్ల పిడుగులతో కూడిన మోస్తారు నుంచి భారీ వర్షాలు కురుస్తాయని.. ఆంధ్రప్రదేశ్ రాష్ట్ర విపత్తు నిర్వహణ సంస్థ ఏపీఎస్‌డీఎంఏ డైరెక్టర్ రోణంకి కూర్మనాథ్ వెల్లడించారు. అదే సమయంలో గంటకు 50 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉందని తెలిపారు. హోర్డింగ్స్, చెట్లు, శిథిలావస్థలో ఉన్న గోడలు, భవనాలు వద్ద నిలబడవద్దని సూచించారు.

అదే సమయంలో విశాఖ, కాకినాడ, కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, నెల్లూరు, కర్నూలు, నంద్యాల, అనంతపురం, శ్రీ సత్యసాయి, వైఎస్సార్, అన్నమయ్య, చిత్తూరు, తిరుపతి జిల్లాల్లో అక్కడక్కడా పిడుగులతో కూడిన తేలికపాటి వర్షాలు కురిసే అవకాశాలు ఉన్నాయని ఏపీఎస్‌డీఎంఏ డైరెక్టర్ రోణంకి కూర్మనాథ్ తెలిపారు.

ఇక.. రాష్ట్రంలో పలు జిల్లాల్లో భానుడు తన ప్రతాపం చూపించనున్నాడని పేర్కొన్నారు. కొన్ని జిల్లాల్లో గరిష్ఠంగా 41 డిగ్రీల నుంచి 43 డిగ్రీల మధ్య రికార్డు అయ్యే అవకాశాలు ఉన్నాయని వెల్లడించారురు. సోమవారం నంద్యాల జిల్లా పసుపులలో 42.5 డిగ్రీలు, వైఎస్సార్ జిల్లా జమ్మలమడుగులో 42.4 డిగ్రీలు, పల్నాడు జిల్లా రావిపాడులో 42.1 డిగ్రీలు, కర్నూలు జిల్లా కలుగోట్ల 41.8 డిగ్రీల చొప్పున అధిక ఉష్ణోగ్రతలు నమోదైనట్లు తెలిపారు.