కశ్మీర్‌లో భద్రతా సిబ్బందితో కలిసి బీజేపీ నేత రీల్స్

జమ్ము కశ్మీర్ బీజేపీ మాజీ అధ్యక్షుడు రవీందర్ రైనా తాజాగా జమ్ము కశ్మీర్ వెళ్లారు. మంచు కొండల్లో కొందరు భద్రతా బలగాలతో కలిసి ఓ రీల్ చేశారు. ముఖ్యంగా వారంతా నవ్వుతూ ముందుకు పరిగెట్టుకుంటూ వస్తుండగా.. గులాల్ సినిమాలోని ఆరంభ్ హై ప్రచంద్ పాట ప్లే అవుతోంది. అయితే ఆదివారం రోజు రవీందర్ రైనా ఈ రీల్ పోస్ట్ చేయగా.. క్షణాల్లోనే నెట్టింట వైరల్ అయింది. ముఖ్యంగా ఇది చూసిన కాంగ్రెస్ నేతలంతా తీవ్ర ఆగ్రహం వ్యక్తం చేస్తున్నారు. పహల్గాం దాడితో భారత్, పాక్ దేశాల మధ్య ఉద్రిక్తతలు నడుస్తుండగా.. ఆర్మీ సమయాన్ని పాడు చేస్తూ ఇలా చేయడం సరికాదంటూ కామెంట్లు చేస్తున్నారు. ఆ పూర్తి వివరాలు మీకోసం.

జమ్ము కశ్మీర్ బీజేపీ మాజీ అధ్యక్షుడు రవీందర్ రైనా ఇటీవలే మంచుకొండల్లోకి వెళ్లారు. అక్కడే ఓ పది మంది వరకు భద్రతా సిబ్బందితో కలిసి రీల్ చేశారు. ముఖ్యంగా నవ్వులు చిందిస్తూ.. వారి మధ్యలో నిల్చొని ముందుకు పరుగులు పెడుతూ వచ్చారు. బ్యాగ్రౌండ్‌లో 2009వ సంవత్సరంలో విడుదల అయిన "గులాల్" సినిమాలోని "ఆరంభ్ హై ప్రచంద్" పాట ప్లే అవుతుంది. అయితే ఈ వీడియోను నేరుగా ఆయనే మే 4వ తేదీ ఆదివారం రోజు ఎక్స్ వేదికగా షేర్ చేశారు. జైహింద్ అంటూ క్యాప్షన్ కూడా రాసుకొచ్చారు. దీంతో ఈ వీడియో కాస్తా క్షణాల్లోనే నెట్టింట వైరల్‌గా మారింది.

  ముఖ్యంగా ఆయన అభిమానులు, పార్టీ శ్రేణులు ఆయన రీల్‌ను చూస్తూ తెగ ఎంజాయ్ చేశారు. లైకులు, కామెంట్లు చేస్తూ మరింత వైరల్ అయ్యేలా చేశారు. కానీ ఈ రీల్‌పై కాంగ్రెస్ నేతలు తీవ్ర ఆగ్రహం వ్యక్తం చేస్తున్నారు. పహల్గాం ఉగ్రదాడితో దేశం అంతా బాధ పడుతూ నిందితులను చంపాలని చూస్తుంటూ.. బీజేపీ నేత మాత్రం రీల్స్ చేస్తూ ఎంజాయ్ చేస్తున్నారని కాంగ్రెస్ నేత సుప్రియా శ్రీనాథే మండిపడ్డారు. ముఖ్యంగా పాక్‌తో ఉద్రిక్తతల వేళ.. సిబ్బందిని తనతో తిప్పుకుంటూ వారి సమయాన్ని వృథా చేస్తున్నారని అన్నారు. ఇలాంటి నేతలు బాధ్యతా రాహిత్యంగా వ్యవహరిస్తుంటే ప్రధాని మోదీ, బీజేపీ చీఫ్ జేడీ నడ్డా మౌనంగా ఉంటారా అని ప్రశ్నించారు.

మరోవైపు శివసేన నేత ప్రియాంక చతుర్వేది మాట్లాడుతూ.. తమ పార్టీ నేతలకు ఐదారుగురు భద్రతా సిబ్బందిని ఏర్పాటు చేసిన బీజేపీ.. పర్యటకుల భద్రత కోసం పహల్గాంలో ఒక్క సైనికుడిని కూడా ఏర్పాటు చేయలేకపోయిందంటూ ఆసహనం వ్యక్తం చేశారు. ఇకనైనా జాగ్రత్తగా వ్యవహరిస్తూ.. దేశ సరిహద్దులను కాపాడాలని సూచించారు. అలాగే బాధ్యతా రాహిత్యంగా వ్యవహరించే ఇలాంటి నేతలకు సరైన బుద్ధి చెప్పాలని పేర్కొన్నారు.