శ్రీశైలం ఆలయంలో,,,హుండీని పగలగొట్టి కానుకలు దొంగిలించడానికి ప్రయత్నించగా,

శ్రీశైలం మల్లన్న ఆలయంలో దొంగతనం కలకలం రేపింది.. ఆలయంలోని హుండీలో కానుకలు దొంగిలించడానికి కొందరు బాలురు ప్రయత్నించారు. ఈ ఘటన ఈనెల 1న జరగ్గా.. ఆలయ అధికారులు వెంటనే స్పందించి ఇద్దరిని పట్టుకున్నారు. శ్రీశైల మహాక్షేత్రంలోని మల్లికార్జునస్వామి ఆలయంలోకి నలుగురు బాలురు ప్రవేశించారు.. అక్కడ ఉన్న వస్త్రంతో చేసిన హుండీని కోశారు.. దొంగతనానికి ప్రయత్నించారు. ఆలయ పర్యవేక్షకులు, ఇన్‌స్పెక్టర్‌ ఈ విషయాన్ని గమనించి.. వారిపై నిఘా ఉంచారు. మరోసారి దొంగతనానికి ప్రయత్నిస్తుండగా ఇద్దరిని పట్టుకున్నారు.. వెంటనే ఈ విషయాన్ని ఈవో ఎం శ్రీనివాసరావు దృష్టికి తీసుకెళ్లారు.

ఈ ఘటనపై వన్‌టౌన్ పోలీస్‌స్టేషన్‌లో ఫిర్యాదు చేయడంతో సీఐ ఆధ్వర్యంలో పోలీసులు విచారణ చేశారు.. అప్పుడు కొన్ని విషయాలు తెలిశాయి. స్థానికేతరులైన ఒక వ్యక్తి, ఒక మహిళ కలిసి ఈ దొంగతనానికి ప్లాన్ చేశారు.. వారిద్దరిని పోలీసులు అదుపులోకి తీసుకున్నారు. అయితే మల్లన్న ఆలయం హుండీలో చోరీ ప్రయత్నం ఉదయం షిఫ్ట్‌లో జరిగింది. ఈ చోరీ సమయంలో విధుల్లో ఉన్న ఆలయ ఇన్‌స్పెక్టర్‌ దీన్ని గుర్తించలేదు.. దీంతో ఈవో ఆయన్ను సస్పెండ్ చేసినట్లు తెలుస్తోంది. పటిష్ట భద్రత మధ్య ఉండే ఆలయ హుండీని కోసి దొంగతనానికి ప్రయత్నించడం కలకలం రేపింది. దేవస్థానం సెక్యూరిటీ, హోంగార్డు సిబ్బంది ఎందుకు గుర్తించలేకపోయారన్న విమర్శలు వచ్చాయి. ఇంత భద్రత ఉన్నా దొంగతనం ఎలా జరిగిందని ప్రశ్నిస్తున్నారు.

ఆలయంలో సీసీ టీవీని పర్యవేక్షిస్తున్న అధికారులు ఇద్దరు మైనర్లను పట్టుకుని.. వారి దగ్గర నుంచి రూ.10,150 డబ్బులు స్వాధీనం చేసుకున్నారట. శ్రీశైలం దేవస్థానం ఈవో ఆదేశాలతో కేసు నమోదు చేసిన పోలీసులు రహస్యంగా విచారణ చేసినట్లు తెలుస్తోంది. ఆలయ హుండీలో చోరీకి పాల్పడిన ఇద్దరు మైనర్లతో పాటుగా మరో ఇద్దరు మేజర్లను కూడా కేసు నమోదు చేసి రిమాండ్‌కు తరలించినట్లుగా సమాచారం. ఇటీవల కాలంలో ఇద్దరు మైనర్లు దర్శనం పేరుతో క్యూలైన్లలో ఆలయంలోకి వచ్చి.. ఇలా దొంగతనానికి పాల్పడుతున్నారనే అనే అనుమానాలు వ్యక్తమవుతున్నాయటన. ఈ చోరీ అంశంపై శ్రీశైలం ఆలయ అధికారులు స్పందించాల్సి ఉంది.