తిరుమలలో హై అలర్ట్.. భారత్-పాక్ ఉద్రిక్తతల నేపథ్యంలో భద్రత కట్టుదిట్టం..!
Andhra Pradesh Telugu | Suryaa Desk | Published : Fri, May 09, 2025, 01:14 PM
భారత్-పాకిస్తాన్ మధ్య నెలకొన్న ఉద్రిక్త పరిస్థితులు, యుద్ధ ఆందోళనల నేపథ్యంలో పవిత్ర తిరుమల క్షేత్రంలో హై అలర్ట్ ప్రకటించారు. భద్రతా చర్యలను మరింత కట్టుదిట్టం చేసేందుకు అధికారులు చర్యలు చేపట్టారు. ఈ మేరకు జిల్లా ఎస్పీ హర్షవర్ధన్ రాజు ఆధ్వర్యంలో తిరుమల భద్రతపై ప్రత్యేక సమావేశం జరిగింది. పోలీసులు, విజిలెన్స్, ఆక్టోపస్ బలగాలకు ఆయన కీలక సూచనలు జారీ చేశారు. భక్తుల రక్షణే ప్రధాన లక్ష్యంగా, అనుమానిత వ్యక్తులు, వస్తువులపై నిశితంగా గమనించాలని ఆదేశించారు.
ఈ నేపథ్యంలో బస్టాండ్, రైల్వే స్టేషన్, శ్రీనివాసం, విష్ణునివాసం వంటి కీలక ప్రాంతాల్లో తనిఖీలు ముమ్మరం చేశారు. ప్రతి ప్రాంతంలోనూ అదనపు భద్రతా సిబ్బందిని మోహరించి, సీసీ కెమెరాల ద్వారా నిరంతర నిఘాను ఏర్పాటు చేశారు. భక్తులు ఎటువంటి ఆందోళన చెందాల్సిన అవసరం లేదని, అయితే అప్రమత్తంగా ఉండాలని అధికారులు సూచించారు. ఏదైనా అనుమానాస్పద వ్యక్తి లేదా వస్తువు కనిపిస్తే వెంటనే పోలీసులకు సమాచారం అందించాలని కోరారు. తిరుమలలో శాంతి, భద్రతలను కాపాడేందుకు అధికారులు అన్ని రకాల చర్యలు తీసుకుంటున్నారు.
|
|