క్రెడిట్ కార్డు వాడుతున్నారా? ఈ తప్పులు చేయొద్దు

క్రెడిట్ కార్డులు వాడటం ఎంత సౌకర్యంగా ఉంటుందో, వాటి నిర్వహణలో చిన్నపాటి అజాగ్రత్త వహించినా క్రెడిట్ స్కోరు పడిపోయే ప్రమాదం ఉంది. ఈ రోజుల్లో రుణాలు పొందాలన్నా, ఇతర ఆర్థిక లావాదేవీలు జరగాలన్నా క్రెడిట్ స్కోరు ఎంతో కీలకం. కాబట్టి, మీ క్రెడిట్ కార్డు వినియోగం మీ స్కోర్‌ను తగ్గించకుండా ఉండాలంటే, కొన్ని సాధారణ తప్పులను ఖచ్చితంగా నివారించాలి.

1. చెల్లింపులు ఆలస్యం చేయడం: క్రెడిట్ కార్డు బిల్లులను ఎల్లప్పుడూ నిర్ణీత గడువులోగా చెల్లించాలి. ఒక్కసారి పేమెంట్ లేట్ అయినా బ్యాంకులు ఆలస్య రుసుములు, అధిక వడ్డీ విధిస్తాయి. అంతేకాకుండా, ఈ విషయాన్ని క్రెడిట్ బ్యూరోలకు నివేదిస్తాయి, ఫలితంగా మీ క్రెడిట్ స్కోరు గణనీయంగా తగ్గుతుంది. దీనికి పరిష్కారంగా, మీ బ్యాంకు ఖాతా నుంచి నేరుగా గడువు తేదీకి ఒక రోజు ముందు బిల్లు చెల్లించే ఏర్పాటు చేసుకోవడం ఉత్తమం.

2. కనీస మొత్తాన్ని మాత్రమే చెల్లించడం: క్రెడిట్ కార్డు బిల్లులో కేవలం కనీస మొత్తాన్ని మాత్రమే చెల్లిస్తూ వెళ్లడం మంచి అలవాటు కాదు. ఇలా చేస్తే, మిగిలిన బకాయిపై వడ్డీ పెరుగుతూనే ఉంటుంది, చివరికి మీ అప్పు తీరని స్థాయికి చేరుకుంటుంది. ఇది కూడా మీ క్రెడిట్ స్కోర్‌ను ప్రతికూలంగా ప్రభావితం చేస్తుంది. ప్రతి నెలా మీ పూర్తి బకాయిని చెల్లించడానికి ప్రయత్నించండి. అలా చేయగలనుకున్నప్పుడే క్రెడిట్ కార్డును ఉపయోగించడం మంచిది.

3. క్రెడిట్ లిమిట్ పూర్తిగా ఉపయోగించడం: మీ క్రెడిట్ కార్డుకు ఉన్న పరిమితిని పూర్తిగా లేదా ఎక్కువ శాతం ఉపయోగించడం మీ క్రెడిట్ స్కోర్‌కు ప్రమాదకరం. మీ మొత్తం క్రెడిట్ పరిమితిలో 30 శాతానికి మించి ఎట్టి పరిస్థితుల్లోనూ ఉపయోగించకూడదు. ఉదాహరణకు, మీ కార్డు పరిమితి రూ. లక్ష ఉంటే, మీరు రూ. 30 వేలకు మించి కొనుగోలు చేయకూడదు. అధిక వినియోగం మీరు ఆర్థికంగా ఒత్తిడిలో ఉన్నారని సూచిస్తుంది, ఇది మీ స్కోర్‌ను తగ్గిస్తుంది.

4. పాత క్రెడిట్ కార్డులను రద్దు చేయడం: మీరు చాలా కాలంగా ఉపయోగిస్తున్న క్రెడిట్ కార్డులను రద్దు చేయడం మంచిది కాదు. ఇలా చేయడం వల్ల మీ సుదీర్ఘమైన క్రెడిట్ హిస్టరీ తొలగిపోతుంది, ఇది మీ స్కోర్‌పై ప్రతికూల ప్రభావం చూపుతుంది. ఒకవేళ మీరు కార్డులను రద్దు చేయాలనుకుంటే, కొత్తగా తీసుకున్న కార్డులను రద్దు చేయడం ఉత్తమం. పాత కార్డులను ఇనాక్టివ్‌లో ఉంచినా ఫర్వాలేదు.

5. స్టేట్‌మెంట్‌ను తనిఖీ చేయకపోవడం: ప్రతి నెలా మీ క్రెడిట్ కార్డు కొనుగోళ్లకు సంబంధించిన స్టేట్‌మెంట్‌ను తప్పకుండా తనిఖీ చేయండి. అందులో ఏమైనా అనధికారిక లావాదేవీలు లేదా తప్పులు ఉంటే వెంటనే బ్యాంకును సంప్రదించండి. అలాగే, మీ క్రెడిట్ రిపోర్టులో కూడా మీ క్రెడిట్ కార్డు చెల్లింపులకు సంబంధించిన వివరాలను క్రమం తప్పకుండా పరిశీలించాలి. ఏమైనా లోపాలు కనిపిస్తే, వెంటనే క్రెడిట్ బ్యూరోలకు తెలియజేయాలి.

ఈ జాగ్రత్తలు తీసుకోవడం ద్వారా మీ క్రెడిట్ స్కోర్‌ను పదిలంగా ఉంచుకోవచ్చు. భవిష్యత్తులో రుణాలు లేదా ఇతర ఆర్థిక అవసరాల కోసం సులభంగా అర్హత సాధించవచ్చు.