ట్రంప్ 'గోల్డెన్' ఆఫర్.. చైనాపై సుంకాలు భారీగా తగ్గింపు

అంతర్జాతీయ వాణిజ్య రంగంలో మరో సంచలనం. అమెరికా అధ్యక్షుడు డొనాల్డ్ ట్రంప్ తీసుకునే ఒక్కో నిర్ణయం ప్రపంచ ఆర్థిక వ్యవస్థపై తీవ్ర ప్రభావం చూపిస్తుందన్న సంగతి తెలిసిందే. తాజాగా చైనాకు 'గోల్డెన్' ఆఫర్ ఇచ్చారు ట్రంప్. చైనా ఉత్పత్తులపై విధిస్తున్న సుంకాలు 145 శాతం నుంచి 80 శాతానికి తగ్గిస్తానని ప్రకటించారు. దీంతో అంతర్జాతీయంగా బంగారం ధరలు భారీగా పతనమయ్యే అవకాశం ఉందని నిపుణులు అంచనా వేస్తున్నారు. ట్రంప్ తీసుకున్న ఈ నిర్ణయం బంగారం ప్రియులకు నిజంగానే 'గోల్డెన్' ఆఫర్ అనే చెప్పాలి.

ఈ వారాంతంలో అమెరికా, చైనా వాణిజ్య అధికారుల మధ్య స్విట్జర్లాండ్‌లో కీలక సమావేశం జరగనుంది. ఈ సమావేశానికి ముందు ట్రంప్ ఈ ప్రతిపాదన చేయడం గమనార్హం. చైనా ఉత్పత్తులపై ట్రంప్ భారీగా సుంకాలు విధించిన తర్వాత, ఇరు దేశాల మధ్య వాణిజ్య యుద్ధం తీవ్రమైంది. ఇప్పుడు మొదటిసారిగా ఇరు దేశాల అధికారులు చర్చలు జరపనున్నారు. "చైనాపై 80 శాతం సుంకం సరైనది" అని ట్రంప్ తన సోషల్ మీడియా ఖాతాలో పేర్కొన్నారు. ప్రస్తుతం చైనాపై అమెరికా సుంకాలు 145 శాతం, అమెరికాపై చైనా సుంకాలు 125 శాతంగా ఉన్నాయి.

ట్రంప్ తీసుకున్న ఈ నిర్ణయం బంగారం ధరలపై తీవ్ర ప్రభావం చూపే అవకాశం ఉందని నిపుణులు అంటున్నారు. ఇటీవల బంగారం ధరలు భారీగా పెరిగాయి. అయితే, ఈ వారం అమెరికా-చైనా ప్రతినిధులు సమావేశం కానున్నారనే వార్తలు రావడంతో బంగారం డిమాండ్ తగ్గి ధరలు పతనమయ్యాయి. దీనికి తోడు బ్రిటన్‌తో గొప్ప వాణిజ్య ఒప్పందం చేసుకున్నట్లు ట్రంప్ ప్రకటించడం కూడా అంతర్జాతీయంగా ఆర్థిక అనిశ్చితిని, వాణిజ్య యుద్ధ భయాలను తగ్గించింది. దీంతో డాలర్ విలువ పెరిగి, బంగారం ధరలు తగ్గుముఖం పట్టాయి.

ఇప్పుడు తాజాగా చైనాపై సుంకాలు తగ్గించనున్నట్లు ట్రంప్ చేసిన ప్రకటనతో బంగారం ధరలు మరింత తగ్గే అవకాశం ఉందని నిపుణులు అంచనా వేస్తున్నారు. "ఇది బులియన్ మార్కెట్‌కు బిగ్ రిలీఫ్. చైనాపై సుంకాలు తగ్గించడం వల్ల వాణిజ్య యుద్ధ భయాలు తగ్గుతాయి. దీంతో డాలర్ బలోపేతం అవుతుంది. ఇది బంగారం ధరలను తగ్గిస్తుంది" అని ప్రముఖ ఆర్థిక విశ్లేషకుడు రాహుల్ శర్మ అన్నారు.

ప్రస్తుతం ఇంటర్నేషనల్ మార్కెట్లో బంగారం ధరలు భారీగా తగ్గుతున్నాయి. 2 రోజుల కిందట స్పాట్ గోల్డ్ రేటు ఔన్సుపై 3400 డాలర్లపైన ట్రేడవగా.. ఇప్పుడు 3325 డాలర్ల వద్ద స్థిరపడింది. శని, ఆదివారాలు బులియన్ మార్కెట్‌కు సెలవు. మరి సోమవారం రోజు ఏం జరుగుతుందో చూడాలి. బ్రిటన్‌తో డీల్ ప్రకటన తర్వాత బంగారం ధరలు దేశీయంగా కూడా భారీగా దిగొచ్చిన సంగతి తెలిసిందే.

"ట్రంప్ తీసుకునే ఒక్కో నిర్ణయం ప్రపంచ ఆర్థిక వ్యవస్థను ప్రభావితం చేస్తుంది. చైనాపై సుంకాలు తగ్గించడం వల్ల బంగారం ధరలు తగ్గుతాయి. అయితే, ఇది ఎంతకాలం కొనసాగుతుందో చెప్పలేం. ట్రంప్ ఎప్పుడు ఏ నిర్ణయం తీసుకుంటారో ఎవరికీ తెలియదు" అని మరొక విశ్లేషకుడు సురేంద్ర నాథ్ అన్నారు.

అయితే, ట్రంప్ ఈ 80 శాతం సుంకాన్ని చైనాకు దీర్ఘకాలిక సుంకంగా ఉంచాలనుకుంటున్నారా, లేదా చర్చలలో ఒక భాగంగా చూడాలనుకుంటున్నారా అనేది స్పష్టంగా తెలియదు. "చైనా తన మార్కెట్‌ను అమెరికాకు తెరవాలి. ఇది వారికి చాలా మంచిది. మూసివేసిన మార్కెట్‌లు ఇకపై పనిచేయవు." అని ట్రంప్ మరొక సోషల్ మీడియా పోస్ట్‌లో పేర్కొన్నారు. ఈ వారాంతంలో స్విట్జర్లాండ్‌లో జరిగే చర్చలు పూర్తి వాణిజ్య ఒప్పందానికి దారితీస్తాయని భావించడం లేదు. ఈ చర్చలు స్థిరత్వానికి దారితీయాలని అమెరికా వాణిజ్య ప్రతినిధి జేమిసన్ గ్రీర్ అన్నారు.

తాజా షిప్పింగ్ డేటా.. చైనా నుంచి అమెరికాకు వస్తువుల రవాణాలో భారీ తగ్గుదలను చూపిస్తుంది, ఇది రాబోయే వారాల్లో కొన్ని వస్తువుల ధరలు పెరగడానికి లేదా కొరతకు దారితీసే అవకాశం గురించి ఆందోళనలను పెంచుతోంది. చైనా సుంకాలపై శుక్రవారం చేసిన వ్యాఖ్యలు.. ట్రంప్ వైఖరిలో మార్పును సూచిస్తున్నాయి.