ఎస్‌బీఐ నుంచి మరో కొత్త స్కీమ్.. ఒక్కసారి కడితే చాలు.. 20 ఏళ్ల పాటు ప్రయోజనం

 దేశీయ దిగ్గజ బ్యాంకు అయిన స్టేట్ బ్యాంక్ ఆఫ్ ఇండియా అనుబంధ సంస్థ, దేశంలోని ప్రముఖ జనరల్ ఇన్సూరెన్స్ సంస్థల్లో ఒకటైన ఎస్‌బీఐ జనరల్ ఇన్సూరెన్స్ మరో కొత్త ప్లాన్ తీసుకొచ్చింది. కొత్తగా సొంతింటి కలను నెరవేర్చుకుంటున్న వారితో పాటు ఇప్పటికే ఇల్లు కొనుగోలు చేసిన వారిని ఆకర్షించేందుకు సరికొత్త పాలసీని రూపొందించినట్లు తెలిపింది. ఎస్‌బీఐ జనరల్ ఫ్లెక్సీ హోమ్ ఇన్సూరెన్స్ ) లాంచ్ చేసింది. దేశవ్యాప్తంగా ఇంటి యజమానులతో పాటుగా అద్దెకు ఉండే వారికి సైతం ప్రయోజనాలు కల్పించేలా ఈ ప్లాన్ రూపొందించినట్లు తెలిపింది. మరి ఆ వివరాలు తెలుసుకుందాం.

సౌకర్యవంతంగా, దీర్ఘకాలం పాటు ఇంటికి రక్షణ కల్పించే పాలసీలకు ఆదరణ పెరుగుతున్న క్రమంలో ఈ ఫ్లెక్సీ హోమ్ ఇన్సూరెన్స్ తెచ్చినట్లు ఎస్‌బీఐ జనరల్ ఇన్సూరెన్స్ పేర్కొంది. ఇంటి ఓనర్లు, అద్దెకు ఉండే ప్రత్యేక అవసరాలకు తగినట్లుగా డిజైన్ చేసినట్లు పేర్కొంది. పెరుగుతున్న ఇళ్ల ధరలు, ప్రకృతి వైపరీత్యాలుతో దేశంలో సౌకర్యవంతమైన, లాంగ్ టర్మ్ పాలసీలకు డిమాండ్ పెరుగుతున్నట్లు తెలిపింది. ఈ పథకాన్ని సొంత గృహాలు, అద్దె గృహాలు, హౌసింగ్ సొసైటీలకు బీమా రక్షణ కల్పించేలా రూపొందించారు. ఫ్లెక్సీ హోమ్ ఇన్సూరెన్స్ ద్వారా ఫైర్ కవర్ మాత్రమే లభిస్తుంది. ఆపైన వివిధ ప్రమాదాలతో ఏర్పడే నష్టాలకు యాడ్ ఆన్స్ తీసుకోవాల్సి ఉంటుంది.

ఇంటిలోని విలువైన వస్తువుల రక్షణ, తాత్కాలిక నివాస ఖర్చులు, దొంగతనం రక్షణ వంటి అదనపు కవర్లు యాడ్ ఆన్ రూపంలో పొందవచ్చు. బహుళ ఆప్షన్ కవర్లపై ఆకర్షణీయమైన డిస్కౌంట్లు కల్పిస్తోంది. ఈ విధానం గృహ నిర్మాణ వస్తువులు, అదనపు ప్రమాదాలకు సమగ్ర రక్షణ ఇస్తుంది. ప్రకృతి విపత్తులు, అగ్ని ప్రమాదాలు, దొంగతనం వంటి సంఘటనల నుంచి రక్షణ ఇస్తుంది. ఇందులో ఒకసారి ప్రీమియం చెల్లిస్తే సరిపోతుంది. 20 సంవత్సరాల వరకు దీర్ఘకాలిక బీమా భద్రత లభిస్తుంది. సింగిల్ ప్రీమియం లాంగ్ టర్మ్ బీమా రక్షణలో సులభమైన క్లెయిమ్ ప్రక్రియతో ఆర్థిక స్థిరత్వం, మనశ్శాంతిని అందిస్తుందని ఎస్‌బీఐ జనరల్ ఇన్సూరెన్స్ చీఫ్ ప్రొడక్ట్, మార్కెటింగ్ ఆఫీసర్ తెలిపారు. ప్రతి ఇల్లు ప్రత్యేకమైనదేనని అన్నారు. అలాంటి దానికి అనుకోని ఘటనల నుంచి రక్షణ ఉండేలా కచ్చితంగా చూసుకోవాలన్నారు. అలాగే అద్దెదారులు సైతం ఇంట్లోని తమ విలువైన వస్తువులను రక్షించుకోవాలని సూచించారు. అలాంటి వాటన్నింటికీ ఏకైక పరిష్కారం ఎస్‌బీఐ జనరల్ ఫ్లెక్సీ హోమ్ ఇన్సూరెన్స్ అని చెప్పారు.