నర్సుల సేవల్ని కొనియాడి,,,,పవన్ కళ్యాణ్ ఎమోషనల్

నర్సులు ఎంతో మంది రోగుల ప్రాణాలను కాపాడుతున్నారు.. వారి సేవలను ఎవరూ మర్చిపోలేమన్నారు ఏపీ డిప్యూటీ సీఎం పవన్ కళ్యాణ్. కరోనా వంటి క్లిష్ట సమయంలో వారు ప్రాణాలను లెక్క చేయకుండా పనిచేశారని.. నర్సుల సేవలు ఎప్పటికీ గుర్తుండిపోతాయి అన్నారు. అంతర్జాతీయ నర్సుల దినోత్సవం సందర్భంగా మంగళగిరిలోని క్యాంపు కార్యాలయంలో పిఠాపురం నియోజకవర్గంలోని ప్రభుత్వ ఆసుపత్రుల స్టాఫ్ నర్సులతో ఆయన సమావేశమయ్యారు. వారి సేవలకు గుర్తింపుగా ఎనిమిది మంది నర్సులను సత్కరించారు.. వారి సమస్యలను అడిగి తెలుసుకున్నారు.. నర్సుల అందిస్తున్న సేవలను కొనియాడారు. ఫ్లోరెన్స్ నైటింగేల్ స్ఫూర్తితో రోగులకు స్వస్థత చేకూర్చేలా నర్సులు వృత్తికి గౌరవం తెస్తున్నారన్నారు.

నర్సులు వైద్య రంగంలో ఎంతో ముఖ్యమైన సేవలు అందిస్తున్నారన్నారు పవన్ కళ్యాణ్.. వారి సేవలు వెలకట్టలేనివని ప్రశంసించారు.

నర్సుల చేతి స్పర్శ రోగులకు మానసిక ధైర్యాన్ని ఇస్తుందని.. ఓదార్పున ఇస్తుందని ఆయన అన్నారు. విధి నిర్వహణలో ఎంతో మంది రోగుల ప్రాణాలు కాపాడుతున్న నర్సుల సేవలను ఎవరూ మరచిపోరు. 'మీరు పడే శ్రమ, కష్టం నాకు తెలుసు. కరోనా సమయంలో ప్రాణాలను సైతం లెక్క చేయకుండా మీరు విధులు నిర్వర్తించిన విధానం మరువలేం' అంటూ కరోనా సమయంలో నర్సులు చేసిన సేవలను ఆయన గుర్తు చేసుకున్నారు

సింగపూర్‌లో తన కుమారుడు మార్క్ శంకర్ ప్రమాదానికి గురైనప్పుడు అక్కడి నర్సులు చేసిన సేవలను ఉప ముఖ్యమంత్రి పవన్ కళ్యాణ్ గుర్తు చేసుకున్నారు. 'ఇటీవల సింగపూర్ లో నా కుమారుడు మార్క్ శంకర్ ప్రమాదానికి గురైనప్పుడు ఆసుపత్రిలో ఉన్న సమయంలో అక్కడ నర్సులు చేసిన సేవలు చూసినప్పుడు మరోసారి మీ కష్టం గుర్తుకువచ్చింది. మిమ్మల్ని కలిసి మీరు అందించే సేవలు మరచిపోలేనివి అని చెప్పి కృతజ్ఞతలు చెప్పాలనుకున్నాను' అన్నారు. ఇవాళ అంతర్జాతీయ నర్సుల దినోత్సవం సందర్భంగా నర్సులను కలవడం సంతోషంగా ఉందని.. వారి సమస్యలను వైద్య ఆరోగ్య శాఖ మంత్రి శ్రీ సత్యకుమార్ యాదవ్ దృష్టికి తీసుకువెళ్తానని హామీ ఇచ్చారు డిప్యూటీ సీఎం పవన్ కళ్యాణ్.