గండికోటకు మహర్దశ.. గండికోట సహా ఆరు ప్రాంతాల్లో టెంట్ సిటీలు ఏర్పాటు

రాష్ట్రంలో పర్యాటక రంగాన్ని ప్రోత్సహించేందుకు ఆంధ్రప్రదేశ్ ప్రభుత్వం అనేక చర్యలు తీసుకుంటోంది. పర్యాటక ప్రాంతాలు, దర్శనీయ స్థలాలలో మౌలిక వసతులను అభివృద్ధి చేయడం ద్వారా సందర్శకులను ఆకర్షించాలని భావిస్తోంది. ఇందుకోసం హోంస్టేల వంటి సరికొత్త ఆలోచనలు చేస్తోంది. పొడవైన సముద్ర తీరంతో పాటుగా రాష్ట్రంలోని చారిత్రక, ఆధ్యాత్మిక స్థలాలను అభివృద్ధి చేసి పర్యాటక రంగాన్ని కొత్త పుంతలు తొక్కించేందుకు సరికొత్త ఆలోచనలు చేస్తోంది. ఇటీవేలే పర్యాటక శాఖపై సమీక్షించిన ముఖ్యమంత్రి నారా చంద్రబాబు నాయుడు.. పర్యాటక రంగం అభివృద్ధికి పలు ఆదేశాలిచ్చారు. ఈ క్రమంలోనే గండికోటలో టెంట్ సిటీ ఏర్పాటు చేయాలనే ప్రతిపాదన తెరపైకి వచ్చింది.

వైఎస్ఆర్ జిల్లా జమ్మలమడుగుకు 15 కిలోమీటర్ల దూరంలో ఉంటుంది గండికోట. పెన్నా నది ఒడ్డున ఈ చారిత్రక స్థలాన్ని ఎంతో మంది పర్యాటకులు సందర్శిస్తూ ఉంటారు. ఈ క్రమంలోనే గండికోటలో మౌలిక వసతులు అభివృద్ధి చేయాలని ఏపీ ప్రభుత్వం నిర్ణయించింది. భారతదేశ గ్రాండ్ కాన్యన్‌గా పిలవబడే గండికోటలో రంగనాథస్వామి ఆలయం, మాధవరాయస్వామి ఆలయం, విజయనగర రాజుల శైలిని ప్రతిబింబించే కళాత్మక రూపాలు ఉన్నాయి. ధాన్యాగారం, గువ్వల గోపురం, రాయలచెరువు వంటి నిర్మాణాలు గండికోట చారిత్రక ప్రాముఖ్యతను తెలియజేస్తాయి. పెన్నా నది లోయ.. మసీదు వంటి నిర్మాణాలతో గండికోట పర్యాటకులను ఆకర్షిస్తోంది. ఇక్కడ టెంట్లు వేసుకుని ప్రకృతి అందాలను ఆస్వాదించడానికి, ట్రెక్కింగ్ చేయడానికి చాలా మంది పర్యాటకులు ఆసక్తి చూపుతుంటారు.

ఈ క్రమంలోనే గండికోటలో టెంట్ సిటీ ఏర్పాటు చేయాలని ఏపీ పర్యాటకశాఖ ఆలోచిస్తోంది. ఇదే విషయాన్ని ముఖ్యమంత్రి నారా చంద్రబాబు నాయుడుతో జరిగిన సమీక్షా సమావేశంలోనూ అధికారులు వివరించారు. అరకు, గండికోటతో పాటుగా రాష్ట్రంలోని ఆరు చోట్ల 180 గుడారాలతో టెంట్‌ సిటీలు ఏర్పాటు చేసే ఆలోచనలో ఉన్నట్లు తెలిపారు. అలాగే సీ క్రూయిజ్, రివర్‌ క్రూయిజ్‌ సేవలు అందుబాటులోకి తీసుకురానున్నట్లు ముఖ్యమంత్రికి వివరించారు. మరోవైపు సుమారుగా రూ. 5 కోట్ల వ్యయంతో గండికోట ప్రీమియం టెంట్ సిటీ రూపొందించే ఆలోచనలో ఏపీ టూరిజం అధికారులు ఉన్నారు. 3.94 ఎకరాల విస్తీర్ణంలో గండికోట టెంట్ సిటీ ఏర్పాటు కానుంది.3 ఎకరాల్లో టెంట్ సిటీ నిర్మాణం, 0.86 ఎకరాల్లో వాహనాల పార్కింగ్ కోసం ఏర్పాట్లు, 0.084 ఎకరాల్లో కెఫేటేరియా, వసతి సదుపాయాలు ఏర్పాటు చేసేందుకు ప్రణాళికలు రచిస్తున్నారు.